Header Ads

ລັດຖະມົນຕີ ກະຊວງຕ່າງປະເທດ ຢ້ຽມຢາມ-ເຮັດວຽກ ຢູ່ແຂວງບໍ່ແກ້ວ


ໃນວັນທີ 19 ກໍລະກົດ 2017 ຜ່ານມານີ້, ທ່ານ ສະເຫລີມໄຊ ກົມມະສິດ ລັດຖະມົນຕີ ກະຊວງການ ຕ່າງປະເທດ ​ໄດ້ລົງ​ເຄື່ອນ​ໄຫວຢ້ຽມຢາມ ​ແລະ ເຮັດວຽກ ຢູ່ແຂວງບໍ່ແກ້ວ ເປັນກຽດກ່າວຮັບຕ້ອນ ໂດຍທ່ານ ເພັງສອນ ແກ້ວວິໄລ ກໍາມະການພັກແຂວງ ຫົວໜ້າຫ້ອງວ່າການປົກຄອງ ແຂວງບໍ່ແກ້ວ, ທ່ານ ຫົງແກ້ວ ວິໄນ ວົງ ຫົວໜ້າພະແນກການຕ່າງປະເທດ ພ້ອມຄະນະ.

ໂອກາດນີ້, ທ່ານລັດຖະມົນຕີ ກະຊວງການຕ່າງປະເທດ ໄດ້ລົງຢ້ຽມຢາມ ເຂດເສດຖະກິດພິເສດ ສາມ ຫລ່ຽມຄໍາ ທີ່ເມືອງຕົ້ນເຜິ້ງ ​ເຊິ່ງທ່ານ ຈັນທະວີ ໂພທິສານ ຮອງປະທານສະພາ ບໍລິຫານເຂດ ເສດຖະກິດພິເສດ ສາມຫລ່ຽມຄໍາ ​ໄດ້ລາຍງານວ່າ: ເຂດສາມຫລ່ຽມຄໍາ ມີເນື້ອທີ່ທັງໝົດ 10.000 ເຮັກຕາ ໃນນັ້ນ ເຂດພັດທະນາຕົວເມືອງ 3.000 ເຮັກຕາ ແລະ ເຂດປ້ອງກັນສາຍພູກິ່ວລົມ 7.000 ເຮັກຕາ, ປັດຈຸບັນ ໄດ້ສໍາເລັດການໄກ່ ເກ່ຍຊົດເຊີຍທີ່ດິນແລ້ວ 1.000 ເຮັກຕາ ​ແລະ ມີ​ອາຍຸການສໍາປະທານ 99 ປີ. ມາຮອດປັດຈຸບັນ ໄດ້ປຸກສ້າງ ເຮືອນທົດແທນໃຫ້ ພໍ່ແມ່ປະຊາຊົນຈໍານວນ 114 ຫລັງ, ລວມທັງວັດ, ໂຮງຮຽນ, ຫ້ອງການບ້ານ, ຕະຫລາດ ລວມມູນຄ່າທັງໝົດ 13 ລ້ານກວ່າໂດລາສະຫະລັດ. ເຂດສາມຫລ່ຽມຄໍາ ມີການ​ລົງ​ທຶນ​ທັງໝົດ 16 ໂຄງການ ລວມມູນຄ່າກວ່າ 300 ລ້ານໂດລາສະຫະລັດ. ພ້ອມ​ນັ້ນ, ຍັງ​ມີການ​ລົງທຶນ​ຍ່ອຍ ຂອງບັນດາບໍລິສັດ ຢູ່​ເຂດ​ນີ້​ລວມ 10 ບໍລິສັດ, ມີ 238 ຫົວໜ່ວຍ, ມູນຄ່າ 96 ລ້ານໂດລາສະຫະລັດ.

ໃນໂອກາດດຽວກັນ, ທ່ານ ສະເຫລີມໄຊ ກົມມະສິດ ຍັງໄດ້​ເປັນກຽດໂອ້ລົມ ແລະ ​ໃຫ້ທິດຊີ້ນໍາຕໍ່ຄະນະ​ນຳ ເຂດເສດຖະກິດພິເສດ ແລະ ພາກສ່ວນກ່ຽວຂ້ອງ ​ໂດຍ​ເນັ້ນ​ໃຫ້​ມີ​ການຄຸ້ມຄອງ ຄົນຕ່າງປະເທດ ທີ່ມາເຮັດວຽກຢູ່ ເຂດເສດຖະກິດພິເສດ ສາມຫລ່ຽມຄໍາ ໃຫ້ງານຄົນຕ່າງປະເທດ ທີ່ມາເຮັດວຽກຢູ່ ເຂດເສດຖະກິດພິເສດ ສາມ ຫລ່ຽມຄໍາ ​ໃຫ້​ຖືກຕ້ອງ​ສອດຄ່ອງ​ກັບ​ ລະບຽບກົດໝາຍ, ພ້ອມ​ທັງ​ຢ້ຳໃຫ້ເພີ່ມທະວີ ຄວາມເອົາໃຈໃສ່ ວຽກງານ ປກຊ-ປກສ ໃນການຮັກສາຄວາມສະຫງົບ ໃນເຂດຊາຍແດນ ໃຫ້ເປັນປົກກະຕິ ແລະ ດີຂຶ້ນເທື່ອລະກ້າວ.

ຂ່າວ-ພາບ: ບຸນເພັດ/ຂປລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ

No comments

Powered by Blogger.