Header Ads

ທະນະຄານນະໂຍບາຍໜ່ວຍບໍລິການເມືອງພູຄູນ ປ່ອຍສິນເຊື່ອໃຫ້ກັບປະຊາຊົນກຸ່ມລ້ຽງສັດປະຈຳປີ 2017


 ວັນທີ 8 ສິງຫາ 2017 ຢູ່ທີ່ທະນາຄານນະໂຍບາຍໜ່ວຍບໍລິການເມືອງພູຄູນໄດ້ຈັດພິທີ ມອບ-ຮັບແຫຼ່ງສິນເຊື່ອຂອງທະນາຄານນະໂຍບາຍ ລະຫວ່າງທະນາຄານນະໂຍບາຍໜ່ວຍບໍລິການເມືອງພູຄູນກັບປະຊາຊົນໃຫ້ກຽດເຂົ້້າຮ່ວມມີ: ທ່ານ ວຽງທອງ ຫັດສະຈັນ ເຈົ້າເມືອງພູຄູນ, ທ່ານ ວິລະໄຊ ເຮີຈິງໂຈ ຫົວໜ້າທະນາຄານນະໂຍບາຍໜ່ວຍບໍລິການເມືອງພູຄູນ, ມີບັນດາຄະນະກຳມະການຄຸ້ມຄອງສິນເຊື່ອຂັ້ນເມືອງ, ອຳນາດການປົກຄອງຂັ້ນບ້ານ ຕະຫຼອດຮອດປະຊາຊົນກຸ່ມລ້ຽງສັດ.


 ທ່ານ ວິລະໄຊ ເຮີຈິງໂຈ ຫົວໜ້າທະນາຄານນະໂຍບາຍໜ່ວຍບໍລິການເມືອງພູຄູນ ກໍໄດ້ຂື້ນຜ່ານບົດລາຍງານແຜນການປ່ອຍສິນເຊື່ອ ປະຈຳປີ 2017 ຂອງທະນາຄານນະໂຍບາຍໜ່ວຍບໍລິການເມືອງພູຄູນ ເຊິ່ງທ່ານໄດ້ໃຫ້ຮູ້ວ່າ: ການປ່ອຍສິນເຊື່ອໃນຄັ້ງນີ້ແມ່ນໄດ້ຮັບແຫຼ່ງທຶນຈາກທະນາຄານນະໂຍບາຍ ສາຂາແຂວງຫຼວງພະບາງ ທັງໝົດ 3 ຕື້ກວ່າລ້ານກີບ ທຽບໃສ່ປີ 2016 ແມ່ນຫຼຸດລົງ 62,80% ໃນນັ້ນມີເງິນກູ້ 2 ປະເພດຄື: ເງິນກູ້ຢືມໄລຍະກາງ ແລະ ໄລຍະຍາວກໍານົດເວລາໃນການກູ້ຢືມແມ່ນ 4 ປີ 6 ເດືອນ ດ້ວຍອັດຕາດອກເບ້ຍ 6%ຕໍ່ປີ ແລະ 6 ປີ 6 ເດືອນ ອັດຕາດອກເບ້ຍ 7%ຕໍ່ປີມີ 3 ໂຄງການຄື: ລ້ຽງໝູ, ລ້ຽງງົວ ແລະ ລ້ຽງຄວາຍ.


ແຜນການຈັດຕັ້ງປະຕິບັດແມ່ນມີ 9 ບ້ານເປົ້າໝາຍ, ມີ 14 ກຸ່ມການຜະລິດ, 146 ຄອບຄົວ ເຊິ່ງຈະໄດ້ປ່ອຍເປັນ 2 ຊຸດຄື: ຊຸດທີໜຶ່ງ ມີ 8 ບ້ານ, 10 ກຸ່ມ, 95 ຄອບຄົວ ວົງເງິນກູ້ຢືມທັງໝົດ: 1 ຕື້ 760 ລ້ານກີບ ແລະ ຊຸດທີ່ສອງແມ່ນຈະສືບຕໍ່ປ່ອຍສິນເຊື່ອໃຫ້ສຳເລັດພາຍໃນທ້າຍເດືອນສິງຫານີ້. ການຈັດຕັ້ງປະຕິບັດແຫຼ່ງທຶນປະຈຳປີ 2017 ໄດ້ທັງໝົດ 2 ຕື້ 765 ລ້ານກີບ ທຽບໃສ່ແຜນການສາມາດຈັດຕັ້ງປະຕິບັດໄດ້ 91,55% ໃຫ້ກຽດຕ່າງໜ້າຂື້ນຮັບເອົາແຫຼ່ງທຶນດັ່ງກ່າວນັ້ນ ໂດຍທ່ານ ວຽງທອງ ຫັດສະຈັນ ເຈົ້າເມືອງພູຄູນ ໃນໂອກາດນີ້ທ່ານກໍໄດ້ຮຽກຮ້ອງມາຍັງພໍ່ແມ່ປະຊາຊົນທີ່ໄດ້ກູ້ຢືມເງິນໃນຄັ້ງນີ້ໃຫ້ຍຶດໝັ້ນໃນລະບຽບຫຼັກການຂອງທະນາຄານນະໂຍບາຍຢ່າງເຂັ້ມງວດ ໃຫ້ນໍາໃຊ້ແຫຼ່ງທຶນເຂົ້າສູ່ເປົ້າໝາຍ, ຖືກຕ້ອງຕາມສັນຍາ ເຮັດໃຫ້ການລ້ຽງສັດເປັນຂະບວນຟົດຟື້ນສາມາດສ້າງລາຍຮັບໃຫ້ແກ່ຄອບຄົວ ແລະ ປ້ອງກັນບໍ່ໃຫ້ມີໜີ້ສິນກາຍສັນຍາ ແລະ ໜີ້ທວງຍາກໃນອະນາຄົດ

ຂ່າວ: ວັນທຽນ ຄຳທະສິດ.




------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.