Header Ads

ຮອງນາຍົກ ຊຸກຍູ້ວຽກງານ ການຈັດເກັບລາຍຮັບ ຢູ່ແຂວງບໍລິຄຳໄຊ



ໃນ​ວັນ​ທີ 16-17 ກໍລະກົດ ນີ້ ທ່ານ ​ສົມ​ດີ ດ​ວງດີ ຮອງ​ນາຍົກລັດຖະມົນຕີ ລັດຖະ ມົນຕີ ກະຊວງ​ການ​ເງິນ, ພ້ອມ​ດ້ວຍ​ຄະນະ ​ໄດ້​ເຄື່ອນ​ໄຫວ​ຢ້ຽມຢາມ​ ແລະ​ ຊຸກຍູ້​ວຽກງານການ​ຈັດ​ເກັບ​ລາຍ​ຮັບ​ ເຂົ້າ​ງົບປະມານ ຢູ່​ແຂວງບໍລິ​ຄຳ​ໄຊ, ໂດຍ​ການ​ຕ້ອນຮັບ​ຈາກ​ ທ່ານ ບຸນ​ເສັງ ປະ​ທຳ​ມະ​ວົງ ຮອງ​ເຈົ້າ​ແຂວງ ບໍລິ​ຄຳ​ໄຊ, ມີຫົວໜ້າພະ​ແນ​ກການ​ເງິນ​ແຂວງ, ​ເຈົ້າ​ເມືອງ, ​ບັນດາພະ​ແນ​ກການ ​ແລະ ພະນັກງານ​ຫລັກ​ແຫ​ລ່ງ​ເຂົ້າ​ຮ່ວມ.

ທ່ານ ຄຳ​ແຫວນ ປັນຍາ​ນຸວົງ ຫົວໜ້າພະ​ແນ​ກການ​ເງິນ ​ແຂວງ​ບໍລິ​ຄຳ​ໄຊ ​ເປີດ​ເຜີຍ​ວ່າ: ຜ່ານ​ການຈັດ​ຕັ້ງ​ປະຕິບັດ​ ແຜນ​ງົບປະມານ​ແຫ່ງ​ລັດ 6 ​ເດືອນ​ຕົ້ນ​ປີ 2017 ຜ່ານມາ, ພາຍ​ໃຕ້​ການ​ຊີ້​ນຳ​ນຳພາ​ ຂອງ​ອົງການ​ປົກຄອງ​ແຂວງ​ ເຮັດ​ໃຫ້ການ​ຈັດ​ຕັ້ງ​ປະຕິບັດ​ ບັນລຸ​​ໄດ້​ຫລາຍ​ຄາດໝາຍ​ ເຮັດ​ໃຫ້​ງົບປະມານ​ ໃນ​ໄລຍະ​ທີ່​ຜ່ານ​ມາ ​ມີ​ຄວາມ​ຄ່ອງ​ຕົວ​ດີ​ພໍ​ສົມຄວນ ​ເຊິ່ງປະຕິບັດ​ໄດ້ 378 ຕື້​ກີບ, ​ເທົ່າ​ກັບ 137,55% ຂອງ​ແຜນການ. ​ສຳລັບລາຍ​ຮັບ​ພູດ​ສູນ​ກາງ ປະຕິບັດ​ໄດ້ 283 ຕື້​ກີບ, ເທົ່າ​ກັບ 146,04%, ​ໃນ​ນັ້ນ​ ລາຍ​ຮັບ​ພາສີ​ ປະຕິບັດ​ໄດ້ 280 ຕື້​ ເທົ່າ​ກັບ 144,57% ຂອງ​ແຜນການ​. ສະ​ເພາະ​ດ່ານ​ພາສີ​ສາກົນ ​ປາກ​ຊັນ ​ແຜນການ 6 ​ເດືອນ​ຕົ້ນ​ປີ ປະຕິບັດ​ໄດ້ 89 ຕື້​ກີບ ​ເທົ່າ​ກັບ 204,09%​ ຂອງ​ແຜນການ, ດ່ານ​ພາສີ​ສາກົນ​ນ້ຳ​ພາວ ປະຕິບັດ​ໄດ້ 183 ຕື້​ກີບ​ ​ເທົ່າ​ກັບ 125,25% ຂອງ​ແຜນການ, ກອງ​ກວດກາ​ພາສີ ​ປະຕິບັດ​ໄດ້ 7 ຕື້​ກີບ, ​ເທົ່າ​ກັບ 206,07%, ຄ່າ​ທຳນຽມ ປະຕິບັດ​ໄດ້ 479 ຕື້​ກີບ ​ເທົ່າ​ກັບ 165,39%. 

ສ່ວນລາຍ​ຮັບ​ ຈາກ​ການ​ຂາຍ​ໄມ້ ປະຕິບັດ​ໄດ້ 2 ຕື້​ກວ່າ​ກີບ, ຄຸ້ມ​ຄອງ​ລັດ​ວິ​ສາ​ຫະກິດ (ຕົ້ນ​ທຶນ-ດອກ​ເບ້ຍ) ປະຕິບັດ​ໄດ້ 31 ຕື້​ກວ່າ​ກີບ, ລາຍ​ຮັບ​ພູດ​ທ້ອງ​ຖິ່ນ ປະຕິບັດ​ໄດ້ 94 ຕື້​ກີບ ​ເທົ່າ​ກັບ 117,12%, ສ່ວຍ​ສາ​ອາກອນ ປະຕິບັດ​ໄດ້ 80 ຕື້​ກີບ ​ເທົ່າ​ກັບ 116,87%, ຊັບ​ສິນປະຕິບັດ​ໄດ້ 3 ຕື້​ກວ່າ​ກີບ​ເທົ່າ​ກັບ 95,11% ​ແລະ ຄຸ້ມ​ຄອງ​ລັດ​ວິ​ສາ​ຫະກິດ ປະຕິບັດ​ໄດ້ 65 ຕື້​ກີບ. ​ໃນ​ຂະນະ​ທີ່ດ້ານ​ລາຍ​ຈ່າຍ​ແຜນການ 6 ​ເດືອ​ນຕົ້ນ​ປີ 258 ຕື້​ກີບ, ປະຕິບັດ​ໄດ້ 229 ຕື້​ກີບ ​ເທົ່າ​ກັບ 88,51% ​ໃນ​ນີ້​ລາຍ​ຈ່າຍ​ປົກກະຕິ​ ​ປະຕິບັດ​ໄດ້ 221 ຕື້​ກີບ, ​ເທົ່າ​ກັບ 88,02%.

