Header Ads

ສຸດໆໄປເລີຍ! 4 ຫນຸ່ມຈາກລາວ ຂີ່ລົດຈັກ ຈາກນະຄອນຫຼວງວຽງຈັນ ສູ່ຊາປາ ພາກເໜືອຫວຽດນາມ ຊົມຄວາມງາມ 2 ແຜ່ນດິນ



ເວັບໄຊ http://www.laopostcard.com ໄດ້ເຜີຍແຜ່ບົດຄວາມ ແລະ ຮູບພາບທີ 4ຫນຸ່ມຈາກລາວ ຂີ່ລົດຈັກຈາກນະຄອນຫຼວງວຽງຈັນ ສູ່ເມືອງທ່ອງທ່ຽວຍອດນິຍົມຂອງຫວຽດນາມຢ່າງ ເມືອງຊາປາ  ທາງພາກເຫນືອຂອງຫວຽດນາມລວມໄລຍະທາງກວ່າ3ພັນກິໂລແມັດ ...

ໂທລະໂຄ່ງ ຈິ່ງຂໍເປັນສ່ວນຫນຶ່ງໃນການເຜີຍແຜ່ຂໍ້ມູນ ຈາກເວັບໄຊ http://www.laopostcard.com 



ການເດີນທາງທ່ອງທ່ຽວ ຖືເປັນຄວາມໄຝ່ຝັນຂອງຫຼາຍໆຄົນ  ແຕ່ກໍ່ບໍ່ແມ່ນເລື່ອງງ່າຍສໍາລັບຜູ້ກະເປົ່າແວບທີ່ຈະເຮັດໄດ້ ແຕ່ກໍບໍ່ແມ່ນເລື່ອງທີ່ໄກເກີນຈິງສຳລັບຜູ້ທີ່ມີຄວາມປາຖະຫນາຢາກອອກທ່ອງໂລກກວ້າງໆແຫ່ງນີ້ ເພາະການເດີນທາງທ່ອງທ່ຽວກໍມີຫຼາຍຮູບແບບ ທັງໃຊ້ເງິນຫຼາຍ ແລະ ເງິນຫນ້ອຍ.

 ໃນກາງເດືອນຜ່ານມາ ທີມງານ 2 ລໍ້ວິຖີຊີວີດລາວ ໄດ້ລວມຕົວກັນອີກຄັ້ງ ພ້ອມປະກາດຫາສະມາຊິກເພີ່ມສຳລັບການເດີນທາງຈາກນະຄອນຫຼວງວຽງຈັນ ສູ່ ເມືອງຊາປາ ພາກເຫນືອຂອງຫວຽດ ນາມ. ໂດຍລວມກໍມີຫຼາຍຄົນສົນໃຈຖາມເຂົ້າມາ ແຕ່ກໍຫນ້ອຍຄົນທີ່ກ້າຈະໄປກັບພວກເຮົາ ເພາະບໍ່ສາມາດໃຫ້ຄຳຕອບໄດ້ວ່າຈະເອົາລົດຈັກຂ້າມດ່ານໄປຫວຽດນາມໄດ້ບ ຢ່າງເຕັມປາກເຕັມຄໍາ ຈິ່ງເຮັດໃຫ້ສະມາຊິກທີ່ຈະໄປບໍ່ຫຼາຍ ໂດຍມີພຽງ6 ຄົນ(ສະມາຊິກເກົ່າໃນປີຜ່ານມາ 4 ຄົນ ແລະ ໃຫມ່ອີກ 2 ຄົນ).

ການເດີນທາງຂອງ ພວກເຮົາອອກ ຈາກນະຄອນຫຼວງວຽງຈັນ ຜ່ານວັງວຽງ, ຫຼວງພະບາງ, ອຸດົມໄຊ, ຜົ້ງສາລີ ແລ້ວອອກສູ່ດິນແດນຫວຽດນາມທີ່ດຽນບ້ຽນຟູ້ ຜ່ານແຂວງລາຍເຈົາເຂົ້າສູ່ແຂວງລາວກາຍ, ດ້ຽນບາຍ, ຟູເທາະ, ຕ່ຽນກວາງ, ໄທຫງຽນ, ຮາໂນ້ຍ, ຫົວບິງ ເຊິນລາ ແລ້ວເຂົ້າສູ່ແຜນດິນລາວ ທີ່ດ່ານປ່າຮ່າງ ແຂວງຫົວພັນ, ຜ່ານຊຽງຂວາງ ແລະ ບໍລິຄໍາໄຊ ແລ້ວກັບສູ່ນະຄອນຫຼວງວຽງຈັນ ໃຊ້ເວລາ 12 ມື້11ຄືນ ລວມໄລຍະທາງກວ່າ 3000 ກິໂລແມັດ ດ້ວຍລົດຈັກ( ຂໍສະຫງວນຍີ່ຫໍ້ລົດເນາະ). ເປົ້າໝາຍການເດີນທາງຄັ້ງນີ້ ແມ່ນ ຊາປາ ມູງກັງຈາຍ ບັກເຊິນແລະ ຮາໂນ້ຍ.


