Header Ads

ປະທານປະເທດແຫ່ງ ສປປ ລາວ ຕ້ອນຮັບ ຄະນະຜູ້ແທນຫວຽດນາມ ເຂົ້າຮ່ວມງານສະຫລອງ ບຸນມະໂຫລານມິດຕະພາບ ລາວ-ຫວຽດນາມ



ໃນ​ວັນ​ທີ 19 ກໍລະກົດ​ ນີ້ ຢູ່ຫ້ອງ​ວ່າການ ​ປະທານ​ປະ​ເທດ, ທ່ານ ບຸນ​ຍັງ ວໍລະ​ຈິດ ປະ ທານ​ປະ​ເທດ​ແຫ່ງ ສປປ ລາວ ​ໄດ້​ໃຫ້​ກຽດ​ຕ້ອນຮັບ​ການ​ເຂົ້າຢ້ຽມ​ຂ່ຳນັບ ຄະນະ​ຜູ້​ແທນ​ຫວຽດນາມ ນຳ​ໂດຍ ທ່ານ ​ເຈີິນ ວັນ​ຕຸ້ຍ ຫົວໜ້າ​ຄະນະ​ຮັບຜິດຊອບ ​ສະມາຊິກ​ສະພາ​ແຫ່ງ​ຊາດ ສສ ຫວຽດນາມ, ປະ ທານ​ສະມາຄົມ​ມິດຕະພາບ​ ຫວຽດນາມ-ລາວ, ພ້ອມ​ດ້ວຍ​ຄະນະ​ ໃນ​​ໂອກາດ​ເດີນທາງ​ ມາ​ຢ້ຽມຢາມ ສປປ ລາວ ​ເພື່ອ​ເຂົ້າຮ່ວມ​ງານ​ ສະ​ເຫລີ​ມສະຫລອງ​ ບຸນມະ​ໂຫລານ​ມິດຕະພາບ​ ລະຫວ່າງ​ ປະຊາຊົນລາວ-​ຫວຽດນາມ​ ຄັ້ງທີ IV ​ເພື່ອ​ກະກຽມ​ສະ​ເຫລີ​ມສະຫລອງ​ ວັນ​ປະຫວັດສາດ ລາວ-​ຫວຽດນາມ ລະຫວ່າງ​ ວັນ​ທີ 17-24 ກໍລະກົດ​ ນີ້.



ໃນໂອກາດ​ດັ່ງກ່າວ, ທ່ານປະທານ​ປະ​ເທດ ​ໄດ້​ສະ​ແດງ​ຄວາມ​ຕ້ອນຮັບ​ອັນ​ອົບ​ອຸ່ນ ​ແລະ ສະໜິດສະໜົມ ມາ​ຍັງຄະນະ​ຜູ້​ແທນ​ ສະມາຄົມມິດຕະພາບ​ ຫວຽດນາມ-ລາວ, ລາວ-​ຫວຽດນາມ ​ແລະ ​ຊົມ​ເຊີຍ, ຕີ​ລາຄາ​ສູງ​ ຕໍ່​ສະມາຄົມ​​ສອງ​ຝ່າຍ ທີ່​ມີ​ແນວ​ຄິດ​ປະດິດ​ສ້າງ​ ຈັດຕັ້ງານ​ບຸນມະ​​ໂຫລານ ມິດຕະພາບ ລາວ​-ຫວຽດນາມ ​ເດີນທາງ​ມາ​ຢ້ຽມຢາມ ​ແລະ ​ເຂົ້າຮ່ວມ​ງານ​ບຸນມະ​ໂຫລານ ​ມິດຕະພາບ ລະຫວ່າງ ​ປະຊາຊົນ​ສອງ​ຊາດ ລາວ-​ຫວຽດນາມ ​​ໃນ​ຄັ້ງນີ້, ​ທາມ​ກາງ​ບັນຍາກາດ​ທີ່​ສອງ​ພັກ, ສອງ​ລັດ ​ແລະ ປະຊາຊົນ ສອງ​ຊາດ ລາວ-​ຫວຽດນາມ ພວມ​ຈັດຕັ້ງສະ​ເຫລີ​ມສະຫລອງ ​ວັນ​ປະຫວັດສາດ ລາວ-​ຫວຽດນາມ ຢ່າງ​ເປັນ​ຂະ​ບວນຟົດ​ຟື້ນ.

