Header Ads

ສອງລັດຖະມົນຕີ ຕປທ ລາວ-ອິນໂດເນເຊຍພົບປະກັນຢູ່ຈາກາຕາ



ໂດຍຕອບສະໜອງຕາມຄຳເຊີນຂອງ ທ່ານ ນາງ ເລັດໂນ ມາຊຸດີ (Mrs. Retno L.P. Marsudi), ລັດຖະມົນຕີກະຊວງການຕ່າງປະເທດແຫ່ງ ສາທາລະນະລັດ ອິນໂດເນເຊຍ, ທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ (ຕປທ) ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ພ້ອມດ້ວຍຄະນະ ໄດ້ເດີນທາງຢ້ຽມຢາມ ສ. ອິນໂດເນເຊຍ ຢ່າງເປັນທາງການ ລະຫວ່າງວັນທີ 26-28 ກໍລະກົດ 2017 ເຊິ່ງເປັນການຢ້ຽມຢາມຄັ້ງທຳອິດ ນັບແຕ່ດຳລົງຕຳແໜ່ງເປັນ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ.


ການຢ້ຽມຢາມຄັ້ງນີ້ໄດ້ເປັນຂີດໝາຍອັນສຳຄັນໃນການເສີມຂະຫຍາຍ ແລະ ຮັດແໜ້ນສາຍພົວພັນມິດຕະພາບ ແລະ ການຮ່ວມມືອັນດີງາມ ທີ່ມີມາແຕ່ດົນນານ ລະຫວ່າງສອງປະເທດ ໃຫ້ນັບມື້ນັບແໜ້ນແຟ້ນຂຶ້ນເລື້ອຍໆ ແລະ ກໍເປັນປີຄົບຮອບ 60 ປີ ແຫ່ງການສ້າງຕັ້ງສາຍພົວພັນການທູດນໍາກັນ ລະຫວ່າງ ສປປ ລາວ ແລະ ອິນໂດເນເຊຍ.

