Header Ads

ສຶກສາ-ກິລາ ກະຊວງສຶກສາຈະຮັບນັກຮຽນ 11.000 ຄົນ ເຂົ້າມະຫາວິທະຍາໄລ ໃນທົ່ວປະເທດ


ອີງຕາມການລາຍງານຂ່າວຂອງ ຂປລ ວ່າ : ກະຊວງ​ສຶກສາ​ທິການ ​ແລະ ກິລາ​ ຢືນຢັນວ່າ ສົກ​ປີ​ 2017-2018 ນີ້​ ຈະ​ຮັບ​ເອົາ​ນັກ​ສຶກສາ​ ເຂົ້າຮຽນ​ຢູ່​ ມະຫາວິທະຍາ​ໄລ​ແຫ່ງ​ຕ່າງໆ​ ​ໃນທົ່ວ​ປະ​ເທດ​ ປະມານ 11.000 ກວ່າ​ຄົນ ຂະນະ​ທີ່ປີ​ນີ້​ ມີ​ນັກຮຽນ​ສອບ​ເສັງ​ຈົບ ມ7 ປະມານ 60.000 ກວ່າ​ຄົນ​ ​ແລະ ​ໄດ້​ລົງທະ​ບຽນ​​ສອບ​ເສັງ​ ຢ່າງ​ເປັນ​ທາງ​ການ​ປະມານ 18.000 ກວ່າ​ຄົນ.

​ເຈົ້າ​ໜ້າ​ທີ່​ຈາກ​ກົມ​ພັດທະ​ນາ​ ຊັບ​ພະຍາກອນ​ມະນຸດ ກະ​ຊວງ​ສຶກສາ​ທິການ ​ແລະ ກິລາ​ ໄດ້​​ເປີດ​ເຜີຍ​ໃຫ້​ຮູ້​​ ໃນ​ວັນ​ທີ 8 ສິງຫາ 2017 ນີ້ ​ວ່າ: ລັດຖະບານ ​ໄດ້​ພິຈາລະນາຮັບ​ເອົາ​ ຕົວ​ເລກປະມານ 11.000 ກວ່າ​ຄົນ ​ເຂົ້າ​ຮຽນ​ຢູ່​ມະຫາວິທະຍາ​ໄລ​ແຫ່ງ​ຕ່າງໆ​ ທົ່ວ​ປະ​ເທດ ​ສົກ​ປີ 2017-2018 ​ໃນ​ນັ້ນ​ ມະຫາວິທະຍາ​​ໄລ​ແຫ່ງ​ຊາດ (ມຊ) ​ປະມານ 6.000 ຄົນ, ສ່ວນ​ທີ່​ເຫລືອ​​ແມ່ນ​ແບ່ງ​ປັນ​ໃຫ້​ ມະຫາວິທະຍາ​ໄລ​ສຸພາ​ນຸວົງ ​ແຂວງ​ ຫລວງ​ພະ​ບາງ, ມະ​ຫາ​ວິທະຍາ​ໄລ​ຈໍາປາ​ສັກ, ມະຫາວິທະຍາ​ໄລ​ ສະ​ຫວັນນະ​ເຂດ. ຖ້າ​ປຽບທຽບ​ກັບ​ຕົວ​​ເລກ ຮັບ​ເອົາ​ນັກຮຽນ​ສໍາລັບ​ສົກ​ປີ 2016-2017 ​ມີ​ພຽງ​ແຕ່ 10.000 ຄົນ ​ໝາຍຄວາມວ່າ​ເພີ່ມ​ຂຶ້ນ 1.000 ກວ່າ​ຄົນ ​ໃນສົກ​ປີ 2017-2018 ​ເຫດຜົນ​​ຍ້ອນ​ວ່າ ​ຢູ່​ມະຫາວິທະຍາ​ແຫ່ງ​ຕ່າງໆ​ ໄດ້​ເພີ່ມ​ຄະນະ ​ແລະ ຫລັກສູດ​ໃໝ່​ຂຶ້ນ ​ຈຶ່ງ​ຈໍາ​ເປັນ​ຕ້ອງ​ເພີ່ມ​ຕົວ​​ເລກຂຶ້ນ​ຕື່ມ.




