Header Ads

ຄະນະສານອາຍາ ສານປະຊາຊົນແຂວງບໍ່ແກ້ວ ພ້ອມດ້ວຍຄະນະ ໄດ້ນໍາ ຄະດີຄ້າຂາຍຢາເສບຕິດ ປະເພດຢາບ້າ


ໃນວັນທີ 27 ກໍລະກົດ 2017 ນີ້ ຄະນະສານອາຍາ ສານປະຊາຊົນແຂວງບໍ່ແກ້ວ ພ້ອມດ້ວຍຄະນະ ໄດ້ນໍາ ຄະດີຄ້າຂາຍຢາເສບຕິດ ປະເພດຢາບ້າ ຈໍານວນ 100 ມັດ ເທົ່າກັບ 20.000 ເມັດ ມີນໍ້າໜັກ 20,390 ກິໂລກຼາມ, ເຮໂລອິນ ຈໍານວນ 06 ແທ່ງ, ລົດຈັກເວບຈີນ 01 ຄັນ ແລະ ມືຖືອີກ 01 ໜ່ວຍມາພິຈາລະນາຕັດສິນຄະດີ ຢູ່ທີ່ສານປະຊາຊົນແຂວງບໍ່ແກ້ວ ຈໍານວນ 02 ຄົນ ຊື່ທ້າວໄມ່ຈັນດີ ອາຍຸ 27 ປີ, ອາຊີບ ຊາວນາ, ສັນຊາດລາວ, ຊົນເຜົ່າລື້ ປັດຈຸບັນຢູ່ບ້ານຊຽງກົກໃໝ່ ເມືອງລອງ ແຂວງຫຼວງນໍ້າທາ ຂໍ້ຖືກຫາ ຂົນສົ່ງຢາເສບຕິດປະເພດຢາບ້າ ຈໍານວນ 100 ມັດ ເທົ່າກັບ 20.000 ເມັດ ຖືກກັກຕົວວັນທີ 21 ກັນຍາ 2016 ແລະ ທ້າວ ໃຈໂຟ ແຊຟານ ອາຍຸ 23 ປີ ອາຊີບກໍາມະກອນ ສັນຊາດລາວ ຊົນເຜົ່າອີວມ້ຽນ (ຢ້າວ) ປັດຈຸບັນຢູ່ບ້ານຫ້ວຍແມງ ເມືອງປາກທາ ແຂວງບໍ່ແກ້ວ ຂໍ້ຖືກຫາ ຂົນຢາເສບຕິດປະເພດເຮໂລອິນ ຈໍານວນ 06 ແທ່ງ, ຖືກກັກຕົວວັນທີ 09 ກັນຍາ 2016 ເຊິ່ງປະກອບມີ ພາກສ່ວນທີ່ກ່ຽວຂອງ ແລະ ຍາດຂອງຈໍາເລີຍເຂົ້າຮ່ວມຮັບຟັງ.



ຜ່ານການຄົ້ນຄວ້າພິຈາລະນາບັນດາເອກະສານຫຼັກຖານຕ່າງໆ ທີ່ມີຢູ່ໃນສໍານວນຄະດີ ພ້ອມທັງຜົນຂອງການໄຕ່ສວນໃນທີ່ປະຊຸມສານຢ່າງລະອຽດທີ່ຖ້ວນແລ້ວ ເຫັນວ່າ: ໃນຄັ້ງວັນທີ 08 ກັນຍາ 2016 ທ້າວ ໃຈໂຟ ແຊຟານ ໄດ້ມີການຕົກລົງຮັບສົ່ງຢາເສບຕິດ ປະເພດເຮໂລອິນ ຈໍານວນ 06 ແທ່ງ ໃຫ້ທ້າວ ຂ ນາມສົມມຸດ ຢູ່ສວນກ້ວຍຈີນ ເຂດບ້ານດ່ານຖິ່ນ ເມືອງຫ້ວຍຊາຍ ມາ ບ້ານວຽງໃໝ່ ເມືອງຫ້ວຍຊາຍ ໂດຍຕົກລົງຄ່າຂົນສົ່ງເປັນເງິນຈໍານວນ 30.000 ບາດໄທ. ຕົກມາຮອດວັນທີ 09 ກັນຍາ 2016 ເວລາປະມານ 06 ໂມງເຊົ້າ ຈໍາເລີຍໄດ້ມາຮັບເອົາຢາເສບຕິດປະເພດເຮໂລອິນ ຈໍານວນ 06 ແທ່ງ ຕາມທີ່ໄດ້ນັດໝາຍ ຈາກນັ້ນ, ຜູ້ກ່ຽວກໍ່ໄດ້ຂັບຂີ່ລົດຈັກເວບຈີນສີແດງ-ດໍາ ເຊິງເປັນລົດຂອງຜູ້ກ່ຽວເອງ ເພື່ອຈະໄປສົ່ງຢູ່ທີ່ຈຸດນັດໝາຍ ພໍມາຮອດຈຸດກວດກາບ້ານດອນ ເມືອງຫ້ວຍຊາຍ ເຈົ້າໜ້າທີ່ຈຶ່ງໄດ້ຂໍອານຸຍາດກວດຄົ້ນຍານພາຫະນະ ແລະ ຕົນຕົວຜູ້ກ່ຽວ ແລະ ໄດ້ພົບເຫັນຢາເສບຕິດປະເພດເຮໂລອິນ ຈໍານວນ 06 ແທ່ງຢູ່ໃນກະເປົາເປ້ຂອງຜູ້ກ່ຽວ ດັ່ງນັ້ນ, ເຈົ້າໜ້າທີ່ຂອງພວກເຮົາຈຶ່ງໄດ້ກັກຕົວຜູ້ກ່ຽວມາດໍາເນີນຄະດີຕາມລະບຽບກົດໝາຍ.






