Header Ads

ຕັດສິນລົງໂທດ ຜູ່ກະທຳຜິດເມົາແລ້ວຂັບຕຳຄົນຕາຍ ຈຳຄຸກ 2 ປີ 2 ເດືອນ!



ນະຄອນຫຼວງວຽງຈັນ: ຄະນະສານອາຍາ ສານປະຊາຊົນຂັ້ນຕົ້ນ ນະຄອນຫຼວງວຽງຈັນ ໄດ້ພິ ຈາລະນາຕັດສິນຄະດີລະເມີດກົດຈາລະຈອນ ພາໃຫ້ເກີດອຸບັດຕິເຫດ ແລ້ວເຮັດໃຫ້ມີຄົນເສຍຊີວິດ ໂດຍມີຈຳເລີຍຊື່ທ້າວ ພູເພັດ ອາຍຸ 29 ປີ, ພັກເຊົາຢູ່ບ້ານໜອງໜ້ຽວ, ເມືອງສີໂຄດຕະບອງ ນະຄອນຫຼວງວຽງ ຈັນ, ຜ່ານການຄົ້ນຄວ້າຄະນະສານລົງຄວາມເຫັນຕັດອິດສະຫຼະພາບຈຳ ເລີຍ 2 ປີ 2 ເດືອນ ປັບໃໝ 400.000 ກີບ ພ້ອມທັງຊົດເຊີຍຄ່າເສຍ ຫາຍທາງແພ່ງ 60.000.000 ກີບ.

ໃນຫ້ອງປະຊຸມສານໄອຍະການ ປະຊາຊົນ ໄດ້ຖະແຫຼງໃຫ້ຮູ້ວ່າ: ເວລາ ປະມານ 12 ໂມງຂອງວັນທີ 20 ກຸມພາ 2017, ທ້າວພູເພັດ ໄດ້ຂັບຂີ່ ລົດໂຕໂຢຕ້າ ໄມຕີເອັກ ໝາຍເລກທະບຽນ ກຍ 3638 ກຳແພງນະຄອນ ຂັບມາແຕ່ທາງໄຟແດງໜອງດ້ວງ ຈະມຸ່ງໜ້າໄປບ້ານດົງນາໂຊກໃຕ້, ພໍມາຮອດຮ່ອມ 6 ຈຸດເກີດເຫດ ຈຶ່ງລ້ຽວຂວາເຂົ້າຮ່ອມດັ່ງກ່າວແລ້ວ ໄປຕຳກັບລົດຈັກໂຄລາວໝາຍເລກທະບຽນ ຍດ 7751 ກຳແພງນະ ຄອນ ຂັບຂີ່ໂດຍນາງ ພອນໄຊ ອາຍຸ 62 ປີ ຢູ່ບ້ານດົງນາໂຊກໃຕ້ ເມືອງ ສີໂຄດຕະບອງ ນະຄອນຫຼວງວຽງຈັນ ຕຳໃສ່ກາງລົດຢ່າງຮຸນແຮງ ເຮັດໃຫ້ຜູ້ຂັບຂີ່ລົດຈັກບາດເຈັບສາຫັດ ແລະ ເສຍຊີວິດໃນເວລາຕໍ່ມາ.

ຜ່ານການຄົ້ນຄວ້າເອກະສານ, ຄຳຮັບສາລະພາບຂອງຈຳເລີຍທີ່ ປະກອບ ໃນສຳນວນຄະດີແລ້ວເຫັນວ່າ: ຈຳເລີຍໄດ້ລະເມີດກົດຈາລະ ຈອນ ແລະ ເຮັດໃຫ້ຜູ້ອື່ນເສຍຊີວິດ. ສະນັ້ນ, ຄະນະສານ ຈຶ່ງຕັດອິດສະ ຫຼະພາບຈຳເລີຍຕາມທີ່ໄດ້ກ່າວມານັ້ນ.

ພາບແລະຂ່າວ: ໜັງສືພິມຄວາມສະຫງົບ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ

No comments

Powered by Blogger.