Header Ads

ຜູ້ຈັດການທີມ ຢູ 23 ລາວ ໂອ້ລົມນັກກີລາກ່ອນຮັບ ມຽນມາ ເຕະບານຊີເກມ 2017 ແລງມື້ອື່ນ

   ໃນຕອນເຊົ້າວັນທີ 15 ສິງຫາ ຜ່ານມາ ທີ່ໂຮງແຮມສະວິດກາເດັນ ໂຮເທວ ໃນນະຄອນຫຼວງ ກົວລາລຳເປີ ປະເທດມາເລເຊຍ ໄດ້ມີການເຕົ້າໂຮມພົບປະຄະນະນຳ, ຄູເຝີກ ແລະ ນັກກິລາເຕະບານທີມຊາດລາວ ເພື່ອກຽມຄວາມພ້ອມລົງສະໜາມນັດທຳອິດ ພົບກັບ ທີມຊາດ ມຽນມາ ທີ່ປະເດີມສະໜາມທຳອິດໄລ່ເອົາຊະນະ ທີມຊາດສິງກະໂປ 2-0 ປະຕູ ໃນຕອນແລງມື້ອື່ນ (16 ສິງຫາ) ທີ່ສະໜາມ Uitm Shah alam Stadium ໂດຍໃຫ້ກຽດເຂົ້າຮ່ວມໂອ້ລົມຂອງ ທ່ານ ປອ. ໄຊບັນດິດ ຣາຊະພົນ ຜູ້ຈັດການທີມ ຢູ 23 ລາວ.

   ທ່ານ ປອ. ໄຊບັນດິດ ຣາຊະພົນ ກໍ່ໄດ້ເນັ້ນໜັກກະຕຸ້ນຈິດໃຈຂອງທັບນັກກິລາວ່າ: ເກມນີ້ມີຄວາມ ໝາຍຄວາມສຳຄັນທີ່ສຸດຕໍ່ທີມເພື່ອເກັບຄະແນນສະສົມໃຫ້ດີທີ່ສຸດ ຫວັງລຸ້ນຈະເຂົ້າໄປຫຼິ້ນໃນຮອບຕໍ່ໄປ ສະນັ້ນ ເພື່ອຮັບປະກັນໃຫ້ໄດ້ຄືດັ່ງນັ້ນ ທຸກຄົນຕ້ອງປະຕິບັດຕາມແຜນການຫຼິ້ນຂອງຄູເຝິກຢ່າງເຂັ້ມງວດ. ນອກຈາກນັ້ນ, ໃຫ້ພ້ອມກັນມີລະບຽບວິໄນທີ່ດີ, ຮັກສາຄວາມສາມັກຄີເປັນຕົ້ນຕໍ, ປຸກລະດົມກຳລັງໃຈມີນໍ້າໃຈຮັກຊາດຮັກຄອບຄົວ ແລະ ຕົນເອງ ເພາະສິ່ງດັ່ງກ່າວເປັນສິ່ງທີ່ເຮົາຮັກ ຕ້ອງສູ້ຊົນຍາດແຍ່ງເອົາຜົນງານສ້າງກຽດ ແລະ ຊື່ສຽງມາສູ່ປະເທດຊາດໃຫ້ໄດ້. ແນວໃດກໍ່ດີ, ເຖິງວ່າ ມຽນມາ ຈະປະເດີມສະໜາມນັດທຳອິດຊະນະ ສິງກະໂປ 2-0 ມາກໍ່ຕາມ ພວກເຮົາຈົ່ງຢ່າຫວັ່ນກົວ ພ້ອມກັນເຊີດຊູຈິດໃຈຮັກຊາດຢ່າງສຸດຂີດສູ້ໃຈເກີນຮ້ອຍ ເຊື່ອໝັ້ນວ່າເກມນີ້ ທີມຊາດລາວ ຈະຕ້ອງເກັບໄຊຊະນະເໜືອມຽນມາ ຢ່າງແນ່ນອນ. 

   ສຳລັບການແຂ່ງຂັນກິລາເຕະບານຊາຍ ໃນງານມະຫະກຳກິລາຊີເກມ ຄັັ້ງທີ 29 ທີ່ປະເທດມາເລເຊຍ ເປັນເຈົ້າ ໄດ້ເລີ່ມແຂ່ງຂັນກັນໃນວັນທີ 14-30 ສິງຫາ 2017 ມີທັງໝົດ 11 ປະເທດເຂົ້າຮ່ວມ ແບ່ງອອກເປັນ 2 ກຸ່ມ ແຕ່ລະກຸ່ມແຂ່ງຂັນພົບກັນໝົດຄັດເອົາທີ 1-2 ຜ່ານເຂົ້າໄປຫຼິ້ນໃນຮອບຕໍ່ໄປ ສໍາລັບກຸ່ມ A ປະກອບມີ ເຈົ້າພາບ ມາເລເຊຍ, ມຽນມາ, ສິງກະໂປ, ສປປ ລາວ ແລະ ບຣູໄນ, ສ່ວນ ກຸ່ມ B ໄທ, ຫວຽດນາມ, ອິນໂດເນເຊຍ, ກໍາປູເຈຍ, ຕີມໍ ເລສເຕ ແລະ ຟີລິບປິນ.


   ສຳລັບຜົນການແຂ່ງຂັນໃນມື້ທຳອິດ ມີການແຂ່ງຂັນ 2 ຄູ່ ຜົນປາກົດວ່າ: ທີມຊາດມຽນມາ ຊະນະ ສິງກະໂປ 2-0 ແລະ ເຈົ້າພາບ ມາເລເຊຍ ຊະນະ ບຣູໄນ 2-1 ສ່ວນໂປຣແກຣມການແຂ່ງຂັນຂອງ ທີມຊາດລາວ ຈະລົງປະເດີມສະໜາມນັດທຳອິດ ພົບກັບ ທີມຊາດ ມຽນມາ ໃນມື້ນີ້ວັນທີ 16 ສິງຫາ 2017 ເວລາ 20:45 ໂມງ ຕາມເວລາທ້ອງຖິ່ນມາເລເຊຍ ເຊິ່ງໄວກ່ອນ ສປປ ລາວ 1 ຊົວໂມງ (19:45 ໂມງ) ທີ່ສະໜາມກິລາເຕະບານ Uitm Shah alam Stadium.


   ຂະນະທີ່ໃນວັນດຽວກັນກ່ອນທີມຊາດລາວ ຈະລົງສະໜາມແຂ່ງຂັນ ກໍ່ຍັງມີການແຂ່ງຂັນອີກ 1 ຄູ່ ລະຫວ່າງເຈົ້າພາບ ມາເລເຊຍ ພົບກັບ ສິງກະໂປ ຜົນການແຂ່ງຂັນຈະເປັນແນວໃດນັ້ນ ຈະຂໍລາຍງານໃຫ້ຊາບຕື່ມອີກ.


ຂໍ້ມູນຈາກ: ອ້ວນດໍາ ລາຍງານຈາກມາເລເຊຍ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com







ກົດພາບອ່ານລາຍລະອຽດ

No comments

Powered by Blogger.