Header Ads

ລາວ ຫວັງຢ່າງໜ້ອຍ 3 ຫຼຽນຄຳ ແລະ ຢຶດອັນດັບທີ 8 ຂອງຕາຕະລາງ ໃນຊີເກມ ທີ່ມາເລເຊຍ

   ສປປ ລາວ ພ້ອມສົ່ງທັບນັກກີລາ 22 ປະເພດກີລາ ເຂົ້າຮ່ວມແຂ່ງຂັນໃນງານມະຫາກໍາກີລາ ຊີເກມ ຄັ້ງທີ 29 ທີ່ປະເທດມາເລເຊຍ ລະຫວ່າງວັນທີ 19-31 ສິງຫານີ້ ພ້ອມຕັ້ງເປົ້າໝາຍຈະສູ້ຊົນໃຫ້ໄດ້ 3 ຫາ 5 ຫຼຽນຄໍາຂຶ້ນໄປ ເພື່ອຫວັງຢຶດອັນດັບທີ 8 ຈາກ 11 ປະເທດເຂົ້າຮ່ວມ.
   ພິທີຖະແຫຼງຂ່າວການກະກຽມຄວາມພ້ອມຂອງທັບນັກກີລາລາວເຂົ້າຮ່ວມ ກົວລາລຳເປີ ເກມ 2017 ຄັ້ງນີ້ ໄດ້ຈັດຂຶ້ນ ໃນຕອນແລງວັນທີ 7 ສິງຫາ ຜ່ານມາ ທີ່ໂຮງແຮມລ້ານຊ້າງ ເມືອງຈັນທະບູລີ ນະຄອນຫຼວງວຽງຈັນ.
   ໂອກາດດັ່ງກ່າວ, ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ກະຊວງ ສສກ ລາຍງານໃຫ້ຊາບວ່າ: ໃນງານກີລາ ກົວລາລຳເປີ ເກມ ຄັ້ງນີ້ ຈະມີ 11 ປະເທດ ເຊິ່ງຈະມີການຊີງໄຊກັນທັງໝົດ 405 ຫຼຽນຄຳ ຈາກ 38 ປະເພດກີລາ ໂດຍ ສປປ ລາວ ກໍ່ຄື ກະຊວງ ສສກ ຈະສົ່ງທັບນັກກີລາລາວ ເຊິ່ງລວມມີຄະນະມົນຕີຊີເກມ, ຄະນະນຳ, ກຳມະການຕັດສິນ, ຕິດຕາມ, ຄູເຝິກ ແລະ ນັກກີລາ ທັງໝົດ 350 ຄົນ.

   " ໃນນັ້ນ ສະເພາະທັບນັກກີລາລາວມີ 221 ຄົນ ຈາກ 22 ປະເພດກີລາ ປະກອບມີ ປັນຈັດສີລັດ, ປິ່ງປ່ອງ, ມວຍວູຊູ, ມວຍສາກົນ, ມວຍລາວ, ຍິງທະນູ, ເປຕັງ, ກະຕໍ້-ຊິນລອນ, ເທຄວັນໂດ, ແລ່ນ-ລານ, ເທັນນິສ, ເຕະບານຊາຍ, ລອຍນໍ້າ, ຣັກບີ້, ກາຣາເຕໂດ, ຢູໂດ, ບີລຽດ-ສະນຸກເກີ, ຍິງປືນ, ດອກປີກໄກ່, ບານບ້ວງ, ລົດຖີບ ແລະ ກ໊ອຟ ໂດຍການເຂົ້າຮ່ວມງານນີ້ໄດ້ໃຊ້ງົບປະມານຂອງລັດຖະບານທັງໝົດ 18.37 ຕື້ກີບ ແລະ ຕັ້ງເປົ້າໝາຍຈະສູ້ຊົນໃຫ້ໄດ້ 3 ຫາ 5 ຫຼຽນຄຳ ຂຶ້ນໄປ ເພື່ອໃຫ້ໄດ້ອັນດັບທີ 8 ຈາກ 11 ປະເທດເຂົ້າຮ່ວມ " ທ່ານ ແສງພອນ ກ່າວ.

   ຂະນະທີ່ ຫຼາຍພາກສ່ວນໃຫ້ການອຸປະຖໍາເປັນຕົ້ນແມ່ນ ບໍລິສັດ ເອັຟບີທີ ອຸປະຖຳເຄື່ອງກີລາ ເຊິ່ງປະກອບມີ ຊຸດແຂ່ງຂັນ, ກະເປົ່າ, ເກີບ ແລະ ອຸປະກອນຕ່າງໆ ລວມມູນຄ່າ 82 ລ້ານກວ່າກີບ, ບໍລິສັດ ເບຍລາວ ຈຳກັດ ໃຫ້ການສະໜັບສະໜູນທັບນັກກີລາລາວ ເຊິ່ງມີວັດຖຸ, ເງິນສົດ 20 ລ້ານກີບ ແລະ ຜະລິດຕະພັນຕ່າງ ລວມມູນຄ່າ 75 ລ້ານກວ່າກີບ ແລະ ພາກສ່ວນອື່ນໆສະໜັບສະໜູນ ລວມມູນຄ່າ 358 ລ້ານກວ່າກີບ.
   ນອກຈາກນັ້ນ, ກໍ່ຍັງມີເງິນອັດສີດ ຖ້າຫາກນັກກີລາລາວຄົນໃດສາມາດຍາດໄດ້ ຫຼຽນຄໍາຫຼຽນລະ 8 ລ້ານກີບ, ຫຼຽນເງິນ 3 ລ້ານກີບ ແລະ ຫຼຽນທອງ 1 ລ້ານກີບ.


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.