Header Ads

ຮອງນາຍົກເນັ້ນພັດທະນາ ຕະຫລາດທຶນ ເພື່ອຂັບເຄື່ອນ ການຂະຫຍາຍຕົວ ຂອງເສດຖະກິດແຫ່ງຊາດ



ກອງປະຊຸມ ຄະນະກໍາມະການ ຄຸ້ມຄອງຫລັກຊັບ ຄັ້ງທີ II (ຄຄຊ) ປະຈໍາປີ 2017  ໄດ້ສໍາເລັດລົງ ດ້ວຍໝາກຜົນ ອັນຈົບງາມ ໃນວັນທີ 21 ກໍລະກົດນີ້, ທີ່ ນະຄອນຫລວງວຽງຈັນ, ພາຍໃຕ້ການເປັນປະທານຂອງ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີ ກະຊວງການເງິນ, ປະທານຄະນະ ກໍາມະການຄຸ້ມຄອງຫລັກຊັບ, ມີຮອງປະທານ, ບັນດາກໍາມະການ ຄຄຊ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ. ກອງປະຊຸມໃນຄັ້ງ​ນີ້, ຍັງໃຫ້ສືບຕໍ່ພັດທະນາ ຕະຫລາດທຶນໃຫ້ກາຍເປັນເຄື່ອງມື ດ້ານການເງິນ ເພື່ອຂັບເຄື່ອນການຂະຫຍາຍຕົວ ຂອງເສດຖະກິດແຫ່ງຊາດ.

ທ່ານຮອງນາຍົກລັດຖະມົນຕີ
, ປະທານຄະນະ ກໍາມະການຄຸ້ມຄອງຫລັກຊັບ ໄດ້ຊີ້ນໍາ ແລະ ເນັ້ນໜັກວ່າ: ວຽກງານຕະຫລາດທຶນ ເປັນວຽກໜຶ່ງທີ່ສໍາຄັນ ປະກອບສ່ວນເຂົ້າໃນ ການພັດທະນາ ເສດຖະກິດ-ສັງຄົມ ຂອງ ສປປ ລາວ ໃຫ້ມີຄວາມໝັ້ນທ່ຽງ ແລະ ມີສະຖຽນລະພາບ ໄປຄຽງຄູ່ກັບຕະຫລາດເງິນ. ດັ່ງນັ້ນ, ເພື່ອພັດທະນາຕະຫລາດທຶນ ໃຫ້ກາຍເປັນເຄື່ອງມື ດ້ານການເງິນ ເພື່ອຂັບເຄື່ອນການຂະຫຍາຍຕົວ ຂອງເສດຖະກິດຂອງປະເທດ ໃຫ້ບັນລຸຄາດໝາຍ ທີ່ວາງໄວ້ ພວກເຮົາຕ້ອງສືບຕໍ່ ຈັດຕັ້ງປະຕິບັດ ວຽກງານຄຸ້ມຄອງຫລັກຊັບ ໃຫ້ໜັກແໜ້ນເຂັ້ມແຂງກ່ວາເກົ່າ, ພາຍຫລັງສໍາເລັດ ກອງປະຊຸມນີ້ແລ້ວ ໃຫ້ຮີບຮ້ອນປະສານສົມທົບ ແລະ ຜັນຂະຫຍາຍເນື້ອໃນຈິດໃຈດັ່ງ ກ່າວເປັນໜ້າວຽກລະອຽດ, ເປັນຮູບປະທໍາ, ເປັນເຈົ້າການ ແລະ ຕ້ອງຕິດຕາມກວດກາ ແລະ ສະຫຼຸບ.

ກອງປະຊຸມ ຄຄຊ ຍັງ​ໄດ້ແລກປ່ຽນຄໍາຄິດເຫັນ ຂອງບໍລິສັດຈົດທະບຽນ ກ່ຽວກັບຜົນດີ ແລະ ຂໍ້ຫຍຸ້ງຍາກໃນການເປັນບໍລິສັດ ຈົດທະບຽນທີ່ສະເໜີ ໂດຍບໍລິສັດ ຜະລິດ-ໄຟຟ້າລາວ ມະຫາຊົນ; ລາຍງານການຈັດຕັ້ງປະຕິບັດ ມະຕິກອງປະຊຸມ ຄຄຊ ຄັ້ງທີ
I ປະຈໍາປີ 2017 ແລະ ລາຍງານຄວາມຄືບໜ້າ ການກະກຽມອອກຈໍາໜ່າຍຮຸ້ນກູ້ຂອງບໍລິສັດ ຜະລິດ-ໄຟຟ້າລາວ ມະຫາຊົນ, ບໍລິສັດ ປີໂຕຣລ້ຽມເທຣດດິ້ງ ລາວມະຫາຊົນ, ລາຍງານການອອກຈໍາໜ່າຍຫລັກຊັບ ແລະ ການກະກຽມອອກຈໍາໜ່າຍ ຫລັກຊັບ ຢູ່ຕະຫລາດຫລັກຊັບລາວ ຂອງ 7 ບໍລິສັດ, ລາຍງານຄວາມຄືບໜ້າ ການສ້າງບັນຊີລາຍຊື່ເປົ້າໝາຍ ບໍລິສັດຈົດທະບຽນ ແລະ ລາຍງານບັນຫາອື່ນໆ ແລະ ທິດທາງແຜນການ ກະກຽມສະໝັກ ເຂົ້າເປັນສະມາຊິກ ຂອງອົງການຄຸ້ມຄອງ ວຽກງານຫລັກຊັບສາກົນ (IOSCO​) ແລະ ລາຍງານສະພາບການ ຊື້-ຂາຍຫຸ້ນ ປະຈໍາ 6 ເດືອນຕົ້ນປີ 2017ຂອງຕະຫລາດຫລັກຊັບລາວ.

ແຫຼ່ງຂ່າວ: ຂປລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com
ກົດພາບອ່ານລາຍລະອຽດ

ກົດພາບອ່ານລາຍລະອຽດ

No comments

Powered by Blogger.