ພ້ອມດຽວກັນນັ້ນ, ໃນຄັ້ງວັນທີ 19 ກັນຍາ 2016 ທ້າວ ໄມ່ຈັນດີ ໄດ້ມີການຕິດຕໍ່ພົວພັນກັບພໍ່ລ້ຽງຊາວມຽນມາ ກ່ຽວກັບການຂົນສົ່ງຢາເສບຕິດປະເພດຢາບ້າ ຈໍານວນ 100 ມັດ ຈາກບ້ານຫຼວງສິງໃຈ ເມືອງຕົ້ນເຜິ້ງ ຫາ ເມືອງຫ້ວຍຊາຍ ແຂວງບໍ່ແກ້ວ ເຊິ່ງໄດ້ຕົກລົງຄ່າຂົນສົ່ງເປັນເງິນ ຈໍານວນ 50.000 ບາດ.


ຕົກມາຮອດວັນທີ່21 ກັນຍາ 2016 ຈໍາເລີຍກໍ່ໄດ້ອອກຈາກບ້ານຊຽງກົກ ເມືອງລອງ ແຂວງຫຼວງນໍ້າທາ ມາບໍ່ແກ້ວ ແລ້ວ ໄດ້ມາຍືມລົດກະບະວີໂກ ໝາຍເລກທະບຽນ ຈຄ 2888 ກໍາແພງນະຄອນ ນໍາທ້າວ ຂ ຢູ່ບ້ານຫວຍຊາຍໃຕ້ ເມືອງຫ້ວຍຊາຍ ວ່າຈະເອົາໄປຊື້ເຄື່ອງ ເມື່ອໄດ້ລົດແລ້ວ ກໍ່ໄດ້ຂັບຂີ່ລົດໄປທີ່ນັດໝາຍ ເມື່ອໄປຮອດຈຸດນັດໝາຍກໍ່ມີຊາຍ 2 ຄົນຂັບຂີ່ລົດຈັກ ເອົາຢາບ້າຈໍານວນດັ່ງກ່າວ ມາໃສ່ເບາະນັ່ງດ້ານຫຼັງ ແລ້ວກໍ່ຂັບຂີ່ລົດຈັກເປີດທາງ ແລະ ສັງເກດທາງໃຫ້ ຈໍາເລີຍ ເມື່ອມາຮອດຈຸດກວດກາດ່ານນໍ້າເກິ່ງເກົ່າ, ຊາຍ 2 ຄົນກໍ່ໄດ້ໂທບອກຈໍາເລີຍລ້ຽວລົດກັບຄືນ ເມື່ອເຈົ້າໜ້າທີ່ເຫັນແນວນັ້ນ ກໍ່ໄດ້ຂັບຂີ່ລົດຕິດຕາມໄປ ຈຶ່ງສາມາດກັກຕົວຈໍາເລີຍໄດ້ ແລະ ທຳການກວດຄົ້ນລົດ ແລະ ຕົນຕົວຈຶ່ງໄດ້ພົບເຫັນຢາເສບຕິດ ປະເພດຢາບ້າ ຈໍານວນ 100 ມັດ ຊຸກເຊື່ອງຢູ່ເບາະຫຼັງ ດັ່ງນັ້ນ, ເຈົ້າໜ້າທີ່ຕຳຫຼວດຈຶ່ງໄດ້ກັກຕົວຜູ້ກ່ຽວມາດໍາເນີນຄະດີຕາມລະບຽບກົດໝາຍ.


