Header Ads

ນາຍົກລັດຖະມົນຕີ ແຫ່ງ ສປປ ລາວ ໄດ້ຮັບຫລຽນໄຊ ດາວຄໍາ



ພັກ​-ລັດຖະບານ ສສ ຫວຽດນາມ ​ໄດ້​ປະດັບ​ຫລຽນຊັ້ນ​ສູງ​ ໃຫ້ການ​ນໍາ​ຂັ້ນ​ສູງ ສປປ ລາວ ​ໃນ​ວັນ​ທີ 18 ກໍລະກົດ 2017 ທີ່​ຫໍ​ປະຊຸມ​ແຫ່ງ​ຊາດ, ນະຄອນຫລວງ​ວຽງ​ຈັນ.​ໂດຍ​ເປັນ​ກຽດ​​ເຂົ້າ​ຮ່ວມ​ຂອງ​ສະຫາຍ ບຸນ​ຍັງ ວໍລະ​ຈິດ ​ເລຂາທິການ​ໃຫຍ່ ຄະນະ​ບໍລິຫານ​ງານສູນ​ກາງ​ພັກ ປະຊາຊົນ ປະຕິວັດ​ລາວ, ປະທານ​ປະ​ເທດ ​ແຫ່ງ ສປປ ລາວ ໃນ​ໂອກາດ​ສະ​ເຫລີ​ມສະຫລອງ ​ສອງ​ວັນ​ປະຫວັດສາດ ລາວ-ຫວຽດນາມ ຄື ວັນ​ເຊັນ​ສົນທິສັນຍາ​ມິດຕະພາບ ​ແລະ ການ​ຮ່ວມ​ມື​ຄົບຮອບ 40 ປີ (18/7/1977-18/7/2017 ​ແລະ ວັນສ້າງ​ຕັ້ງ​ສາຍ​ພົວພັນ​ການ​ທູດ​ຄົບຮອບ 55 ປີ (5/9/1962-5/9/2017).




