Header Ads

ທ່ານຮອງນາຍົກເນັ້ນດ່ານພາສີສາງທ່ານາແລ້ງ ເອົາໃຈໃສ່ຕິດຕາມ ບັນຫາລົດຄ້າງສາງ ແລະ ການນໍາເຂົ້ານໍ້າມັນເຊື້ອໄຟ,

ທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ໄດ້ລົງເຄື່ອນໄຫວຢ້ຽມຢາມ ແລະ ຊຸກຍູ້ວຽກງານຢູ່ລັດວິສາຫະກິດ ລາວບໍລິການສິນຄ້າຜ່ານແດນ (ລລບສ) ແລະ ດ່ານພາສີສາງທ່ານາແລ້ງ ນະຄອນຫຼວງວຽງຈັນໃນທ້າຍອາທິດຜ່ານມາ.

ທ່ານ ຄຳແພງ ສີສະຫງ່າ ຜູ້ອຳນວຍການໃຫຍ່ລັດວິສາຫະກິດລາວບໍລິການສິນຄ້າຜ່ານແດນໄດ້ລາຍງານໂດຍສັງເຂບກ່ຽວກັບການຈັດຕັ້ງປະຕິບັດວຽກງານຂອງ ລລບສ ໃຫ້ຊາບວ່າ: ໃນປີ 2017 ລັດວິສາຫະກິດລາວບໍລິການສິນຄ້າຜ່ານແດນ ໄດ້ວາງເປົ້າໃນການເກັບລາຍຮັບຂອງ ລລບສ 40 ຕື້ກີບ, ແຕ່ຜ່ານການຈັດຕັ້ງປະຕິບັດໃນໄລຍະ 6 ເດືອນຕົ້ນປີ 2017 ສາມາດມີລາຍຮັບທັງໝົດປະມານ 22-23 ຕື້ກີບ, ຖ້າທຽບໃສ່ 6 ເດືອນຕົ້ນປີ 2016 ມີລາຍຮັບເພີ່ມຂຶ້ນປະມານ 30-40%. 

ຄຽງຄູ່ກັນນີ້, ລລບສ ຍັງໄດ້ປະສານສົມກັບດ່ານພາສີສາງທ່ານາແລ້ງໃນການຕິດຕາມກວດກາສິນຄ້າຜ່ານເຂົ້າມາ ແລະ ອື່ນໆເພື່ອໃຫ້ສອດຄ່ອງກັບສະພາບຕົວຈິງ. 

ຂະນະທີ່ ທ່ານ ວົງວັນເພັງ ພູມສະຫວັນ ຫົວໜ້າດ່ານພາສີສາງທ່ານາແລ້ງ ໄດ້ລາຍວ່າ: ບັນຊີພາຫະ ນະຄ້າງສາງ, ມາຮອດປັດຈຸບັນຄະນະຮັບຜິດຊອບວຽກງານລົງກວດກາເບີ່ງຕົວຈິງ ແລະ ໄດ້ແຍກເປັນແຕ່ລະບໍລິ ສັດ, ຜ່ານການລົງຕິດຕາມກວດກາເບິ່ງຕົວຈິງລົດທີ່ຍັງຄ້າງສາງມີ 1.160 ຄັນ, ຊຶ່ງສ່ວນໃຫຍ່ຈະເປັນລົດໝູນວຽນທີ່ນຳເຂົ້າມາລໍຖ້າເສຍພາສີ, ສ່ວນລົດກາຍກຳນົດມີ 44 ຄັນ, ບັນຊີຄ້າງສາງກາຍ 04 ເດືອນມີຈໍານວນ 198 ຄັນ.

ໂອກາດນີ້,  ທ່ານ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານຂອງ ລລບສ ແລະ ດ່ານພາສີສາງທ່ານາແລ້ງ ໂດຍສະເພາະແມ່ນ ລລບສ ຕ້ອງໄດ້ເອົາໃຈໃສ່ປັບປຸງຂອດການບໍລິການ, ເພື່ອໃຫ້ທ່ວງທັບກັບເວລາ, ປະສານສົມກັບພາກສ່ວນກ່ຽວຂ້ອງໂດຍສະເພາະດ່ານພາສີສາງທ່ານາແລ້ງ ເພື່ອອຳນວຍຄວາມສະດວກສະບາຍຂອງຜູ້ມາໃຊ້ບໍລິການ, ສ່ວນດ່ານພາສີສາງທ່ານາແລ້ງ   ຕ້ອງໄດ້ເອົາໃຈໃສ່ໃນການຕິດຕາມ.

ບັນຫາລົດຄ້າງສາງ, ບັນຫາການນໍາເຂົ້ານໍ້າມັນເຊື້ອໄຟ, ການນໍາເຂົ້າສິນຄ້າ ແລະ ການລັກລອບສິນຄ້າໜີພາສີ, ເອົາໃຈໃສ່ຕິດຕາມອ້າຍນ້ອງພະນັກງານພາສີເພື່ອຫລີກລຽງບັນຫາຫາງສຽງດ້ານລົບຈາກສັງຄົມ, ຕິດຕາມຢ່າງໃກ້ສິດໃນການເກັບອາກອນມູນຄ່າເພີ່ມ 10% ຢູ່ດ້ານພາສີສາກົນຂົວມິດຕະພາບລາວ-ໄທ ແຫ່ງທີ 1 ແລະ ບັນຫາອື່ນໆ.
ນອກຈາກນີ້, ທ່ານ ຮອງນາຍົກລັດຖະມົນຕີ ໄປຢ້ຽມຊົມ ແລະ ຕິດຕາມບັນຫາລົດຂົນສົ່ງເຂົ້າ-ອອກສາງທ່ານາແລ້ງ, ສາງເກັບມ້ຽງສິນຄ້າ, ການບໍລິການຂອງ ລລບສ  ແລະ ຖ່າຍຮູບລວມເປັນທີ່ລະນຶກ.
-------------
       ແຫຼາງຂ່າວຈາກກະຊວງການເງິນ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.