Header Ads

ກະຊວງການເງິນ ຊີ້ແຈງເຈົ້າໜ້າທີ່ເກັບພາສີຊໍ້າຊ້ອນກັນ


​ເມື່ອ​ບໍ່​ດົນ​ມາ​ນີ້, ມີຜູ້ປະກອບການ​ໄດ້ສະເໜີ ຜ່ານ​ໂທລະສັບສາຍດ່ວນ 1519 ຂອງ​ກະຊວງ​ການ​ເງິນ ໃຫ້ເອົາໃຈໃສ່ຕິດຕາມກວດກາ ການປະຕິບັດວຽກງານຂອງພະນັກງານພາສີ ຊາຍແດນຢູ່ແຂວງ​ຜົ້ງ​ສາ​ລີ, ອຸ​ດົມ​ໄຊ, ຫລວງ​ພະ​ບາງ ແລະ ຫລວງ​ນ້ຳ​ທາ, ໂດຍ​ສະ​ເພາະດ່ານ​ພາ​ສີຫລັກ 58, ບໍ່​ເຕັນ ແລະ ປາກ​ຄາ  ກໍ​ລະ​ນີ ນໍາເຂົ້າສິນຄ້າຈາກ ສປ ຈີນ ປະເພດສິນຄ້າເຫັດ​ເຂັມ, ຫົວ​ກ​າ​ຫລົດ ແລະ ຜັກ ມີ​ນ້ຳ​ໜັກ​ຕົວ​ຈິງ 3 ໂຕນ ແຕ່​ພາຍຫລັງ​ພະ​ນັກ​ງານ​ພາ​ສີ​ຊັ່ງເປັນ 19 ໂຕນເສຍ​ພາ​ສີ 3.800.000 ກີບ ແຕ່​ລະ​ບຸ​ໃນ​ບິນ​ຮັບ​ເງິນ​ຈຳ​ນວນ 1.800.000 ກີບ  ຫລັງ​ຈາກນັ້ນ, ໄດ້​ເດີນ​ທາງ​ມາແຂວງຫລວງ​ພະ​ບາງ ພະ​ນັກ​ງານ​ພາ​ສີ​ ໃນ​ແຂວງ​ດັ່ງ​ກ່າວ​ ໄດ້​ຮຽກ​ເກັບ​ຕື່ມ​ອີກ 300.000 ກີບ ຕໍ່​​ກັບ​ບັນ​ຫານີ້ ຄວນ​ມີ​ມາດ​ຕະ​ການ​ແກ້​ໄຂ​ໂດຍ​ໄວ ເນື່ອງຈາກວ່າຖ້າເສຍພາສີເປັນຈໍານວນຫລາຍ ​ແລະ ມີລັກສະນະແບບນີ້ ທຽບໃສ່ສິນຄ້າຕົວຈິງເຮັດໃຫ້ການດໍາເນີນທຸລະກິດ ບໍ່ມີກໍາໄລ ​ແລະ ບໍ່​ສາມາດ​ໄປ​ລອດ​ໄດ້.
ຕໍ່​ກັບ​ບັນ​ຫາ​ດັ່ງກ່າວ, ກະຊວງ​ການ​ເງິນ ​ໄດ້​ຊີ້​ແຈງ ດັ່ງ​ນີ້: ການກວດກາການເຄື່ອນຍ້າຍສິນຄ້າ ລະຫວ່າງດ່ານຕົ້ນທາງຫາ ດ່ານປາຍທາງ ຫລື ລະຫວ່າງແຂວງ ຫາ ແຂວງ ກອງກວດກາພາສີ ທີ່ປະຈໍາຢູ່ແຕ່ລະແຂວງມີສິດ ແລະ ພາລະບົດບາດ ໃນການຈັດຕັ້ງປະຕິບັດວຽກງານຕ້ານ ແລະ ສະກັດກັ້ນການຄ້າຂາຍເຖື່ອນ ຕາມລຽບຊາຍແດນ ແລະ ຕິດຕາມການກວດກາ ເຄື່ອນຍ້າຍສິນຄ້າ, ເຄື່ອງຂອງພາຍໃນຂອບເຂດ ຄວາມຮັບຜິດຊອບຂອງຕົນ. ໃນການກວດກາຕົວຈິງ ຖ້າກວດກາ ພົບເຫັນສິນຄ້າ ທີ່ບໍ່ມີໃນເອກະສານ ຫລື ລາຍການສິນຄ້າບໍ່ຖືກກັບການແຈ້ງຕົວຈິງ ຫລື ການລັກລອບທຸກຮູບແບບ ເຈົ້າໜ້າທີ່ພາສີຈະຕ້ອງດຳເນີນການຍຶດ, ສືບສວນ- ສອບສວນ, ດໍາເນີນຄະດີ ແລະ  ປັບໄໝຕາມກົດໝາຍ ແລະ ລະບຽບການກໍານົດ.
ການນໍາເຂົ້າສິນຄ້າປະເພດພືດຜັກ ຜ່ານດ່ານພາສີພູຫລັກຄໍາ (ຫລັກ 58) ເມືອງນາໝໍ້, ແຂວງອຸດົມໄຊ ຜ່ານລົງມາແຂວງຫລວງພະບາງ ນອກຈາກຂະແໜງການພາສີແລ້ວ ແມ່ນຍັງມີຂະແໜງການກ່ຽວຂ້ອງອື່ນ ດໍາເນີນກວດກາຕາມ​ພາ​ລະບົດບາດ.  ດັ່ງນັ້ນ, ເພື່ອຄວາມກະຈາງແຈ້ງ ຈຶ່ງໄດ້ກວດກາຄືນ ການຈັດຕັ້ງປະຕິບັດຂອງເຈົ້າໜ້າທີ່ພາສີ ແຂວງຫລວງພະບາງ ແມ່ນເຫັນວ່າບໍ່ມີເຫດດັ່ງກ່າວ ຕາມການສ່ອງແສງ./.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


1 comment:

  1. ບໍ່ເຊື່ອເດັດຂາດວ່າພວກພາສີທີ່ທຸກຍາກຈຳນວນຫນຶ່ງທີ່ກ່ອນມາເປັນພາສີ ແລະ ຕຳຫຼວດຊາຍແດນ ແຕ່ກ່ອນຍັງທຸກຍາກບາດມາເປັນພາສີ-ຕຳຫຼວດແລ້ວລຳລວຍຜິດປົກກະຕິຖ້າບໍ່ຄໍລັບຊັນ ແລ້ວເອົາເງິນມາຈາກໃສ

    ReplyDelete

Powered by Blogger.