Header Ads

ລັດຖະບານຢີ່ປຸ່ນໃຫ້ທຶນຊ່ວຍເຫຼືອສ້າງໂຮງຮຽນ 44 ແຫ່ງ ມອບໃຫ້ 3 ແຂວງພາກໃຕ້


ລັດຖະບານຢີ່ປຸ່ນໄດ້ສະໜັບສະໜູນ ແລະໃຫ້ທຶນຊ່ວຍເຫຼືອລ້າໃນດ້ານການພັດທະນາພື້ນຖານໂຄງລ່າງການສຶກສາ ໂດຍຜ່ານອົງການໄຈກ້າປະຈຳລາວ ເພື່ອປະຕິບັດໂຄງການປັບປຸງສະພາບແວດລ້ອມຂອງໂຮງຮຽນ ແລະເປັນການຍົກລະດັບພັດທະນາຊັບພະຍາກອນມະນຸດ ແລະຊຸມຊົນຢູ່ 3 ແຂວງພາກໃຕ້ຄື: ສາລະວັນ, ເຊກອງ ແລະແຂວງອັດຕະປື. ປະກອບມີທຶນກໍ່ສ້າງອາຄານຮຽນ 44 ແຫ່ງ ໃນມູນຄ່າທັງໝົດ 8 ລ້ານກວ່າໂດລາສາຫະລັດ ຫຼື ປະມານ 64 ຕື້ກວ່າກີບ, ໃນນັ້ນ: ແຂວງສາລະວັນ 23 ແຫ່ງ, ແຂວງເຊກອງ 12 ແຫ່ງ ແລະແຂວງອັດຕະປື 12 ແຫ່ງ. 


ທ່ານ ໂຢຊິຮາຣຸ ໂຍເນຢາມາ ຜູ້ຕ່າງໜ້າອົງການໄຈກ້າ (JICA) ປະຈຳ ສ ປປລາວ ໄດ້ລາຍງານກ່ຽວກັບການຈັດຕັ້ງປະຕິບັດໂຄງການວ່າ: ອາຄານຮຽນ 44 ແຫ່ງນີ້ ແມ່ນເປັນໂຮງຮຽນມັດທະຍົມ, ເປັນອາຄານຊັ້ນດຽວຖາວອນ ແລະມີເອກະລັກໜື່ງດຽວຄື: ຫຼັງຄາມຸງດ້ວຍກະເບື້ອງສີຟ້າ, ກຳແພງສີຂາວ, ມີຫ້ອງຮຽນທັງໝົດ 250 ຫ້ອງ, ຫ້ອງການຄູອາຈານ 21 ຫ້ອງ, ຫ້ອງນ້ຳ 36 ຫ້ອງ, ຫ້ອງສະໜຸດ ແລະອື່ນໆ. ໃນນັ້ນຢູ່ແຂວງສາລະວັນ ມີ 23 ແຫ່ງ(ມີ 2 ບ້ານໄດ້ຮັບທັງ 2 ງວດ), ແຂວງເຊກອງ 12 ແຫ່ງ ແລະແຂວງອັດຕະປື 12 ແຫ່ງ ລວມມູນຄ່າ 8.026 ພັນກວ່າໂດລາສະຫະລັດ ຫຼື ປະມານ 64 ຕື້ກວ່າກີບ. ສຳລັບຢູ່ແຂວງສາລະວັນ ໂຄງການດັ່ງກ່າວແມ່ນໄດ້ເລີ່ມແຕ່ປີ 2008 ເຖີງ 2016 ມີ 2 ງວດຄື: ງວດທີ 1 ມີ 5 ຕົວເມືອງ, ມີ 13 ບ້ານ ແລະມີ 13 ແຫ່ງ ມູນຄ່າ 2 ລ້ານກວ່າໂດລາສະຫະລັດ ແລະໄລຍະທີ 2 ມີ 5 ຕົວເມືອງ, ມີ 12 ບ້ານ ໄດ້ຮັບໂຄງການກໍ່ສ້າງໂຮງຮຽນ ຈຳນວນ 12 ແຫ່ງ ມີມູນຄ່າ 1 ລ້ານກວ່າໂດລາສະຫະລັດ, ສຳລັບໂຮງຮຽນມັດທະຍົມບ້ານໜອງໃສ ເມືອງສາລະວັນ ມີອາຄານຮຽນ 4 ຫຼັງ, ຊັ້ນດຽວ ມີມູນຄ່າການກໍ່ສ້າງ 2 ແສນກວ່າໂດລາສະຫະລັດ. ໄລຍະຜ່ານມາອົງການໄຈກ້າ ປະເທດຢີ່ປຸ່ນໃຫ້ທຶນສະໜັບສະໜູນເຂົ້າໃນການຊ່ວຍເຫຼືອສ້າງໂຮງຮຽນ ຕາມໂຄງການປັບປຸງສະພາບແວດລ້ອມຂອງໂຮງຮຽນມັດທະຍົມສຳເລັດແລ້ວ 95 ແຫ່ງ ຢູ່ແຂວງຈຳປາສັກ ແລະແຂວງສະຫວັນນະເຂດ.







ພິທີມອບຮັບໂຮງຮຽນພາຍໃຕ້ໂຄງການປັບປຸງສະພາບແວດລ້ອມໂຮງຮຽນມັດທະຍົມ ໄດ້ຈັດຂຶ້ນໃນທ້າຍອາທິດຜ່ານມານີ້ ຢູ່ບ້ານໜອງໃສ ເມືອງ ແລະແຂວງສາລະວັນ, ເຊີ່ງມອບໃຫ້ບັນດາ 3 ແຂວງພາກໃຕ້ຄື: ສາລະວັນ, ເຊກອງ ແລະແຂວງອັດຕະປື, ໂດຍໃຫ້ກຽດເຂົ້າຮ່ວມຂອງ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະກິລາ, ມີ ທ່ານ ພູທົງ ຄຳມະນີວົງ ຮອງເຈົ້າແຂວງໆສາລະວັນ ຜູ້ຊີ້ນຳວຽກງານວັດທະນະທຳສັງຄົມແຂວງ, ທ່ານ ທາເກຊິ ຮິກິຮາຊາ ເອກອັກຄະລັດຖະທູດປະເທດຢີ່ປຸ່ນປະຈຳລາວ ແລະມີບັນດາຄະນະນຳຂັ້ນເມືອງເຊກອງ, ອັດຕະປື ຕະຫຼອດຮອດພາກສ່ວນທີ່ກ່ຽວຂ້ອງ, ອຳນາດການປົກຄອງບ້ານ, ຄູອາຈານ ແລະນັກຮຽນເຂົ້າຮ່ວມ.













ຂ່າວ-ພາບ: ວິໄລວອນ ສິດທິໄຊ/ໜັງສືພິມ ສະລະວັນ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.