Header Ads

ເມືອງຊ່ອນ ແຂວງຫົວພັນ ໄດ້ຮັບການເອົາໃຈໃສ່ພັດທະນາຈາກພັກ ແລະ ລັດ

ເມືອງຊ່ອນແມ່ນເມືອງໜຶ່ງຂອງແຂວງຫົວພັນທີ່ໄດ້ຮັບການສ້າງຕັ້ງຂຶ້ນໃໝ່ໃນປີ 2014 ໂດຍແບ່ງອອກຈາກເມືອງວຽງທອງໃນເມື່ອກ່ອນ. ໄດ້ຮັບການເອົາໃຈໃສ່ຊີ້ນຳຢ່າງໃກ້ຊິດຕິດແທດຈາກພັກ - ລັດຖະບານລາວເຮົາ ແລະ ຄະນະຮັບຜິດຊອບທຸກຂັ້ນ ມາຮອດປັດຈຸບັນບັນດາໂຄງການກໍ່ສ້າງພື້ນຖານໂຄງຮ່າງພາຍໃນເທດສະບານເມືອງໄດ້ກໍ່ສ້າງສຳເລັດ 73,18 %.

ຕາມການລາຍງານຂອງທ່ານ ຮຸ່ງອາລຸນ ບຸນທະເມືອງ ຮອງຫົວໜ້າພະແນກໂຍທາທິການ ແລະ ຂົນສົ່ງແຂວງຫົວພັນ, ໃນນາມຫົວໜ້າໂຄງການກໍ່ສ້າງພື້ນຖານໂຄງຮ່າງພາຍໃນເທດສະບານເມືອງຊ່ອນ ໃຫ້ຮູ້ວ່າ: ໂຄງການກໍ່ສ້າງພື້ນຖານໂຄງລ່າງພາຍໃນເທສະບານເມືອງຊ່ອນປະກອບມີ 11 ກິດຈະກຳຫຼັກ ໄດ້ແກ່ກໍ່ສ້າງເສັ້ນທາງໃຫຍ່ ແລະ ທາງຊອຍພາຍໃນເທສະບານລວມໄລຍະທາງຍາວ 40 ກິໂລແມັດ ແລະ ຂົວ 3 ແຫ່ງ, ກໍ່ສ້າງເຄຫາສະຖານລວມ 8 ກິດຈະກຳ, ກໍ່ສ້າງລະບົບນ້ຳປະປາ ແລະ ສະໜາມຂີ້ເຫຍື້ອ. ຜ່ານການຈັດຕັ້ງປະຕິບັດຮອດປະຈຸບັນວຽກງານກໍ່ສ້າງຂົວ-ທາງປະຕິບັດໄດ້ 73,94%; ກໍ່ສ້າງເຄຫາສະຖານ, ນ້ຳປະປາ - ສະໜາມຂີ້ເຫຍື້ອປະຕິບັດໄດ້ 72,42% ແລະ ແກ້ໄຂຜົນກະທົບທາງດ້ານສິ່ງແວດລ້ອມ - ສັງຄົມສໍາເລັດ 100%.

ທ່ານ ຄຳພຽນ ໄຊສົມພັນ ຮອງເຈົ້າເມືອງ, ຜູ້ຊີ້ນຳວຽກງານເສດຖະກິດເມືອງຊ່ອນໃຫ້ຮູ້ຕື່ມອີກວ່າ: ໂຄງການກໍ່ສ້າງພື້ນຖານໂຄງຮ່າງພາຍໃນເທສະບານເປັນໂຄງການໃຫຍ່ທີ່ຂື້ນກັບການຄຸ້ມຄອງຂອງແຂວງ ເຊິ່ງມີຄວາມໝາຍຄວາມສຳຄັນຫຼາຍຕໍ່ກັບເມືອງທີ່ຈະຊ່ວຍຊຸກຍູ້ການພັດທະນາໃນທຸກດ້ານ, ໂດຍສະເພາະແມ່ນເຮັດໃຫ້ພື້ນຖານໂຄງຮ່າງໄດ້ຮັບການພັດທະນາ ເປັນຕົ້ນແມ່ນຖະໜົນຫົນທາງ, ບັນດາອາຄານສຳນັກງານຫ້ອງການຕ່າງໆ ທີ່ຈະເປັນໃບໜ້າໃໝ່ຂອງເມືອງ, ສະແດງເຖິງອຳນາດການບໍລິຫານລັດ ແລະ ຄວາມສະຫຼາດສ່ອງໃສຂອງພັກປະຊາຊົນ ປະຕິວັດລາວ.

ໂຄງການກໍ່ສ້າງພື້ນຖານໂຄງລ່າງພາຍໃນເທສະບານເມືອງຊ່ອນໃຊ້ງົບປະມານທັງໝົດ 120 ລ້ານໂດລາສະຫະລັດ, ເປັນທຶນກູ້ຢືມຈາກທະນາຄານ BIDV ສສ ຫວຽດນາມ, ມີໄລຍະເວລາກໍ່ສ້າງ 36 ເດືອນ, ຮັບເໝົາກໍ່ສ້າງໂດຍບໍລິສັດ ຈິດຈະເລີນກໍ່ສ້າງ. ປັດຈຸບັນທາງບໍລິສັດຮັບເໝົາກໍ່ສ້າງພວມສຸມໃສ່ວຽກງານກໍ່ສ້າງທໍ່ລະບາຍນ້ຳຂ້າງທາງ, ທໍ່ລອດທາງ, ວາງກ້ອນເບຕົງໃຈກາງທາງ - ຂອບທາງ, ກໍ່ສ້າງອາຄານກຸ່ມການເມືອງ (ຫ້ອງວ່າການ), ວຽກພາຍໃນອາຄານ ແລະ ພາຍນອກອາຄານກຸ່ມຕ່າງໆ, ກໍ່ສ້າງໂຮງງານນ້ຳປະປາ, ວາງທໍ່ນ້ຳດິບ, ທໍ່ສົ່ງ ແລະ ທໍ່ແຈກ. ຄາດວ່າຈະໃຫ້ໄດ້ຊົມໃຊ້ໃນກາງປີ 2018 ທີ່ຈະມາເຖິງ.


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



No comments

Powered by Blogger.