Header Ads

ສະພາປະຊາຊົນແຂວງຫຼວງພະບາງຊຸດທີ່ 1 ໄຂກອງປະຊຸມສະໄໝສາມັນເທື່ອທີ່ 3



ຕອນເຊົ້າຂອງວັນທີ່ 1 – 3 ສີງຫານີ້ ສະພາປະຊາຊົນແຂວງຫຼວງພະບາງຊຸດທີ່ 1 ໄດ້ໄຂກອງປະຊຸມສະໄໝສາມັນເທື່ອທີ່ 3 ຂອງຕົນຂື້ນຢ່າງເປັນທາງການ ໂດຍການເປັນປະທານຂອງ ທ່ານ ສາຍສະໝອນ ຄົມທະວົງ ຮອງເລຂາຄະນະບໍລິຫານງານພັກແຂວງ ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມກອງປະຊຸມໂດຍ ທ່ານ ນາງ ປານີ ຢ່າທໍ່ຕູ້ ກຳມະການກົມການເມືອງສູນກາງພັກ ປະທານສະພາແຫ່ງຊາດ ສະມາຊິກສະພາແຫ່ງຊາດເຂດເລືອກຕັ້ງທີ່ 6 ແຂວງຫຼວງພະບາງ, ທ່ານ ຄຳຂັນ ຈັນທະວີສຸກ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຫຼວງພະບາງ, ພ້ອມດ້ວຍສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ແລະ ບັນດາຫົວໜ້າພະແນກການກົມກອງ ອ້ອມຂ້າງແຂວງເຂົ້າຮ່ວມ. 


 
ທ່ານ ສາຍສະໝອນ ຄົມທະວົງ ໄດ້ມີຄຳເຫັນກ່າວໄຂກອງປະຊຸມວ່າ: ກອງປະຊຸມຄັ້ງນີ້ ຜູ່ແທນເຂົ້າຮ່ວມ ຈະໄດ້ຮັບຟັງການລາຍງານໂດຍສັງເຂບ ກ່ຽວກັບການຈັດຕັ້ງປະຕິບັດວຽກງານຮອບດ້ານໃນ 6 ເດືອນຕົ້ນປີ ແລະ ທິດທາງແຜນການຈຸດສຸມ 6 ເດືອນທ້າຍປີ 2017, ພິຈາລະນາ ແລະ ຮັບຮອງເອົາບົດລາຍງານການຈັດຕັ້ງປະຕິບັດ ແຜນພັດທະນາເສດຖະກິດສັງຄົມ ແລະ ງົບປະມານ 6 ເດືອນຕົ້ນປີ ແລະ ທິດທາງຈຸດສຸມ 6 ເດືອນທ້າຍປີ 2017 ຂອງແຂວງ, ຮັບຟັງການລາຍງານຜົນກະທົບ ແລະ ການຊົດເຊີຍຈາກໂຄງການກໍ່ສ້າງ ເສັ້ນທາງລົດໄຟ ລາວ-ຈີນ, ຮັບຟັງການລາຍງານ ກ່ຽວກັບການຍົກສູງຄຸນນະພາບ ໃນການປະຕິບັດສິດກ່າວຟ້ອງຄະດີອາຍາ ແລະ ການເຂົ້າຮ່ວມຄະດີແພ່ງ ຢູ່ໃນທີ່ປະຊຸມສານ, ຮັບຟັງການລາຍງານ ກ່ຽວກັບການຍົກສູງຄຸນນະພາບ ໃນການດຳເນີນຄະດີຢູ່ສານຂັ້ນຕົ້ນ ແລະ ສານຂັ້ນອຸທອນ, ຮັບຟັງການລາຍງານກ່ຽວກັບ ການຍົກສູງຄຸນນະພາບໃນການຈັດຕັ້ງປະຕິບັດຄຳຕັດສີນຂອງສານ, ຮັບຟັງການລາຍງານ ການການເຄື່ອນໄຫວວຽກງານ ແຕ່ກອງປະຊຸມສະໄໝສາມັນເທື່ອທີ່ 2 ຫາ ເທື່ອທີ່ 3 ແລະ ທິດທາງແຜນການຈຸດສຸມ 6 ເດືອນທ້າຍປີ 2017 ຂອງຄະນະປະຈຳສະພາປະຊາຊົນແຂວງ, ພິຈາລະນາ ແລະ ຮັບຮອງນິຕິກຳ ຂອງອົງການປົກຄອງແຂວງ ຈຳນວນໜື່ງ. ໂອກາດນີ້ ທ່ານປະທານສະພາປະຊາຊົນແຂວງ ໄດ້ຮຽກຮ້ອງໃຫ້ຜູ່ແທນກອງປະຊຸມ ຈົ່ງພ້ອມກັນສຸມສະຕິປັນຍາເຂົ້າໃນການຄົ້ນຄ້ວາແຕ່ລະບັນຫາ ເພື່ອເຮັດໃຫ້ກອງປະຊຸມມີຜົນສຳເລັດ ຕາມຄາດໝາຍທີ່ວາງໄວ້.




