Header Ads

ທູດຈີນ ຍື່ນສານຕາຕັ້ງ ຕໍ່ປະທານປະເທດ



ໃນນ​ວັນ​ທີ 21 ກໍ​ລະ​ກົດ 2017 ທີ່​ທຳນຽບປະທານ​ປະ​ເທດ​ ໄດ້​ຕ້ອນຮັບ ທ່ານ ຫວັງ ​ເຫວີ​ນທຽນ (Wang Wentian)​ ໄດ້​ຍື່ນສານ​ຕາ​ຕັ້ງ ຕໍ່​ທ່ານ ບຸນ​ຍັງ ວໍລະ​ຈິດ ປະທານ​ປະ​ເທດ​ ແຫ່ງ ສາ ທາລະນະ​ລັດ ປະຊາທິປະ​ໄຕ ປະຊາຊົນ​ລາວ ​ເພື່ອ​ດຳລົງ​ຕຳ​ແໜ່ງ ​ເປັນ​ເອກ​ອັກຄະ​ລັດ​ຖະ​ທູດ ວິສາມັນ​ຜູ້​ມີ​ອຳນາດ​ເຕັມ ​​ແຫ່ງ ສາທາລະນະ​ລັດ ປະຊາຊົນ ຈີນ ປະຈຳລາວ ຄົນ​​ໃໝ່.

​ໃນ​ໂອກາດ​ດັ່ງກ່າວ, ທ່ານ ບຸນ​ຍັງ ວໍລະຈິດ ​ໄດ້ສະ​ແດງຄວາມ​ຍິນ​ດີ​ຕ້ອນ​ຮັບ ​ແລະ ຊົມ​ເຊີຍ​ຕໍ່ທ່ານທູດ, ພ້ອມ​ທັງຕີີລາຄາສູງ ຕໍ່ສາຍພົວພັນມິດຕະພາບ ອັນເປັນມູນເຊື້ອ ແລະ ການຮ່ວມມືແບບ ຄູ່ຮ່ວມມືຍຸດທະສາດ ຮອບດ້ານໝັ້ນຄົງຍາວນານ ຕາມທິດ 4 ດີ ເພື່ອນມິດທີ່ດີ, ສະຫາຍທີ່ດີ, ບ້ານໃກ້ເຮືອນຄຽງທີ່ດີ ແລະ ຄູ່ຮ່ວມມືທີ່ດີ ລະຫວ່າງ ສປປ ລາວ ແລະ ສປ ຈີນ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງ ເຂົ້າສູ່ລວງເລີກເປັນກ້າວໆ ໂດຍສະເພາະ ໃນຊຸມປີມໍ່ໆມານີ້ ການຮ່ວມມື ລະຫວ່າງ ສອງປະເທດໄດ້ຂະຫຍາຍຕົວ ຢ່າງບໍ່ຢຸດຢັ້ງ ແລະ ​ເປັນ​ທີ່ໜ້າພາກພູມໃຈ ອັນສຳຄັນແມ່ນ ການສ້າງຄວາມໄວ້ເນື້ອເຊື່ອໃຈ, ການສະໜັບສະໜູນ ແລະ ການຊ່ວຍເຫລືອ ເຊິ່ງກັນ ແລະ ກັນ. ​ພ້ອມ​ເຊື້ອໝັ້ນວ່າ ​​ໃນ​ໄລຍະ​ ການປະຕິບັດ​ໜ້າທີ່ການ​ທູດ ຢູ່ ສປປ ລາວ ທ່ານ​ທູດ ຈະ​ສືບ​ຕໍ່​ເຄື່ອນ​ໄຫວ​ຊຸກຍູ້, ສົ່ງ​ເສີມ​ສາຍ​ພົວພັນ​ມິດຕະພາບ ​ອັນ​ເປັນ​ມູນ​ເຊື້ອ ​ແລະ ​ເປັນ​ຄູ​ຮ່ວມ​ມື​ ຍຸດ​ທະ​ສາດ​ຮອບດ້ານ ​ແລະ ລະ​ຫວ່າງ ສອງພັກ, ສອງລັດ ​ແລະ ປະຊາຊົນ​ສອງ​ຊາດ ລາວ-​ຈີນ ​ໃຫ້​ຂະຫຍາຍຕົວ​ ເຂົ້າ​ສູ່​ລວງ​ເລີກ ​ແລະ ​ແໜ້ນ​ແຟ້ນຍິ່ງໆຂຶ້ນ.

ໃນ​ໂອກາດ​ນີ້, ທ່ານ ຫວັງ ​ເຫວີ​ນທຽນກໍໄດ້ສະແດງຄວາມຂອບໃຈ​ ຕໍ່​ທ່ານ ປະທານ​ປະ​ເທດ​ ທີ່​ໄດ້​​ໃຫ້ການຕ້ອນຮັບ​ ອັນ​ອົບ​ອຸ່ນໃນຄັ້ງ​ນີ້​, ​ທັງພາກພູມໃຈ ​ແລະ ເປັນກຽດຢ່າງສູງ ທີ່ໄດ້ມາດໍາລົງຕຳແໜ່ງ ເປັນເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງ ສປ ຈີນ ປະຈຳ​ລາວ. ພ້ອມ​ໃຫ້ຄຳໝັ້ນສັນຍາວ່າ ຈະ​ສຸມ​ທຸກ​ຄວາມ​ພະຍາຍ​າມ ທັງ​ເຫື່ອ​ແຮງ, ສະຕິ​ປັນ​ຍາ ​ເພື່ອ​ປະກອບ​ສ່ວນ​ເຂົ້າ​ໃນ​ ການ​ເສີມ​ຂະຫຍາຍ​ສາຍ​ພົວພັນ​ ​ແລະ ການຮ່ວມມືທີ່​ດີ.

ຂ່າວ: ກິດ​ຕາ; ພາບ:​ໄອ່​ຄຳ/ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ

No comments

Powered by Blogger.