ໃນວັນທີ 27 ກໍລະກົດ 2017, ທ່ານ ລັດຖະມົນຕີ ສະເຫຼີມໄຊ ກົມມະສິດ ໄດ້ພົບປະສອງຝ່າຍກັບຄູ່ຮ່ວມຕໍາແໜ່ງ ກັບ ທ່ານ ນາງ ເລັດໂນ ມາຊຸດີ ເຊິ່ງທັງສອງລັດຖະມົນຕີກໍໄດ້ເປັນປະທານຮ່ວມໃນກອງປະຊຸມຄະນະກຳມາທິການຮ່ວມວ່າດ້ວຍການຮ່ວມມືສອງຝ່າຍ (JCBC) ລາວ-ອິນໂດເນເຊຍ ຄັ້ງທີ 5 ຈັດຂຶ້ນທີ່ກະຊວງການຕ່າງປະເທດ ອິນໂດເນເຊຍໃນນະຄອນຈາກາຕາ ປະເທດອິນໂດເນ. ໃນໂອກາດນີ້, ສອງຝ່າຍໄດ້ແຈ້ງສະພາບການພັດທະນາເສດຖະກິດ-ສັງຄົມ ໂດຍຫຍໍ້ ຂອງປະເທດຕົນໃຫ້ກັນຊາບ, ພ້ອມທັງໄດ້ທົບທວນຄືນການພົວພັນຮ່ວມມືສອງຝ່າຍ ລາວ-ອິນໂດເນເຊຍ ໃນໄລຍະຜ່ານມາ ແລະ ປຶກສາຫາລືກັນ ກ່ຽວກັບແຜນການຮ່ວມມືໃນອະນາຄົດ, ໂດຍສະເພາະແມ່ນການຮ່ວມມືທາງດ້ານການເມືອງ ເປັນຕົ້ນແຜນການຢ້ຽມຢາມ ສ.ອິນໂດເນເຊຍ ຢ່າງເປັນທາງການຂອງທ່ານນາຍົກລັດຖະມົນຕີແຫ່ງ ສປປ ລາວ ໃນທ້າຍປີ 2017, ດ້ານວຽກງານປ້ອງກັນຊາດ ແລະ ປ້ອງກັນຄວາມສະຫງົບ, ດ້ານການສຶກສາ, ໂທລະຄົມມະນາຄົມ ແລະ ການສື່ສານ, ດ້ານການຄ້າ ແລະ ການລົງທຶນ, ການພົວພັນດ້ານທະນາຄານ, ການຮ່ວມມືດ້ານໂຍທາທິການ ແລະ ຂົນສົ່ງ, ແລະ ດ້ານກະສິກໍາ ໂດຍສະເພາະການຮ່ວມມືໃນດ້ານການຄົ້ນຄວ້າການຜະລິດ ແລະ ສະໜອງຝຸ່ນນໍາໃຊ້ໃນຂະແໜງກະສິກໍາ. ພ້ອມນັ້ນ, ສອງຝ່າຍເຫັນດີຈະວາງແຜນຂະຫຍາຍການແລກປ່ຽນວັດທະນະທໍາ ແລະ ສົ່ງເສີມການທ່ອງທ່ຽວສອງຝ່າຍ.
ຂອບການຮ່ວມມືຫລາຍຝ່າຍ, ທັງສອງລັດຖະມົນຕີໄດ້ຢໍ້າຄືນຄໍາໝັ້ນສັນຍາຂອງຕົນທີ່ຈະສົ່ງເສີມປະຊາຄົມ ອາຊຽນ ແລະ ເປົ້າໝາຍຂອງອາຊຽນ ກ່ຽວກັບການຮັກສາສັນຕິພາບ, ຄວາມໝັ້ນຄົງ ແລະ ສະຖຽນລະພາບຢູ່ໃນຂົງເຂດ ແລະ ໃນໂລກ. ນອກຈາກນັ້ນ, ສອງຝ່າຍໄດ້ເຫັນດີທີ່ຈະສືບຕໍ່ສະໜັບສະໜູນເຊິ່ງກັນ ແລະ ກັນ ໃນການສະໝັກເຂົ້າເປັນສະມາຊິກ ໃນກອບອົງການສະຫະປະຊາຊາດ ແລະ ອົງການສາກົນຕ່າງໆ, ພ້ອມທັງໄດ້ແລກປ່ຽນຄຳຄິດຄຳເຫັນນຳກັນ ກ່ຽວກັບສະພາບການພົ້ນເດັ່ນ ໃນພາກພື້ນ ແລະ ສາກົນ ທີ່ທັງສອງຝ່າຍມີຄວາມສົນໃຈຮ່ວມກັນ.



ສອງລັດຖະມົນຕີໄດ້ຕີລາຄາສູງຕໍ່ສາຍພົວພັນມິດຕະພາບອັນເປັນມູນເຊື້ອ ທີ່ມີມາແຕ່ດົນນານ ລະຫວ່າງປະຊາຊົນສອງຊາດ ແລະ ການຮ່ວມມືອັນດີງາມ ລະຫວ່າງສອງປະເທດ ທີ່ໄດ້ຮັບການພັດທະນາ ແລະ ຂະຫຍາຍຕົວດີຂຶ້ນເລື້ອຍໆໂດຍເຫັນໄດ້ຈາກ ສອງປະເທດມີການແລກປ່ຽນການຢ້ຽມຢາມນຳກັນຢ່າງເປັນປົກກະຕິ ລະຫວ່າງຜູ້ແທນຂັ້ນສູງ ຈົນຮອດລະດັບວິຊາການໃນຂະແໜງການຕ່າງໆ.

