Header Ads

ກອງປະຊຸມສຸດຍອດ ອາຊຽນ-ອິນເດຍ ໄຂຂຶ້ນທີ່ບາງກອກ



ກອງ​ປະ​ຊຸມ​ສຸດຍອດ ແລະ ວາງ​ສະ​ແດງ​ສິນ​ຄ້າ ອາ​ຊຽນ-ອິນ​ເດຍ​ ໄດ້​ໄຂ​ຂຶ້ນ​ຢ່າງ​ເປັນ​ທາງ​ການ​ ໃນ​ວັນ​ທີ 3 ສິງ​ຫາ 2017 ນີ້​ ທີ່​ນະ​ຄອນ​ຫລວງບາງກອກ ປະ​ເທດໄທ ໂດຍ​ໃຫ້​ກຽດ​ເຂົ້າ​ຮ່ວມ​ຂອງ ທ່ານ ປະ​ຍຸດ ຈັນ​ໂອ​ຊາ ນາ​ຍົກ​ລັດ​ຖະ​ມົນ​ຕີ​ແຫ່ງ​ ຣາ​ຊະ​ອາ​ນາ​ຈັກ​ໄທ, ມີບັນ​ດາ​​ລັດ​ຖະ​ມົນ​ຕີ, ຮອງ​ລັດ​ຖະ​ມົນ​ຕີ, ຜູ້​ປະ​ກອບ​ການ​ຈາກ ປະ​ເທດ​ສະ​ມາ​ຊິກ​ອາ​ຊຽນ, ອິນ​ເດຍ, ອົງ​ການ​ຈັດ​ຕັ້ງ​ສາ​ກົນ ແລະ ປະ​ເທດ​ກ່ຽວ​ຂ້ອງ​ເຂົ້າ​ຮ່ວມ​ ປະ​ມານ 500 ຄົນ ຂະ​ນະ​ທີ່ ທ່ານ ສົມ​ຈິດ ອິນ​ທະ​ມິດ ຮອງ​ລັດ​ຖະ​ມົນ​ຕີ ​ກະ​ຊວງ​ອຸດ​ສາ​ຫະ​ກຳ ແລະ ການ​ຄ້າ​ ໄດ້​ນຳ​ພາ​ຄະ​ນະ​ຜູ້​ແທນ ສ​ປ​ປ ລາວ ​ເຂົ້າ​ຮ່ວມ​ເຊັ່ນ​ກັນ.

ກອງ​ປະ​ຊຸມ​ສຸດຍອດ ແລະ ວາງ​ສະ​ແດງ​ສິນ​ຄ້າ ອາ​ຊຽນ-ອິນ​ເດຍ​ ຄັ້ງ​ນີ້​ ມີ​ຜູ້​ປະ​ກອບ​ການ​ທຸ​ລະ​ກິດ​ ຈາກ​ປະ​ເທດ​ຕ່າງໆ​ ເຂົ້າ​ຮ່ວມປະ​ມານ 193 ຮ້ານ ໃນ​ນັ້ນ, ​ອາ​ຊຽນ 65 ຮ້ານ (ລາວ​ 10 ຮ້ານ) ແລະ ອິນ​ເດຍ 48 ຮ້ານ ເຊິ່ງ​ສິນ​ຄ້າ​ສ່ວນ​ໃຫຍ່ ​ທີ່ນຳ​ເອົາ​ວາງ​ສະ​ແດງ​ປະ​ກອບ​ມີ​ຄື: ເຄື່ອງ​ກົນ​ຈັກ​ກະ​ສິ​ກຳ, ອາ​ຫານ, ວັດ​ສະ​ດຸ​ກໍ່​ສ້າງ, ​ເຄື່ອງ ຫັດ​ຖະ​​ກຳ, ຜະ​ລິດ​ຕະ​ພັນ​ອາ​ຫານ ​ເພື່ອ​ສຸ​ຂະ​ພາບ, ​ອັນ​ຍະ​ມະ​ນີ, ຜ້າ​ໄໝ ແລະ ອື່ນໆ ສ່ວນ​ນັກ​ທຸ​ລະ​ກິດ​ຈາກ ສ​ປ​ປ ລາວ ແມ່ນ​​ໄດ້ນຳ​ເອົາ​ຜ້າ​ໄໝ, ເຄື່ອງ​ຫັດ​ຖະ​ກຳ​ໄມ້​ ແກະ​ສະ​ລັກ ​ແລະ ເຄື່ອງ​ອັນ​ຍະ​ມະ​ນີ.