​ແນວ​ໃດ​ກໍ​ດີ ໃນ​ຈໍານວນ​ນັກຮຽນ​ສອບ​ເສັງ​ຈົບ ມ7 ປີ​ນີ້​ ມີ​ຕົວ​ເລກສູງ​ເຖິງ 60.000 ກວ່າ​ຄົນ ​ແຕ່​ມະຫາວິທະຍາ​ໄລ​ແຫ່ງ​ຕ່າງໆ​ ສາມາດ​ຮັບຮອງ​ໄດ້​ພຽງ​ແຕ່ 11.000 ກວ່າ​ຄົນ ​ແລະ ຍັງ​ເຫລືອ​ປະມານ 49.000 ຄົນ ​ຄາດ​ວ່າ​ອາດ​​ໄປ​ສອບ​ເສັງ​ເຂົ້າ​ຮຽນ​ ໃນ​ລະດັບ​ວິທະຍາ​ໄລ ​ແລະ ​ໂຮງຮຽນ​ວິຊາ​ຊີບ.

ນັກວິຊາການ ຈັດ​ຫາ​ວຽກ​​ລາຍ​ງານ​ວ່າ: ປີ​ນີ້​ອາດ​ມີ​ນັກຮຽນ ​ຈໍານວນ​ຫລາຍ​ ບໍ່​ເຂົ້າ​ສຶກສາ​ຮໍ່າຮຽນ​ຢູ່​ມະຫາວິທະຍາ​ໄລ ​ແຫ່ງຕ່າງໆ​ທົ່ວ​ປະ​ເທດ ​ໃນ​ນັ້ນ ​ອາດ​ກາຍ​ເປັນ​ພາລະ​ຂອງ​ຜູ້​ປົກຄອງ ​ຕ້ອງ​ໄດ້​ແບກ​ຫາບ​ໜັກ​ຂຶ້ນ​ກວ່າ​ເກົ່າ ​ແຕ່​ກໍ​ເປັນ​ໂອກາດ​ດີ​ ຈະ​ເຮັດ​ໃຫ້​ກຸ່ມ​ນັກຮຽນ​​ເຫລົ່າ​ນັ້ນ​ ໄດ້​ເຂົ້າ​​ຮຽນຢູ່​ ສະ​ຖາ​ບັນ​ວິຊາຊີບ​ ຫລາຍ​ຂຶ້ນ​ກວ່າ​ເກົ່າ ​ເພາະ​ການ​​ເຂົ້າ​ເປັນ​ປະຊາ​ຄົມ​ອາ​ຊຽນ ຍິ່ງ​ເຮັດ​ໃຫ້​ໂອກາດ​ເປີດ​ກວ້າງ​ຫລາຍ​ຂຶ້ນ​ ​ໃນ​ການ​ເຂົ້າ​ຫາ​ອາຊີບ​ຢ່າງຫລາກ​ຫລາຍ ດ້ວຍ​ຄຸນ​ນະພາ​ບ.

ສົກ​ຮຽນ​ 2016-2017, ມີນັກ​ຮຽນມັດ​ທະ​​ຍົມ​ປາຍທົ່ວ​ປະ​ເທດ​ ເຂົ້າ​ສອບ​ເສັງ​ຈົບ​ຊັ້ນ​ປະມານ 60.000 ກວ່າ​ຄົນ, ສົກຮຽນ 2015-2016 ແມ່ນມີ 20.000 ຄົນ​ ເຂົ້າ​ສອບ​ເສັງ.

​ໂດຍ: ຮັກ​ຊາດ/ຂປລ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.