​ໂດຍສະຫາຍ ນາງ ຕ່ອງ ທິ ຝ່ອງ ກໍາມະການ​ກົມ​ການ​ເມືອງ​ສູນ​ກາງ​ພັກ, ຮອງ​ປະທານ​ສະພາ​ແຫ່ງ​ຊາດ ​ໄດ້​ຕາງໜ້າ​ ໃຫ້​ແກ່ພັກ​ກອມ​ມູນິດ​ຫວຽດນາມ, ລັດຖະບານ ສສ ຫວຽດນາມ ປະດັບ​ຫລຽນ​​ໄຊ​ດາວ​ຄໍາ 1 ໜ່ວຍ ​ໃຫ້​ແກ່ສະຫາຍ ທອງ​ລຸນ ສີສສຸ​ລິດ ກໍາມະການ​ກົມ​ການ​ເມືອງ​ສູນ​ກາງ​ພັກ, ນາຍົກ ລັດຖະມົນຕີ​ແຫ່ງ ສປປ ລາວ ​ແລະ ປະດັບ​ຫລຽນ​ໄຊ​ໂຮ່ຈິ​ມິ​ງ ​ໃຫ້ 6 ສະຫາຍ ​ຄື ​​ສະຫາຍ ຈັນ​ສີ ​ໂພ​ສີ​ຄໍາ ກໍາມະການ​ກົມ​ການ​ເມືອງ​ສູນ​ກາງ​ພັກ, ​ເລຂາທິາການ​ສູນ​ກາງ​ພັກ, ຫົວໜ້າ​ຄະນະ​ຈັດ​ຕັ້ງ​ສູນ​ກາງ​ພັກ; ສະຫາຍ ​ໄຊ​ສົມ​ພອນ ພົມວິຫານ ກໍາມະການ​ກົມ​ການ​ເມືອງ​ສູນ​ກາງ​ພັກ, ປະທານ​ສູນ​ກາງ​ແນວ​ລາວ​ສ້າງ​ຊາດ; ສະຫາຍ ຈັນ​ສະໝອນ ຈັນຍາ​ລາດ ກໍາມະການ​ກົມ​ການ​ເມືອງ​ສູນ​ກາງ​ພັກ, ລັດຖະມົນຕີ​ກະຊວງ​ປ້ອງ​ກັນ​ປະ​ເທດ; ສະຫາຍ ຄໍາ​ພັນ ພົມ​ມະ​ທັດ ກໍາມະການ​ກົມ​ການ​ເມືອງ​ສູນ​ກາງ​ພັກ, ​ເລຂາທິການ​ສູນ​ກາງ​ພັກ, ຫົວໜ້າຫ້ອງ​ວ່າການ​ສູນ​ກາງ​ພັກ; ສະ​ຫາຍ ສິນ​ລະ​ວົງ ຄຸດ​ໄພທູນ ກໍາມະການ​ກົມ​ການ​ເມືອງ​ສູນ​ກາງ​ພັກ, ​ເຈົ້າ​ຄອງ​ນະຄອນຫລວງ​ວຽງ​ຈັນ ​ແລະ ສະຫາຍ ສອນ​ໄຊ ສີ​ພັນ​ດອນ ກໍາມະການ​ກົມ​ການ​ເມືອງ​ສູນ​ກາງ​ພັກ, ຮອງ​ນາຍົກລັດຖະມົນຕີ ​ແລະ ປະດັບ​ຫລຽນ​ໄຊ​ເອກະລາດ​ຊັ້ນ I ​ໃຫ້​ 3 ສະຫາຍ​ ຄື ສະຫາຍ ກິ​ແກ້ວ ​ໄຂ​ຄໍາ​ພິທູນ ​ເລຂາທິການ​ສູນ​ກາງ​ພັກ, ຫົວໜ້າ​ຄະ​ນະ​ໂຄສະນາ​ອົບຮົມ​ສູນ​ກາງ​ພັກ; ສະຫາຍ ສົມ​ແກ້ວ ສີ​ລາ​ວົງ ​ເລຂາ​ທິການ​ສູນ​ກາງ​ພັກ, ລັດຖະມົນຕີ​ກະຊວງ​ປ້ອງ​ກັນ​ຄວາມ​ສະຫງົບ ​ແລະ ສະຫາຍ ວິ​ໄລ ຫລ້າ​ຄໍາ​ຟອງ ​ເລຂາ​ທິການ​ສູນ​ກາງ​ພັກ, ຫົວໜ້າ​ກົມ​ໃຫຍ່​ການ​ເມືອງ​ກອງທັບ​ປະຊາຊົນ​ລາວ, ຮອງ​ລັດຖະມົນຕີ​ກະຊວງ​ປ້ອງ​ກັນ​ປະ​ເທດ ລວມ 10 ສະຫາຍ. ​ການ​ປະດັບ​ຫລຽນ​ໄຊ​ໃນ​ຄັ້ງ​ນີ້​ ຊຶ່ງ​ເປັນຜູ້​ທີ່​ມີ​ຄຸນງາມຄວາມດີ ​ແລະ ຜົນງານ​ອັນ​ດີ​ເດັ່ນ ​ໃນ​ການ​ປະກອບສ່ວນ​ຢ່າງ​ໃຫຍ່​ຫລວງ​ເຂົ້າ​ໃນ​ການ​ເພີ່ມ​ພູນ​ສ້າງ ​ແລະ ​ເພີ່ມ​ທະວີ​ສາຍ​ພົວພັນ​ສາມັກຄີ​​ແບບພິ​ເສດ ລາວ-ຫວຽດນາມ. ​




