Header Ads

ຮອງນາຍົກລັດຖະມົນຕີ ຕ້ອນຮັບປະທານກຸ່ມບໍລິສັດ ຊີພີ ປະເທດໄທ



ອີງຕາມການລາຍງານຂອງ ສໍານັກຂ່າວປະເທກລາວ ລະບຸວ່າ : ວັນ​ທີ 11 ກໍລະກົດ 2017 ທີ່ ​ສຳນັກງານ​ນາຍົກລັດຖະມົນຕີ ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ​ ​ໄດ້​ໃຫ້ກຽດຕ້ອນຮັບ ການ​ເຂົ້າຢ້ຽມຂ່ຳນັບ ​ຂອງ ທ່ານ ສຸພະ​ກິດ ຈີຣະວະ​ນົນ ປະທານ​ກຸ່ມ​ບໍລິສັດ ຊີ​ພີ (ປະ​ເທດ​ໄທ) ພ້ອມ​ດ້ວຍ​ຄະນະ ​ເນື່ອງ​ໃນ​ໂອກາດ​ເດີນທາງ​ມາ​ຢ້ຽມຢາມ ​ແລະ ​ເຮັດ​ວຽກ ຢູ່ ສປປ ລາວ

​​ໂອກາດນີ້, ທ່ານຮອງນາຍົກລັດຖະມົນຕີ ໄດ້ສະແດງຄວາມຊົມຕໍ່ການເດີນທາງມາຢ້ຽມຢາມ ຂອງຄະນະຜູ້ແທນຈາກກຸ່ມບໍລິສັດ ຊີພີ (ປະເທດໄທ) ​ໃນເທື່ອນີ້ໂດຍສະເພາະເພື່ອເປັນການເສີມຂະຫຍາຍການຮ່ວມມື ດ້ານການພັດທະນາພື້ນຖານເສດຖະກິດໃນ ສປປ ລາວເຊິ່ງມີສາຂາກວ່າ 40 ປະເທດໃນໂລກໄລຍະຜ່ານມາ ບໍລິສັດ CP ​ໄດ້​​ລົງທຶນຈຳນວນໜຶ່ງໃນ ສປປ ລາວ ​ໂດຍ​ສະ​ເພາະໃນຂະ​​ແໜງປູກຝັງແລະ ລ້ຽງສັດ. ​

ໃນປີ 2017 ບໍລິສັດ CP ຍັງໄດ້ເຊັນສັນຍາຊື້ໝາກກາເຟ ຢູ່ພາກໃຕ້ຂອງລາວມູນຄ່າ 75 ຕື້ກີບ ພ້ອມນີ້, ຄະນະນັກລົງທຶນຈາກບໍລິສັດ CP ຍັງຈະໄດ້ຮ່ວມກັບພາກທຸລະກິດຂອງລາວເພື່ອປຶກສາຫາລືກັນຕື່ມອີກ ກ່ຽວກັບທິດທາງການພັດທະນາທຸລະກິດໃນ ສປປ ລາວ ທັງ​ເປັນການສ້າງຖານການຜະລິດເພື່ອສົ່ງອອກໃນເງື່ອນໄຂການເຊື່ອມໂຍງພາກພື້ນແລະ ສາກົນ, ການສົ່ງເສີມການຜະລິດ ຕິດພັນກັບການແກ້ໄຂ ຄວາມທຸກຍາກຂອງປະຊາຊົນ, ການສ້າງເຄື່ອງໝາຍການຄ້າ ທີ່ເປັນຂອງລາວແລະ ການລົງທຶນ ໃນຮູບແບບອື່ນໆ ທີ່ນອນໃນຂະແໜງການປູກຝັງ-​ລ້ຽງສັດຂອງລາວ. ​

ທ່ານສອນໄຊ ສີພັນດອນແລະ ທ່ານ ສຸພະກິດ ຈີຣະວະນົນ ຍັງໄດ້ແລກປ່ຽນຄຳຄິດຄຳເຫັນກັນ ໃນບາງບົດຮຽນໃນການພັດທະນາເປັນຕົ້ນ  ບົດຮຽນໃນການພັດທະນາທີ່ດິນແລະ ອະສັງຫາລິມມະຊັບ, ການລະດົມແຫລ່ງທຶນ-​ຕະຫລາດທຶນ. ​
ໃນຕອນທ້າຍ, ທ່ານຮອງນາຍົກລັດຖະມົນຕີ ຍັງໄດ້ສະແດງຄວາມຫວັງວ່າ ນອກຈາກການຮ່ວມມືພັດທະນາດັ່ງກ່າວແລ້ວ, ທັງສອງຝ່າຍ ຕ້ອງໄດ້ເອົາໃຈໃສ່ຕື່ມໃນບາງຂະແໜງການທີ່ມີຄວາມຈຳປັນແລະທີ່ເປັນທ່າແຮງຂອງ ສປປ ລາວໂດຍສະເພາະ ດ້ານການລ້ຽງສັດແລະ ປູກຝັງ ທີ່ຕ້ອງໄດ້ຍົກຄຸນນະພາແລະ ສ້າງກາໝາຍໃນບາງສິນຄ້າທີ່ຈຳເປັນເພື່ອການສົ່ງອອກ, ການປັບປຸງຍົກລະດັບດ້ານປັດໄຈການຜະລິດ ທັງທາງດ້ານຝຸ່ນ, ປຸ໋ຍ, ຫົວອາຫານແລະແນວພັນເພື່ອເຮັດໃຫ້ການຜະລິດ ມີຕົ້ນທຶນທີ່ຕ່ຳລົງ ແລະ ສາມາດແຂ່ງຂັນໄດ້, ການຮ່ວມມືດ້ານການທ່ອງທ່ຽວທັງການພັດທະນາແຫຼ່ງທ່ອງທ່ຽວ, ການດຶງດູດນັກທ່ອງທ່ຽວແລະ ສະຖານທີ່ພັກຜ່ອນ ຕາມແຫລ່ງທຳມະຊາດທີ່ສວຍງາມ, ອາກາດບໍລິສຸດໃຫ້ໄດ້ມາດຕະຖານສາກົນ ​​ແຕ່ເປັນເອກະລັກສະເພາະຂອງລາວ.


ທີ່ມາ: ຂປລ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.