Header Ads

ເຈົ້າແຂວງຈຳປາສັກ ລົງກວດກາພື້ນທີ່ ໄດ້ຮັບຜົນກະທົບຈາກນໍ້າຖ້ວມ


ຜົນກະທົບຈາກພາຍຸຊົງກາ ທີ່ພັດຜ່ານບັນດາແຂວງພາກໃຕ້ໄດ້ເຮັດໃຫ້ເກີດມີຝົນຕົກແຮງໃນຫຼາຍແຂວງ. ສະເພາະແຂວງຈຳປາສັກ ກໍມີຫຼາຍເມືອງທີ່ໄດ້ຮັບຜົນກະທົບ. ຈາກສະພາບດັ່ງກ່າວ ທ່ານບຸນຖອງ ດີວິໄຊເຈົ້າແຂວງຈຳປາສັກ ກໍໄດ້ລົງເຄື່ອນໄຫວຕິດຕາມກວດກາ ແລະ ຢ້ຽມຢາມບັນດາບ້ານທີ່ໄດ້ຮັບຜົນກະທົບຈາກໄພນ້ຳຖ້ວມ  ໂດຍສະເພາະເຂດບ້ານບຸ່ງຄ້າ, ບ້ານຄີລີ ແລະ ບ້ານດອນແຊ ເມືອງຊະນະສົມບູນ.  

 
ທ່ານ ວົງພະຈັນ ພອນຈິດ ຫົວໜ້າຂະແໜງອຸຕຸນິຍົມ ແລະ ອຸທົກກະສາດ ແຂວງຈຳປາສັກ ຝົນທີ່ຕົກແຮງໃນຕອນເຊົ້າຂອງວັນທີ 26 ກໍລະກົດ ຜ່ານມາ ເຮັດໃຫ້ເກີດນ້ຳຖ້ວມກະທັນຫັນເນື່ອງຈາກປະລິມານ້ຳທີ່ໄຫຼມາຈາກຮ່ອງ, ຫ້ວຍສາຍຕ່າງໆຮ່ວມກັນເຮັດໃຫ້ການລະບາຍ ຫຼື ການໄຫຼຂອງນ້ຳບໍ່ທັນ ຈຶ່ງເກີດມີສະພາບນ້ຳຖ້ວມອັ່ງ, ຖ້ວມຂັງ ແລະ ຖ້ວມຊຸ. 

ພ້ອມກັນນັ້ນ, ຍັງເຮັດໃຫ້ເສັ້ນທາງຮ່ອມບາງບ່ອນ ແລະ ເສັ້ນທາງຫຼັກບາງເສັ້ນຖືກນໍ້າຊຸ ເຊິ່ງສ້າງຄວາມຫຍຸ້ງຍາກໃນການສັນຈອນໄປມາຂອງພໍ່ແມ່ປະຊາຊົນ.  ຂະນະທີ່ພາກສ່ວນຕ່າງໆຂອງແຂວງກໍເລັ່ງໃຫ້ການຊ່ວຍເຫຼືອຜູ້ໄດ້ຮັບຜົນກະທົບ ໄປພ່້ອມກັບການປະເມີນຄວາມເສຍຫາຍໃນເບື້ອງຕົ້ນ.

ນອກນັ້ນທາງແຂວງຍັງໄດ້ອອກແຈ້ງການລະວັງສະພາບຝົນຕົກໜັກໃນໄລຍະວັນທີ 27-28 ກໍລະກົດ ນີ້ ເນື່ອງຈາກອິດທິພົນຂອງພາຍຸຊົງກາ ທີ່ເຄື່ອນເຂົ້າທາງພາກຕາເວັນຕົກສ່ຽງເໜືອຂອງປະເທດໄທ ປັດຈຸບັນໄດ້ກາຍເປັນບໍລິເວນຄວາມກົດອາກາດຕ່ຳຈະມີກຳລັງແຮງເພີ່ມຂຶ້ນ ແລະ ຈະເຄື່ອນທີ່ກັບມາປົກຄຸມຢູ່ເຂດພາກກາງຂອງປະເທດລາວໃນໄລຍະວັນທີ 27-28 ກໍລະກົດ 2017 ນີ້ ແລະ ສົມທົບກັບລົມມໍລະສຸ່ມຕາເວັນຕົກສ່ຽງໃຕ້ພັດປົກຄຸມດ້ວຍກຳລັງແຮງ ເຊິ່ງຈະເຮັດໃຫ້ມີຝົນຕົກໃນລະດັບປານກາງ ຫາ ໜັກ ເປັນບໍລິເວນກວ້າງ. 

ຂະນະທີ່ລະດັບນ້ຳຂອງທີ່ສະຖານີວັດແທກເມືອງປາກເຊ ໃນວັນທີ 27 ກໍລະກົດ ວັດໄດ້ 11,50 ແມັດ ກາຍເຂດລະວັງໄພ 50 ຊັງຕີແມັດ.

ດ້ານກົມອຸຕູຸນິຍົມ ແລະ ອຸທົກກະສາດ ປະເມີນລະດັບນໍ້າຂອງຢູ່ປາກເຊຈະສືບຕໍ່ເພີ່ມຂຶ້ນເປັນ11,63ແມັດ ໃນວັນທີ 29 ກໍລະກົດ ເຊິ່ງໃກ້ເຂດອັນຕະລາຍ(ເຂດອັນຕະລາຍ12,00ແມັດ)


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com





ກົດພາບອ່ານລາຍລະອຽດ

No comments

Powered by Blogger.