Header Ads

ປຶກສາ ການສ້າງແຜນຄຸ້ມຄອງງົບປະມານ ໃນກິລາແຫ່ງຊາດ ທີ່ແຂວງຊຽງຂວາງ

ກອງປະຊຸມປຶກສາຫາລືຄົ້ນຄວ້າການສ້າງແຜນລະບຽບການຄຸ້ມຄອງງົບປະມານເພື່ອຮັບໃຊ້ໃຫ້ແກ່ ມະຫະກຳກິລາແຫ່ງຊາດຄັ້ງທີ XI ທີ່ແຂວງຊຽງຂວາງເປັນເຈົ້າພາບ
ໄດ້ ຈັດຂຶ້ນໃນວັນທີ 19 ກໍລະກົດຜ່ານມາ  ທີ່ຫ້ອງປະຊຸມພະແນກການເງິນແຂວງຊຽງຂວາງ ໂດຍໃຫ້ກຽດເຂົ້າຮ່ວມຂອງທ່ານ  ອາດສະພັງທອງ ສີພັນດອນ ຄະນະຮັບຜິດຊອບລະດັບຊາດ ຈັດມະຫະກຳກິລາແຫ່ງຊາດ ຮອງລັດຖະມົນຕີກະຊວງການເງິນ, ມີທ່ານ ຄຳປາວ ມົວ ຮອງເຈົ້າແຂວງຊຽງຂວາງ ຜູ້ຊີ້ນຳວຽກງານເສດຖະກິດ, ມີຫົວໜ້າ ຮອງຫົວໜ້າ ກຳມະການ ແລະ ອະນຸກຳມະການຝ່າຍຕ່າງໆ ເຂົ້າຮ່ວມ.

ສຳລັບຮ່າງຂໍ້ຕົກລົງສະບັບນີ້ ລວມມີທັງໝົດ 12 ມາດຕາ ເນື້ອໃນໄດ້ກຳນົດເຖິງວັນເວລາຮັບໃຊ້ມະຫະກຳກິລາແຫ່ງຊາດຄັ້ງທີ XI, ກຳນົດການຄິດໄລ່ ຄ່າອັດຕາ ກິນ ຢູ່ ພັກ ເຊົາ, ຄ່າເດີນທາງ ແລະ ຄ່າສິ້ນເປືອງຕ່າງໆ ໃຫ້ແກ່ຄະນະຮັບຜິດຊອບແຕ່ລະພາກສ່ວນ ທີ່ເຄື່ອນໄຫວຮັບໃຊ້ງານ  ເພື່ອເປັນບ່ອນອີງໃນການຈັດຕັ້ງປະຕິບັດການນໍາໃຊ້ງົບປະມານ ໃຫ້ມີຄວາມເປັນເອກະພາບ, ຖືກຕ້ອງ ສອດຄ່ອງຕາມລະບຽບຂອງກະຊວງການເງິນ, ພ້ອມທັງຮັບປະກັນການນໍາໃຊ້ງົບປະມານຂອງລັດໃຫ້ມີປະສິດທິຜົນ ປະຢັດ ມັດທະຍັດ ໂປ່ງໃສ ແລະ ສາມາດກວດສອບໄດ້.

    ໂອກາດດັ່ງກ່າວ ທ່ານ ອາດສະພັງທອງ ສີພັນດອນ ຍັງໄດ້ໃຫ້ກຽດໂອ້ລົມ ຊີ້ທິດເຍືອງທາງໃຫ້ແກ່ຄະນະຜູ້ແທນທີ່ເຂົ້າຮ່ວມກອງປະຊຸມ ຈົ່ງພ້ອມກັນປະກອບຄຳຄິດຄຳເຫັນໃສ່ເນື້ອໃນຮ່າງຂໍ້ຕົກລົງ ວ່າດ້ວຍລະບຽບການຄຸ້ມຄອງງົບປະມານສະບັບດັ່ງກ່າວ ຢ່າງກົງໄປກົງມາ ເພື່ອໃຫ້ກອງເລຂາໄດ້ສະຫຼຸບສັງລວມແລ້ວສົ່ງຕໍ່ກະ ຊວງການເງິນໄດ້ຄົ້ນຄວ້າພິຈາລະນາ ແລະ ເຊັນຮັບຮອງອະນຸມັດນຳໃຊ້ໃນຂັ້ນຕອນຕໍ່ໄປ.

ທ່ານຮອງລັດຖະມົນຕີກະຊວງການເງິນ ຍັງໄດ້ຮຽກຮ້ອງໃຫ້ບັນດາ ກຳມະການ ແລະ ອະນຸກຳມະການ ທີ່ຮັບຜິດຊອບຝ່າຍຕ່າງໆ ຈົ່ງເພີ່ມທະວີຄວາມໄວໃນການເຮັດວຽກໃຫ້ແຂງແຮງ ວ່ອງໄວ ທັນເວລາ ແບ່ງຄວາມຮັບຜິດຊອບໃຫ້ລະອຽດ-ຊັດເຈນ ເພາະຖ້າຊັກຊ້າໄປກໍຈະມີບັນຫາ ພ້ອມດຽວກັນນັ້ນ ທ່ານຍັງໄດ້ເນັ້ນໃຫ້ການຂຶ້ນແຜນໃຊ້ຈ່າຍງົບປະມານໃນມະຫະກຳກິລາແຫ່ງຊາດຄັ້ງທີ XI ບໍ່ໃຫ້ເກີນກວ່າແຂວງທີ່ຈັດຜ່ານມາ ແລະ ຢາກໃຫ້ຖືເອົາບັນຍາກາດການແຂ່ງຂັນກິລາແຫ່ງຊາດຄັ້ງນີ້ ເປັນຕົວແບບຢ່າງຮອບດ້ານໃຫ້ແກ່ການຈັດມະຫະກຳກິລາແຫ່ງຊາດໃນຄັ້ງຕໍ່ໆໄປ.

ແຫຼ່ງຂ່າວຈາກ ແຂວງຊຽງຂວາງ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



ກົດພາບອ່ານລາຍລະອຽດ

No comments

Powered by Blogger.