ສະຫາຍ ທອງ​ລຸນ ສີ​ສຸ​ລິດ ​ໄດ້​ຕາງໜ້າ​ ໃຫ້​ບັນດາ​ສະຫາຍ​ການ​ນໍາ​ຂັ້ນ​ສູງ​ພັກ-ລັດ ສປປ ລາວ ທີ່​ໄດ້​ຮັບ​ການ​ຍ້ອງຍໍ​ ​​ໂດຍກ່າວວ່າ: ການ​ທີ່​ພັກ​-ລັດຖະບານ ສສ ຫວຽດນາມ ​ໄດ້​ຕົກລົງ​ມອບ​ຫລຽນ​ໄຊ​ຂັ້ນ​ສູງ​ສຸດ​ ໃຫ້​ແກ່​ບັນດາ​ສະຫາຍ​ການ​ນໍາ​ຂັ້ນ​ສູງ​ພັກ-ລັດຖະບານ ສປປ ລາວ ຄັ້ງ​ນີ້ ​ແມ່ນ​ເປັນ​ກຽດ​ອັນ​ສູງ​ສົ່ງ​ຂອງ​ພັກ-ລັດຖະບານ ສປປ ລາວ ​ທັງເປັນ​ການ​ຕີ​ລາຄາ​ສູງ ​ຕໍ່​ການ​ປະກອບສ່ວນ​ທີ່​ສໍາຄັນ​ຂອງ​ບັນດາ​ສະຫາຍ​ການ​ນໍາ​ຂອງ​ລາວ ​ເຂົ້າ​ໃນ​ການ​ເພີ່ມ​ພູນ​ຄູນ​ສ້າງ ສາ​ຍພົວພັນ​ແບບ​ພິ​ເສດ ລາວ-ຫວຽດນາມ ຕະ ຫລອດ​ໄລຍະ​ທີ່​ຜ່ານ​ມາ. ການ​ນໍາ​ຂັ້ນ​ສູງ​ພັກ-ລັດ ​ເຂົ້າ​ໃຈ​ຢ່າງ​ເລິກ​ເຊິ່ງວ່າ​ໃນ​ສະພາບ​ການ​ພາກ​ພື້ນ ​ແລະ ສາກົນ ພວມ​ມີ​ການ​ຜັນ​ແປ​ຢ່າງ​ວ່ອງ​ໄວ ​ຄື​ດັ່ງ​ປັດຈຸບັນ​ນີ້, ການ​ນໍາ​ຂອງ​ສອງ​ພັກ, ສອງ​ລັດ ຈະ​ຕ້ອງ​ໄດ້​ຮ່ວມ​ມື​ກັນ​ເພື່ອພ້ອມ​ກັນ​ເພີ່ມ​ພູນ​ຄູນ​ສ້າງ ສາຍ​ພົວພົວມິດຕະພາບ​ທີ່​ຍິ່ງ​ໃຫຍ່, ຄວາມ​ສາມັກຄີ​ພິ​ເສດ ​ແລະ ການ​ຮ່ວມ​ມື​ຮອບດ້ານ​ ລະຫວ່າງ ລາວ-ຫວຽດນາມ ​ໃຫ້​ນັບ​ມື້​ໄດ້​ຮັບ​ການ​ເສີມ​ຂະຫຍາຍ​ຢ່າງ​ບໍ່​ຢຸດ​ຢັ້ງ, ​ເພື່ອ​ຜົນ​ປະ​​ໂຫຍ​ດຂອງ​ປະຊາຊົນ​ສອງ​ປະ​ເທດ ກໍ​ຄື ​ເພື່ອ​ສັນຕິພາບ, ມິດ​ຕະພາບ ​ແລະ ການ​ຮ່ວມ​ມື ​ໃນ​ການ​ພັດທະນາ​ໃນ​ພາກ​ພື້ນ ​ແລະ ​ໃນ​ໂລກ. ສະຫາຍ ​ນາຍົກລັດຖະມົນຕີ ​ແຫ່ງ ສປປ ລາວ ​ຍັງ​ໄດ້​ຕາງໜ້າ​ໃຫ້​ພັກ​-ລັດຖະບານ ​ແລະ ປະຊາຊົນ​ລາວ​ບັນດາ​ເຜົ່າ ສະ​ແດງ​ຄວາມ​ຂອບໃຈ ​ແລະ ຮູ້​ບຸນຄຸນ​ຢ່າງ​ເລິກ​ເຊິ່ງຕໍ່​ພັກ-ລັດຖະບານ ​ແລະ ປະຊາຊົນ​ຫວຽດນາມ​ອ້າຍ​ນ້ອງ ທີ່​ໄດ້​ໃຫ້ການ​ສະໜັບສະໜູນ ​ແລະ ຊ່ວຍ​ເຫລືອ​ຢ່າງ​ໃຫຍ່​ຫລວງ, ລໍ້າ​ຄ່າ, ມີ​ປະສິດທິ​ຜົນ ​ແລະ ທັນ​ການ​ແກ່​ພະລະ​ກິດ​ປະຕິວັດ​ຂອງ​ປະຊາຊົນ​ລາວ​ໂດຍ​ຕະຫລອດ​ມາ ​ບໍ່​ວ່າ​ໃນ​ໄລຍະ​ຕໍ່​ສູ້​ກູ້​ຊາດ​ໃນ​ເມື່ອ​ກ່ອນ ກໍ​ຄື​ໃນ​ໄລຍະ​ປົກ​ປັກ​ຮັກສາ ​ແລະ ​ສ້າງສາ​ພັດທະນາ​ປະ​ເທດ​ຊາດ​ໃນ​ປັດຈຸບັນ.

ຂ່າວ:ຂັນ​​ໄຊ,ພາບ:ສະຫວາດ

No comments

Powered by Blogger.