ຫົວໜ້າພະ​ແນ​ກການ​ເງິນ ​ແຂວງ​ບໍລິ​ຄຳ​ໄຊ ກ່າວຕື່ມວ່າ: ​ການຈັດ​ຕັ້ງ​ປະຕິບັດ ​ເກັບ​ລາຍ​ຮັບ​ເຂົ້າ​ງົບປະມານ 6 ​ເດືອນ​ຕົ້ນ​ປີ 2017 ​ໃນ​ທົ່ວ​ແຂວງ​ ແມ່ນ​ສາມາດ​ຈັດ​ເກັບ​ໄດ້​ເກີນ ​ແຜນລວມທັງ​ພູດ​ສູນ​ກາງ ​ແລະ ທ້ອງ​ຖິ່ນ, ປັດ​ໄຈທີ່ສາມາດ ຈັດເກັບລາຍຮັບໄດ້ລື່ນແຜນ ​ເນື່ອງຈາກວ່າພູດສູນກາງ ໄດ້ຈາກ ພາສີ-ອາກອນຂາເຂົ້າ ປະເພດພາຫະນະ ແລະ ນ້ຳມັນເຊື້ອໄຟເພີ່ມຂື້ນ. ສ່ວນ​ລາຍ​ຮັບ​ພູດ​ທ້ອງ​ຖິ່ນ​ ໄດ້​ຈາກ​​ກຸ່ມ​ເຂຶ່ອນ​ໄຟຟ້າ​ນ້ຳຕົກ ກວມ​ເອົາ 17,55%, ກຸ່ມ​ໄຟຟ້າ ​ສາຍ​ສົ່ງ​ກວມ​ເອົາ 13,29%, ກຸ່ມ​ກໍ່ສ້າງ​​ໄຟຟ້າ​ສ້ອມ​ແປງ ກວມ​ເອົາ 12,34% ​ແລະ ກຸ່ມ​ນ້ຳມັນ​ເຊື້ອ​ໄຟ ກວມ​ເອົາ 6,66%.

 ໂອກາດ​ນີ້, ຮອງ​ນາຍົກລັດຖະມົນຕີ ໄດ້​ເນັ້ນໜັກ​ໃຫ້​ຄະນະ​ພັກ, ຄະນະ​ນຳ​ຂອງ​ແຂວງ​ ໂດຍ ສະເພາະ ແມ່ນພະແນກການເງິນຂອງແຂວງ ​ເອົາ​ໃຈ​ໃສ່​ຊີ້​ນຳແຜນ​ງານ​ ເກັບ​ລາຍ​ຮັບ​ເຂົ້າ​ງົບປະມານ, ການ​ພັດທະນາ​ຂອງ​ແຂວງ ​ໃຫ້​ຕໍ່​ເນື່ອງ, ພື້ນຖານ​ການ​ຜະລິດ ​ກະ​ສິ​ກຳ-ປ່າ​ໄມ້​, ການ​ບໍລິການການທ່ອງທ່ຽວທາງ​ຜ່ານ ລະ​ຫວ່າງ​ປະ​ເທດ​ ໂດຍ​ສະ​ເພາະ ​ເຂດ​ພັດທະນາ​ ເສດຖະກິດ​ສະ​ເພາະ​ ດ່າ​ນສາກົນ​ປາກ​ຊັນ ​ການ​ນຳ​ເຂົ້າ​ພາຫະນະ​ລົດ, ນ້ຳມັນ​ເຊື້ອ​ໄຟ, ການ​ນຳ​ໃຊ້​ງົບປະມານ ​​ຖືກຕ້ອງ​ຕາມ​ຮ່ວງ​ທີ່​ງົບປະມານ​ຈັດ​ໃຫ້, ການກວດ​ສອບ​ລາຍ​ຮັບ ​ໃຫ້​ຖືກຕ້ອງ​ຕາມ​ຄວາມ​ເປັນ​ຈິງ ​ແລະ ຖືກຕ້ອງ​ຕາມ​ລະບຽບກົດໝາຍ, ລາຍ​ຮັບ​ທີ່​ຖືກ​ຈົດ​ກ່າຍ ​ແລະ ຈົດ​ເຂົ້າ​ງົບປະມານ, ການ​ສ້າງ​ຄວາມ​ເຂັ້ມ​ແຂງ​ໃນ​ການ​ເບີກ​ຈ່າຍ​ຂອງ​ແຂວງ ​ແລະ​ ລົດ​ນຳ​ເຂົ້າ​ທີ່​ບໍ່​ຖືກຕ້ອງ.

ພາບ-ຂ່າວ: ນັກຂ່າວກະຊວງການເງິນ/ ຂປລ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.