ກອງປະຊຸມສະໄໝສາມັນເທື່ອທີ່ 3 ຂອງສະພາປະຊາຊົນແຂວງຫຼວງພະບາງຊຸດທີ່ 1 ຄັ້ງນີ້ ທ່ານ ນາງ ປານີ ຢ່າທໍ່ຕູ້ ປະທານສະພາແຫ່ງຊາດ ຍັງໄດ້ມີຄໍາເຫັນຕໍ່ກອງປະຊຸມ,ເຊິ່ງມີບາງຕອນທ່ານ ໄດ້ຍົກໃຫ້ເຫັນບັນຫາທີ່ພົ້ນເດັ່ນຢູ່ໃນແຕ່ລະຂົງເຂດວຽກງານ ເປັນຕົ້ນແມ່ນຂົງເຂດເສດຖະກິດ ເພື່ອແນໃສ່ການເກັບລາຍຮັບເຂົ້າງົບປະມານຂອງລັດ,ມີຄວາມໂປ່ງໃສ,ເປັນທໍາ ແລະ ຖືກຕ້ອງຕາມລະບຽບກົດໝາຍທີ່ວາງໄວ້,ພ້ອມກັນນັ້ນພະນັກງານໃນແຕ່ລະຂັ້ນຕ້ອງໄດ້ສຸມໃສ່ຢ່າງຈິງຈັງຕໍ່ກັບສະພາບບັນຫາທີ່ເກີດຂື້ນ ເພື່ອແກ້ໄຂຂໍ້ຂ້ອງໃຈຕໍ່ປະຊາຊົນ ແລະ ແກ້ໄຂຊີວິດການເປັນຢູ່ຂອງປະຊາຊົນຢ່າງແທ້ຈິງ.ກອງປະຊຸມຍັງຈະໄດ້ຮັບຟັງການຊີ້ແຈງ ຂອງບັນດາຂະແໜງການ ຕໍ່ຂໍ້ຊັກຖາມຂອງບັນດາສະມາຊິກສະພາແຫ່ງຊາດ ແລະ ສະພາປະຊາຊົນແຂວງ ເປັນຕົ້ນ ພະແນກແຜນການ ແລະ ການລົງທືນ, ພະແນກການເງີນ, ພະແນກກະສິກໍາ ແລະ ປ່າໄມ້, ພະແນກອຸດສາຫະກໍາ ແລະ ການຄ້າ, ພະແນກຊັບພະຍາກອນທຳມະຊາດ ແລະ ສີ່ງແວດລ້ອມ, ອົງການໄອຍາການປະຊາຊົນແຂວງ, ສານປະຊາຊົນແຂວງ ແລະ ພະແນກຍຸຕິທຳ. ກອງປະຊຸມຄັ້ງນີ້ ໄດ້ເປີດໂອກາດໃຫ້ ປະຊາຊົນບັນດາເຜົ່າ ກໍ່ຄືຜູ້ມີສິດປ່ອນບັດເລືອກຕັ້ງ ພາຍໃນແຂວງຫຼວງພະບາງ ສະເໜີຄຳຄິດຄຳເຫັນອັນເປັນປະໂຫຍດຕໍ່ກອງປະຊຸມຜ່ານໂທລະສັບສາຍດ່ວນໝາຍເລກ 071 156 ເພື່ອໃຫ້ກອງປະຊຸມຄົ້ນຄ້ວາຮ່ວມກັບພາກສ່ວນກ່ຽວຂ້ອງ ຊອກຫາວິທີທາງແກ້ໄຂຊ່ວຍ ແນໃສ່ເຮັດໃຫ້ແຂວງຫຼວງພະບາງ ໄດ້ຮັບການພັດທະນາດ້ວຍບາດກ້າວການຂະຫຍາຍຕົວໃໝ່ທີ່ດີຂື້ນກ່ວາເກົ່າ.




 ຂ່າວ: ເພັດສາຄອນ ສິມມະວົງ( ຂ່າວສານຫຼວງພະບາງ )
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com
ກົດພາບອ່ານລາຍລະອຽດ

ກົດພາບອ່ານລາຍລະອຽດ

1 comment:

Powered by Blogger.