ສອງຝ່າຍໄດ້ສະແດງຄວາມຊົມເຊີຍທີ່ສອງປະເທດ ໄດ້ບັນລຸການລົງນາມໃນບົດບັນທຶກຄວາມເຂົ້າໃຈ ລະຫວ່າງກອງທຶນປົກປ້ອງຜູ້ຝາກເງິນ, ທະນາຄານແຫ່ງຊາດລາວ ກັບ ປະກັນໄພເງິນຝາກອິນໂດເນເຊຍ ໃນລະຫວ່າງວັນທີ 17-21 ກໍລະກົດ 2017 ຜ່ານມາ ແລະ ໄດ້ເອົາໃຈໃສ່ກະກຽມຈັດກິດຈະກຳຕ່າງໆເຊັ່ນ: ການແລກປ່ຽນການຢ້ຽມຢາມຂອງການນໍາຂັ້ນສູງ, ການແລກປ່ຽນທາງດ້ານວັດທະນະທໍາ, ການປາຖະກະຖາ, ການວາງສະແດງສິນຄ້າ ແລະ ຮູບພາບ ລວມທັງການຈັດໃຫ້ມີການພົບປະລະຫວ່າງນັກທຸລະກິດ ເພື່ອຈະສະເຫລີມສະຫລອງ ຄົບຮອບ 60 ປີ (30 ສິງຫາ 1957-30 ສິງຫາ 2017) ແຫ່ງການສ້າງຕັ້ງສາຍພົວພັນການທູດ ລະຫວ່າງ ສປປ ລາວ ແລະ ສ. ອິນໂດເນເຊຍ.

ໃນໂອກາດນີ້, ທ່ານ ສະເຫຼີມໄຊ ກົມມະສິດ ໄດ້ສະແດງຄວາມຂອບໃຈໃນການຕ້ອນຮັບອັນອົບອຸ່ນ ແລະ ສົມກຽດ ຕໍ່ການຢ້ຽມຢາມອິນໂດເນເຊຍ ຂອງທ່ານໃນຄັ້ງນີ້, ພ້ອມທັງໄດ້ສະແດງຄວາມຂອບໃຈຕໍ່ລັດຖະບານ ສ. ອິນໂດເນເຊຍ ທີ່ໃຫ້ການຊ່ວຍເຫລືອດ້ານການພັດທະນາຊັບພະຍາກອນມະນຸດ ໃນຂະແໜງການປ້ອງກັນຊາດ ແລະ ປ້ອງກັນຄວາມສະຫງົບ, ການສຶກສາ, ໂທລະຄົມມະນາຄົມ ແລະ ການສື່ສານ ແລະ ຂະແໜງການອື່ນໆໃນໄລຍະຜ່ານມາ, ລວມທັງການສະໜັບສະໜູນ ສປປ ລາວ ໃນການເປັນປະທານອາຊຽນ ໃນປີ 2016 ຜ່ານມາ ໃຫ້ສຳເລັດຢ່າງຈົບງາມ.
ໃນໂອກາດດຽວກັນ, ທ່ານ ນາງ ເລັດໂນ ມາຊຸດີ ກໍໄດ້ສະແດງຄວາມຍິນດີຕ້ອນຮັບຕໍ່ການຢ້ຽມຢາມ ສ.ອິນໂດເນເຊຍ ຂອງທ່ານລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ຄະນະໃນຄັ້ງນີ້, ພ້ອມທັງໄດ້ສະແດງຂອບໃຈ ລັດຖະບານ ສປປ ລາວ ຕໍ່ການສະໜັບສະໜູນ ສ. ອິນໂດເນເຊຍ ໃນການສະໝັກເລືອກຕັ້ງເປັນປະທານອົງການ ແລະ ສະມາຊິກອົງການຕ່າງໆ ໃນກອບອົງການສະຫະປະຊາຊາດ ຂອງອິນໂດເນເຊຍ ໃນໄລຍະຜ່ານມາ.
ໃນຕອນທ້າຍຂອງກອງປະຊຸມ, ທ່ານ ສະເຫຼີມໄຊ ກົມມະສິດ ໄດ້ເຊື້ອເຊີນ ທ່ານລັດຖະມົນຕີກະຊວງການຕ່າງປະເທດ ອິນໂດເນເຊຍ ພ້ອມຄະນະ ມາຢ້ຽມຢາມ ແລະ ເຂົ້າຮ່ວມກອງປະຊຸມຄະນະກຳມະການຮ່ວມ ວ່າດ້ວຍການຮ່ວມມືສອງຝ່າຍ ລາວ-ອິນໂດເນເຊຍ ຄັ້ງທີ 6 ທີ່ ສປປ ລາວ ໃນປີ 2019.