 ເບື້ອງຕົ້ນທີມທີ່ຈະໄປ ມີ  6 ຄົນ ແຕ່ມີເຫດອ້າຍນ້ອງອີກສອງຄົນ ຕິດພາລະກິດກະທັນຫັນ ເລີຍເຫຼືອຢູ່ 4 ຄົນໃນການໄປອອກທິບ ໃນມື້ສຸດທ້າຍ. ເຊິ່ງພວກເຮົາອອກເດີນທາງໃນວັນທີ 16 ມິຖຸນາ ແລະ ກັບມາຮອດນະຄອນຫຼວງວຽງຈັນໃນວັນທີ 27 ມິຖຸນາ.

 ຈຸດເດັ່ນຂອງການເດີນທາງດ້ວຍລົດຈັກຄັ້ງນີ້ ແມ່ນການເຫັນໄດ້ເຖິງທຳມະຊາດ, ວິຖີຊີວິດ ແລະ ວັດທະນະທຳຂອງສອງປະເທດ ໂດຍສະເພາະວິຖິຊີວິດທີ່ຍັງຄົງຄວາມເປັນເອກະລັກໃນວຽດນາມຕອນເຫນືອ ເຊິ່ງພາບທີ່ເຫັນກໍຄືບັນດາແມ່ຍິງ ຈະຍັງນຸ່ງຊຸດເຊົາເຜົ່າ ເຊິ່ງເປັນມົນສະເຫນທີ່ຫນ້າຫລົງໄຫລແລະປະທັບໃຈສຳລັບການເດີນທາງຄັ້ງນີ້.

ນອກນັ້ນຄວາມງົດງາມຂອງນາຂັ້ນໄດ ທັງຢູ່ຊາປາ ແລະ ມູກັງຈາຍ ກໍເປັນພາບທີ່ງົດງາມແລະຫນ້າຊື່ນຊົມຊວນນາຫວຽດນາມທີ່ສາມາດພິກປິ້ນຄວາມຫຍຸ້ງຍາກຂອງທໍາມະຊາດ ຈົນສາມາດປູກເຂົ້າຕາມສັນພູນ້ອຍໃຫຍ່ ແລະ ປັດຈຸບັນກາຍເປັນແຫລງທ່ອງທ່ຽວທີ່ໄດ້ຮັບຄວາມນິຍົມ ທີ່ດຶງດູດຄົນຈາກທົ່ວສາລະທິດເຂົ້າມາທ່ອງທ່ຽວໃນເຂດນີ້.

 ສ່ວນການຂີ່ລົດຈັກໄປຫວຽດນາມ ຄຳຕອບຄືສາມາດເອົາເຂົ້າໄປໄດ້ ໂດຍຈ່າຍຄ່າທຳນຽມພຽງ30ພັນດົງ ປະມານ12ພັນກີບ ກີບ ແຕ່ເອກະສານລົດຕ້ອງຄົບຖ້ວນນໍ. ການຂັບຂີ່ຢູ່ຫວຍຽດນາມ ກໍຕ້ອງເພີ່ມສະຕິ ແລະ ມີຄວາມລະມັດລະວັງ ຫລີກລຽງການເກີດອຸບັດເຫດໄວ້ເປັນອັນດີທີ່ສຸດ.


 ຄ່າໃຊ້ຈ່າຍໃນການເດີນທາງຄັ້ງນິ້ ກໍຖືວ່າບໍ່ຫລາຍທຽບໃສ່ຄວາມຄິດກ່ອນເດີນທາງ ເຊິ່ງຜູ້ຂຽນໝົດປະມານ 2 ລ້ານກີບຕົ້ນໆ ສ່ວນທີມງານທ່ານອື່ນກໍປະມານ 3 ລ້ານກີບ. ຄ່າໃຊ້ຈ່າຍຫຼັກໆ ກໍແມ່ນ ນໍ້າມັນລົດ, ທີ່ພັກ, ແລະ ອາຫານການກິນ. ນອກນັ້ນກໍແມ່ນການກວດເຊັກລົດ.

ຂໍ້ແນະນໍາໃນການເດີນທາງ
+ກວກກາສະພາບ ແລະ ເຕັກນິກລົດໃຫ້ລະອຽດ
+ກະກຽມອຸປະກອນແປງລົດ ແລະ ອາໄຫລ່ທີ່ຈຳເປັນ ໂດຍສະແມ່ນຢາງໃນ
+ກະກຽມຮ່າງກາຍໃຫ້ພ້ອມ
+ກະກຽມເຄື່ອງຂອງທີ່ຈໍາເປັນ, ຢາ, ເສື້ອກັນຝົນ, ຖົງຢ່າງກັນນໍ້າ
+ກະກຽມ ກ້ອງຖ່າຍຮູບເອົາສະເພາະທີ່ຈຳເປັນໃຊ້ ເພື່ອຄວາມສະດວກ
+ກະກຽມຫນັງສືລົດ ຟາດສະປອດ
+ອັນສຸດທ້າຍ ກໍແມ່ນເງິນ

ທ່ານສາມາດຕິດຕາມການເດີນທາງຂອງທີມງານນີ້ຕື່ມທີ່ເວັບໄຊ http://www.laopostcard.com/

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




No comments

Powered by Blogger.