​ທ່ານປະທານ​ປະ​ເທດ ​​ກ່າວ​​ວ່າ: ພັກ-​ລັດ ​ແລະ ປະຊາຊົນ​ລາວ​ບັນດາ​ເຜົ່າ ມີ​ຄວາມ​ປິ​ຕິ​ຊົມ​ເຊີຍ​ເປັນ​ຢ່າງ​ຍິ່ງ ​ທີ່​ເຫັນສາຍ​ພົວພັນ​ ມິດຕະພາບອັນ​ດູດ​ດື່ມ, ຄວາມ​ສາມັກ​ຄີ​ພິ​ເສດ ​ແລະ ກາ​ນຮ່ວມ​ມື​ຮອບ ດ້ານ ​​ໄດ້​ຮັບ​ການ​ພັດທະນາ ​ແລະ ​ເສີມຂະຫຍາຍ​ເຂົ້າສູ່ ​ທັງ​ກວ້າງ ​ແລະ ລວງ​ເລິກ  ອັນ​ໄດ້​ນຳ​ເອົາ​ຜົນ​ປະ​ໂຫຍ​ດຕົວ​ຈິງ ​ມາສູ່ປະຊາຊົນ​ສອງ​ຊາດ ລາວ-​ຫວຽດນາມ, ສາຍ​ພົວພັນ​ແບບ​ພິ​ເສດ ນ້ຳ​ໃຈ​ອັນ​ບໍລິສຸດ​ຜຸດ​ຜ່ອງ ລາວ-ຫວຽດນາມ ຍັງ​ໄດ້​ຮັບ​ການ​ເສີມ​ຂະຫຍາຍ ​ແລະ ນັບ​ມື້​ເກີດ​ດອກ​ອອກ​ຜົນ​ຕົວ​ຈິງ​ ໃນ​ທຸກ​ຂົງ​​ເຂດ​ວຽກ​ງານ ​ເຊິ່ງ​ໄດ້​ປະກອບ​ສ່ວນ​ສຳຄັນ​ ເຂົ້າ​ໃນ​ພາລະກິດ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດ ​ໃນ​ໄລຍະ​ໄໝ່ ຂອງສອງ​ປະ​ເທດ ລາວ-ຫວຽດນາມ ​ໃນ​ພາກ​ພື້ນ ​ແລະ ​ໃນ​ໂລກ.

ພ້ອມ​ດຽວ​ກັນ​ນີ້, ທ່ານ ​ເຈີິນ ວັນ​ຕຸ້ຍ ກໍ​ໄດ້​ສະ​ແດງ​ ຄວາມ​ຂອບ​ອົກ​ຂອບໃຈ ຕໍ່​ທ່ານ ບຸນ​ຍັງ ວໍລະ​ຈິດ ທີ່​ໄດ້​ສະຫລະ​ເວລາ​ອັນ​ມີຄ່າ​ ໃຫ້ການ​ຕ້ອນຮັບອັນ​ອຸ່ນໃນ​ຄັ້ງ​ນີ້, ພ້ອມ​​ໄດ້ແຈ້ງ​ຈຸດປະສົງ​ ຂອງ​ການ​ເດີນທາງ​ມາ ສປປ ລາວ ​ໃນ​ຄັ້ງ​ນີ້ ​ໃຫ້ທ່ານ ​ບຸນ​ຍັງ ວໍລະ​ຈິດ ຊາບຕື່ມອີກ.

ຂ່າວ: ສຸກ​ສະ​ຫວັນ, ພາບ: ສະຫວາດ/ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.