Header Ads

ແຂວງເຊກອງ ສະຫຼຸບວຽກງານການເງິນໃນຮອບ 6 ເດືອນ


(ເຊກອງ,ວັນທີ 01/08/2017) * ໃນວັນທີ 31 ກໍລະກົດ 2017 ຜ່ານມານີ້ ຢູ່ສະໂມສອນຫ້ອງວ່າການປົກຄອງແຂວງເຊກອງ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວຽກງານການເງິນໃນ 6 ເດືອນຕົ້ນປີ ແລະ ວາງແຜນການ 6 ເດືອນທ້າຍປີ 2017 ຂຶ້ນ ໂດຍການເຂົ້າຮ່ວມເປັນປະທານຂອງທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ, ມີທ່ານເຈົ້າເມືອງ-ຮອງເຈົ້າເມືອງ, ຫົວໜ້າ-ຮອງພະແນກ, ຫ້ອງການ, ພ້ອມດ້ວຍວິຊາການທີ່ກ່ຽວຂ້ອງອ້ອມຂ້າງແຂວງ ແລະ 4 ຕົວເມືອງເຂົ້າຮ່ວມ.



ໃນກອງວາລະດຳເນີນກອງປະຊຸມຜູ້ເຂົ້າຮ່ວມແມ່ນໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດໃນ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2017 ຈາກທ່ານ ຄຳຮູ້ ອ່ອນມະນີ ຮອງຫົວໜ້າພະແນກການເງິນແຂວງ ຊຶ່ງທ່ານໄດ້ໃຫ້ຮູ້ວ່າ: ໃນ 6 ເດືອນຜ່ານມາ ການຈັດເກັບລາຍຮັບເຂົ້າງົບປະມານ (ສະເພາະລາຍຮັບພາຍໃນແຂວງ) ສາມາດປະຕິບັດໄດ້ທັງໝົດ 33,17 ຕື້ກີບທຽບໃສ່ແຜນປີເທົ່າກັບ 48,08% ແລະ ທຽບໃສ່ໄລຍະດຽວຂອງປີກ່ອນຫຼຸດລົງ 2,50% ໃນນີ້ລາຍຮັບຈາກສ່ວຍສາອາກອນ 25,59 ຕື້ກີບທຽບໃສ່ແຜນປີເທົ່າກັບ 43,80%, ລາຍຮັບຈາກການຄຸ້ມຄອງຊັບສິນຂອງລັດ 5,23 ຕື້ກີບເທົ່າກັບ 74,67% ແລະ ລາຍຮັບຄ່າບໍລິການ 2,35 ຕື້ກີບທຽບໃສ່ແຜນປີເທົ່ກັບ 65,77%.



ພ້ອມດຽວກັນນັ້ນ ຍັງໄດ້ເອົາໃຈໃສ່ການບໍລິການ ແລະ ຄຸ້ມຄອງລາຍຈ່າຍ ໂດຍແນໃສ່ການປະຕິບັດນະໂຍບາຍລາຍຈ່າຍທີ່ສຳຄັນຕ່າງໆເປັນຕົ້ນແມ່ນເງິນເດືອນ ແລະ ເງິນອຸດໜູນ ຖືເປັນບູລິມະສິດອັນດັບໜຶ່ງໃຫ້ແກ່ພະນັກງານລັດຖະກອນ. ນອກນີ້ ກໍຍັງປະຕິບັດບາງລາຍຈ່າຍທີ່ຈຳເປັນເຊັ່ນ: ຈ່າຍບໍລິຫານ, ດັດສົມ, ເງິນແຮ, ຊື້ໃໝ່ ແລະ ລາຍຈ່າຍດ້ານການລົງທຶນ ຊຶ່ງສາມາດປະຕິບັດໄດ້ 180,34 ຕື້ກີບເທົ່າກັບ 44,76% ຂອງແຜນປີ.

ໃນກອງປະຊຸມຜູ້ເຂົ້າຮ່ວມຍັງໄດ້ຮັບຟັງຄຳສັ່ງຂອງນາຍົກລັດຖະມົນຕີ ສະບັບເລກທີ 09/ນຍ ລົງວັນທີ 19 ພຶດສະພາ 2017 ວ່າດ້ວຍການປະຢັດລາຍຈ່າຍງົບປະມານຂອງລັດ, ຄຳແນະນຳຂອງລັດຖະມົນຕີກະຊວງການເງິນ ສະບັບເລກທີ 2168/ກງ ລົງວັນທີ 27 ກໍລະກົດ 2017 ວ່າດ້ວຍການສ້າງແຜນງົບປະມານແຫ່ງລັດປະຈຳປີ 2018, ການປະກອບຄຳຄິດຄຳເຫັນຂອງການນຳເມືອງ, ຫົວໜ້າພະແນກການຕ່າງໆຂັ້ນແຂວງ, ຫ້ອງການ-ການເງິນເມືອງ ແລະ ການໂອ້ລົມຂອງທ່ານ ເຫຼັກໄຫຼ ສີວິໄລ ຮອງເຈົ້າແຂວງເຊກອງ.



( ຂ່າວ-ພາບ : ສັນຍາ ແກ້ວໄຊຍະວົງ )
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com
ກົດພາບອ່ານລາຍລະອຽດ

ກົດພາບອ່ານລາຍລະອຽດ

No comments

Powered by Blogger.