ໂດຍອີງຕາມບົດບັນທຶກການກວດກາ ແລະ ຕິດຊັ່ງນໍ້າໜັກຢາເສບຕິດ ສະບັບເລກທີ 1088 ລົງວັນທີ 12 ກັນຍາ 2016 ຂອງພະແນກຕໍາຫຼວດຕ້ານ ແລະ ສະກັດກັ້ນຢາເສບຕິດ ກອງບັນຊາການ ປກສ ແຂວງບໍ່ແກ້ວ ຕາມທີ່ກໍານົດໄວ້ໃນມາດຕາ 37 ວ່າດ້ວຍຫຼັກການລວມຂອງການວາງໂທດ ເຊິ່ງກໍານົດໃຫ້ສານມີສິດວາງໂທດຕາມຂອບເຂດທີ່ກົດໝາຍກໍານົດໄວ້ເທົ່ານັ້ນ, ແຕ່ໃນການກະທຳຜິດຂອງຈໍາເລີຍ ແມ່ນມີຄວາມຜິດຕາມມາດຕາ 2 ຂໍ້ 1 ວັກ 4 ກົດໝາຍວ່າດ້ວຍການປັບປຸງ ມາດຕາ 146 ຂອງກົດໝາຍອາຍາ ແລະ ມາດຕາ 75, 76 ຂອງກົດໝາຍວ່າດ້ວຍຢາເສບຕິດ ສະບັບປັບປຸງປີ 2012 ໄດ້ກໍານົດວ່າ: ບຸກຄົນຜູ້ໃດຫາກຜະລິດ, ຄ້າຂາຍ, ຈໍາໜ່າຍ ຫຼື ມີໄວ້ຄອບຄອງ, ນໍາເຂົ້າ, ສົ່ງອອກ, ຂົນສົ່ງຢາເສບຕິດປະເພດເຮໂລອິນ, ມອກຝິ່ນ, ໂຄເຄນ, ຢາບ້າ, ຢາອີ, ຢາໄອ ຫຼື ວັດຖຸອອກລິດຕໍ່ຈິດປະສາດ ຜ່ານ ສປປ ລາວ ເກີນກວ່າ 03 ກິໂລກຼາມຂື້ນໄປ ຈະຖືກລົງໂທດປະຫານຊີວິດ. ຜ່ານການຕັດສິນເຫັັນວ່າ ບໍ່ມີເງື່ອນໄຂໃດທີ່ຈະເປັນບ່ອນອີງໃຫ້ສານຫຼຸດຜ່ອນໂທດ ຫຼື ລົງໂທດຕໍ່າກວ່າທີ່ກົດໝາຍກໍານົດໃຫ້ຈໍາເລີຍໄດ້ ດັ່ງນັ້ນຈຶ່ງໄດ້ຕັດສິນຄະດີນີ້ຕໍ່ໜ້າປະຊາຊົນ ໃນສະຖານອາຍາເປັນຂັ້ນຕົ້ນ ໂດຍຊ່ອງໜ້າໂຈດ, ທະນາຍຄວາມ ແລະ ຈໍາເລີຍ, ຕັດສິນໃຫ້ ທ້າວໃຈໂຟ ແຊຟານ ມີຄວາມຜິດໃນສະຖານ ຂົນສົ່ງຢາເສບຕິດປະເພດ ເຮໂລອິນ ລົງໂທດ ທ້າວ ໃຈໂຟ ປະຫານຊີວິດ, ຕັດສິນໃຫ້ທ້າວ ໄມ່ຈັນດີ ມີຄວາມຜິດໃນສະຖານ ຂົນສົ່ງຢາເສບຕິດປະເພດຢາບ້າ ລົງໂທດທ້າວໄມ່ຈັນດີ ປະຫານຊີວິດ ພ້ອມທັງຍຶດຂອງກາງປະເພດຍາເສບຕິດໄວ້ທຳລາຍ ພ້ອມດ້ວຍລົດຈັກ ແລະ ໂທລະສັບມືຖື 01 ໜ່ວຍ ໄວ້ເປັນຂອງລັດ.


ຂ່າວ: ຮຕ ນາຊູ/ປກສ ແຂວງບໍ່ແກ້ວ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com
ກົດພາບອ່ານລາຍລະອຽດ


ກົດພາບອ່ານລາຍລະອຽດ

No comments

Powered by Blogger.