ພາຍຫລັງສຳເລັດການພົບປະ, ສອງລັດຖະມົນຕີກະຊວງການຕ່າງປະເທດກໍ່ໄດ້ຮ່ວມເປີດປ້າຍກາໝາຍ 60 ປີແຫ່ງການສະເຫລີມສະຫລອງວັນສ້າງຕັ້ງສາຍພົວພັນການທູດ ລາວ-ອິນໂດເນເຊຍ ແລະ ໄດ້ຖະແຫລງຂ່າວຮ່ວມກັນຕໍ່ສື່ມວນຊົນ ກ່ຽວກັບ ຜົນຂອງກອງປະຊຸມຄະນະກຳມະການຮ່ວມ ວ່າດ້ວຍການຮ່ວມມືສອງຝ່າຍ ລາວ-ອິນໂດເນເຊຍ ຄັ້ງທີ 5 ຢູ່ ສ. ອິນໂດເນເຊຍ ໃນຄັ້ງນີ້.

ໃນໂອກາດຢ້ຽມຢາມ ສ. ອິນໂດເນເຊຍ ໃນຄັ້ງນີ້, ທ່ານສະເຫຼີມໄຊ ກົມມະສິດ ແລະ ຄະນະ ຍັງໄດ້ເຂົ້າຢ້ຽມຂໍ່ານັບ ພະນະທ່ານ ມູຮຳມັດ ຈຸຊຸບ ຄາລາ (Muhammad Jusuf Kalla), ຮອງປະທານາທິບໍດີ ແຫ່ງ ສ. ອິນໂດເນເຊຍ, ທີ່ ທຳນຽບຮອງປະທານາທິບໍດີ. ໃນໂອກາດນີ້, ທ່ານລັດຖະມົນຕີກະຊວງການຕ່າງປະເທດລາວ ໄດ້ນຳເອົາຄວາມຍື້ຢາມຖາມຂ່າວຈາກ ພະນະທ່ານ ພັນຄໍາ ວິພາວັນ, ຮອງປະທານປະເທດ ແລະ ພະນະ ທ່ານ ທອງລຸນ ສີສຸລິດ,ນາຍົກລັດຖະມົນຕີ ແຫ່ງ ສປປ ລາວ ເຖິງ ພະນະທ່ານ ຮອງປະທານາທິບໍດີອິນໂດເນເຊຍ, ພ້ອມທັງໄດ້ແຈ້ງໃຫ້ຊາບ ກ່ຽວກັບຜົນສຳເລັດຂອງກອງປະຊຸມຄະນະກຳມະການຮ່ວມ ວ່າດ້ວຍການຮ່ວມມືສອງຝ່າຍ ລາວ-ອິນໂດເນເຊຍ ຄັ້ງທີ 5. ນອກຈາກນັ້ນ, ທ່ານ ສະເຫຼີມໄຊ ກົມມະສິດ ແລະ ຄະນະ ຍັງໄດ້ຢ້ຽມຢາມສູນການສຶກສາ ແລະ ຝຶກອົບຮົມຂອງກະຊວງການຕ່າງປະເທດອິນໂດເນເຊຍ ແລະ ພົບປະກັບບັນດາບໍລິສັດຂອງອິນໂດເນເຊຍ ຈຳນວນໜຶ່ງ.


ທີ່ມາ: ຂປລ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com
ກົດພາບອ່ານລາຍລະອຽດ


ກົດພາບອ່ານລາຍລະອຽດ

No comments

Powered by Blogger.