 ທ່ານ ປະ​ຍຸດ ຈັນ​ໂອ​ຊາ​ ກ່າວ​ຕໍ່ທີ່​ປະຊຸມວ່າ: ຕົນ​ເອງ​ມີ​ຄວາມ​ສຶກ​ຮູ້​ດີ​ໃຈ ແລະ ເປັນ​ກຽດ​ຢ່າງ​ຍິ່ງ​ໃນ​ງານ​ຄັ້ງ​ນີ້ ເພາະ​ເປັນ​ການຄົບ​ຮອບ 25 ປີ​ຂອງ​ການ​ສ້າງ​ຕັ້​ງ​ສາຍ​ພົວ​ພັນ​ ອາ​ຊຽ​ນ-ອິນ​ເດຍ ແລະ ຄົບ​ຮອບ 50 ປີ ຂອງວັນ​ສ້າງ​ຕັ້ງ​ອາ​ຊຽນ. ສະ​ນັ້ນ​, ມັນ​ເປັນ​ໂອ​ກາດ​ທີ່​ສຳ​ຄັນ​ ຢ່າງ​ຍິ່ງ​ສຳ​ລັບ​ຜູ້​ນຳ​, ນັກ​ທຸ​ລະ​ກິດ ແລະ ຫົວ​ໜ່ວຍ​ຜູ້​ປະ​ກອບ​ການ​ຈາກ​ອາ​ຊຽນ, ອິນ​ເດຍ ແລະ ບັນ​ດາ​ປະ​ເທດ​ຕ່າງໆ ໄດ້​ພົບ​ປະ​ແລກ​ປ່ຽນ ​ຄວາມ​ຄິດ​ຄວາມ​ເຫັນ ແລະ ເປີດ​ວິ​​ໄສ​ທັດ ​ທີ່​ໜ້າ​ສົນ​ໃຈນຳ​ກັນ ​ເພື່ອ​ຊຸກ​ຍູ້​ການ​ຮ່ວມ​ມື​ ດ້ານ​ການ​ຄ້າ, ການ​ລົງ​ທຶນ, ການ​ທ່ອງ​ທ່ຽວ ແລະ ອື່ນໆ ເຊິ່ງ​ທັງ​ໝົດ​ນັ້ນ​ ຈະ​ນຳ​ໄປ​ສູ່​ການ​ຍົກ​ລະ​ດັບ​ ການ​ພັດ​ທະ​ນາ ​ເສດ​ຖະ​ກິດ-ສັງ​ຄົມ, ການ​ເຊື່ອມ​ໂຍງ, ການ​ເຕີບ​ໂຕ​ ​ແລະ ການ​ພັດ​ທະ​ນາ​ ຊັບ​ພະ​ຍາ​ກອ​ນ​ມະ​ນຸດ​ ທີ່​ມີ​ຄຸນ​ນະ​ພາບ ໃນ​ຂະ​ແໜງ​ການ​ອື່ນໆ. ອາ​ຊຽນ ແລະ ອິນ​ເດຍ​ ຍັງໄດ້​​ເປັນ​ພາກ​ສ່ວນໜຶ່ງ​ທີ່​ສຳ​ຄັນ ​ຕໍ່​ການ​ຊຸກ​ຍູ້​ການເຕີບ​ໂຕ ​ເສດ​ຖະ​ກິດ​ຂອງ​ໂລກ.

ອີງ​ຕາມ​ການ​ຂໍ້​ມູນ ​ຂອງ​ສອງ​ຝ່າ​ຍ​​ໃຫ້​ຮູ້ວ່າ: ກ່ອນໜ້ານີ້​ການ​ຮ່ວມ​ມື​ ດ້ານ​ການ​ຄ້າ​ອິນ​ເດຍ​ ກັບ ​ອາ​ຊຽນ​ ​ໃນ ລະ​ຫວ່າງ​ປີ 2007-2008 ມີ​ພຽງ​ແຕ່ 30 ຕື້ກວ່າ​ໂດ​ລາ​ສະ​ຫະ​ລັດ ແຕ່​ມາ​ເຖິງ​ປັດຈຸບັນ​ ໄດ້ເພີ່ມ​ຂຶ້ນ​ເປັນ 71 ຕື້ກວ່າ​ໂດ​ລາ​ສະ​ຫະ​ລັດ.  ອາ​ຊຽນ​ເປັນ​ຄູ່​ຮ່ວມ​ ດ້ານ​ການ​ຄ້າ​ໃຫຍ່​ອັນ​ທີ 4 ຂອງ​ອິນ​ເດຍ ແລະ ອິນ​ເດຍເປັນ​ຄູ່​ຮ່ວມ​ດ້ານ​ການ​ຄ້າ​​ໃຫຍ່​ ອັນ​ດັບ​ທີ 7 ຂອງ​ອາ​ຊຽນ.

ຂ່າວ: ເກີດ​ຂວັນ​ໃຈ ມາ​ລີ​ຈັນ​ສີ/ ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com
ກົດພາບອ່ານລາຍລະອຽດ

ກົດພາບອ່ານລາຍລະອຽດ

No comments

Powered by Blogger.