Header Ads

ມອບ-ຮັບ ໂຄງການກໍ່ສ້າງ ແລະເປີດນຳໃຊ້ດ່ານດາກຕະອອກ,ເມືອງດາກຈຶງ,ແຂວງເຊກອງ



ວັນທີ 12 ກໍລະກົດ 2017 ຜ່ານມານີ້ ທີ່ດ່ານດາກຕະອອກ,ເມືອງດາກຈຶງ,ແຂວງເຊກອງ ໄດ້ຈັດພິທີມອບ-ຮັບ ແລະ ເປີດນຳໃຊ້ ໂຄງການກໍ່ສ້າງດ່ານດາກຕະອອກ,ເມືອງດາກຈຶງ,ແຂວງເຊກອງໂດຍການເຂົ້າຮ່ວມຂອງ ທ່ານ ສີດາ ສຸວັນນະສາຍ ຮອງເລາພັກແຂວງ, ຮອງເຈົ້າແຂວງໆເຊກອງ, ທ່ານ ຮວ່ຽນ ແຄ່ງ ຕວ່ານ ຮອງປະທານຄະນະກຳມະການປະຊາຊົນແຂວງກວາງນາມ, ມີທ່ານ ຄຳແສງ ພົມາແສງ ຫົວໜ້າກົງສຸນໃຫຍ່ແຫ່ງ ສປປ ລາວ ປະຈຳນະຄອນດາໜັງພ້ອມຂະແໜງການກ່ຽວຂ້ອງທັງ 2 ຝ່າຍເຂົ້າຮ່ວມ.


ທ່ານ ຫງວຽນ ຫິວ ຖັງ ຫົວໜ້າກອງບັນຊາການທະຫານຊາຍແດນ ແຂວງກວ່າງນາມ ກ່າວລາຍງານວ່າ: ໂຄງການກໍ່ສ້າງດ່ານດາກຕະອອກ,ເມືອງດາກຈຶງແຂວງເຊກອງ,ແມ່ນໂຄງການຮ່ວມມືລະຫວ່າງ ລັດຖະບານ ສປປ ລາວ ແລະລັດຖະບານ ສສ ຫວຽນາມ, ໂດຍແມ່ນທຶນຊ່ວຍເຫຼືອລ້າ 100% ຈາກລັດຖະບານຫວຽດນາມ, ເຊິ່ງໄດ້ອານຸມັດທຶນໃນເດືອນ ພຶດສະພາ ປີ 2014 ແລະມອບໃຫ້ແຂວງເຊກອງເປັນຜູ້ປະສານງານ,ຄຸ້ມຄອງໂຄງການຮ່ວມກັບ ສສ ຫວຽດນາມ, ໂດຍສະເພາະກອງບັນຊາການທະຫານຊາຍແດນແຂວງກວາງນາມທີ່ເປັນເຈົ້າຂອງໂຄງການ, ໂຄງການກໍ່ສ້າງດ່ານ ດາກຕະອອກໄດ້ເລີ່ມລົງມືກໍ່ສ້າງມາແຕ່ເດືອນທັນວາປີ 2014 ,ໂດຍ ແມ່ນບໍລິສັດດ້າຍຮົງຟຸກ ເປັນຜູ້ຮັບ ເໝົາກໍ່ສ້າງມູນຄ່າທັງໝົດ 48 ຕື້ກວ່າດົ້ງ,ມີໄລຍະການກໍ່ສ້າງ 2 ປີ, ເປັນປະເພດອາຄານ 2 ຊັ້ນຊົງລາວ ທີ່ມີເອກະລັກສະເພາະ ມີເນື້້ອທີ່ໂຄງການທັງໝົດ 1,300 ແມັດກາເລ ເຊິ່ງປະກອບມີ ວຽກດິນຕັດດິນຖົມ, ວຽກອາຄານດ່ານ, ວຽກກໍ່ສ້າງຫ້ອງນ້ຳລວມນອກອາຄານ, ວຽກພາກສະໜາມ-ສວນດອກໄມ້, ລະບົບເສັ້ນທາງເບຕົງ ແລະ ຮອງລະບາຍນ້ຳ, ວຽກຕິດຕັ້ງໝໍ້ແປງ ແລະ ລະບົບລະບົບໄຟຟ້າ-ໄຟເຍືອງທາງ ແລະ ວຽກກໍ່ສ້າງປ່ອງກວດກາຄົນເຂົ້າ-ອອກເມືອງ, ມາຮອດປະຈຸບັນໜ້າວຽກທັງໝົດແມ່ນກໍ່ສ້າງສຳເລັດແລ້ວ 100%, ໂຄງການນີ້ແມ່ນມີຄວາມໝາຍຄວາມສຳຄັນເປັນຢ່າງຍິ່ງລະຫວ່າງສອງຊາດລາວ-ຫວຽດນາມ,ເພື່ອເປັນການອຳນວຍຄວາມສະດວກໃຫ້ແກ່ປະຊາຊົນທັງສອງປະເທດ,ເວົ້າລວມ,ເວົ້າສະເພາະແມ່ນ 2 ແຂວງເຊກອງ-ກວາງນາມ ໃນການໄປມາຫາສູ່ ແລກປ່ຽນຊື້ຂາຍສິນຄ້າງນຳກັນ, ພ້ອມທັງເສີມຂະຫຍາຍການພົວພັນຮ່ວມມືຮອບດ້ານ ແລະ ຮັດແໜ້ນສາຍພົວພັນມິດຕະພາບ,ຄວາມສາມັກຄີແບບພິດເສດຂອງ 2 ຊາດໃຫ້ຮຸ່ງເຮືອງສີວິໄລໄປພ້ອມໆກັນ,ທັງເປັນການກະກຽມຂຳນັບຮັບຕ້ອນວັນເຊັນສົນທິສັນຍາຮ່ວມມືຮອບດ້ານ ລາວ-ຫວຽດນາມ ຄົບຮອບ 40 ປີ (18 ກໍລະກົດ 1977-18 ກໍລະກົດ 2017 ) ແລະ ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 55 ປີ ( 5 ກັນຍາ 1962-5 ກັນາຍາ 2017 ) ໃຫ້ເປັນຂະບວນຟົດຟື້ນ.

ໃນຕອນທ້າຍຂອງພິທີກໍ່ໄດ້ມີການເຊັນບົດບັນທຶກມອບ-ຮັບໂຄງການດັ່ງກ່້າວຢ່າງເປັນທາງການຂອງທັງສອງຝ່າຍ ຝ່າຍແຂວງເຊກອງໂດຍແມ່ນ ທ່ານ ສີດາ ສຸວັນນະສາຍ ,ຮອງເຈົ້າແຂວງໆເຊກອງ, ຝ່າຍແຂວງກວາງນາມ ໂດຍແມ່ນທ່ານ ຮວ່ຽນ ແຄ່ງ ຕວ່ານ ຮອງປະທານຄະນະກຳມະການປະຊາຊົນແຂວງກວາງນາມ, ຮ່ວມເຊັນບົດບັນທຶກ ໂດຍມີຂະ ແໜງການກ່ຽວຂ້ອງທັງ 2 ຝ່າຍເຂົ້າຮ່ວມເປັນສັກຂີພິຍານ.

ຂ່າວ: ທິດສາຄອນ ວົງມະນີ/ ນັກຂ່າວແຂວງເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.