Header Ads

ສປປ ລາວ ກະກຽມເພື່ອການເຈລະຈາສົ່ງເສີມການຄ້າໄມ້ທີ່ຖືກກົດໝາຍກັບ EU ຄັ້ງທີ 2

ໃນວັນທີ 2 ສິງຫາ 2017 ຜ່ານມາ ທີ່ໂຮງແຮມຄຣາວພາຊາ, ນະຄອນຫຼວງວຽງຈັນ ໄດ້ມີການຈັດກອງປະຊຸມປຶກສາຫາລືກະກຽມເພື່ອການເຈລະຈາສົ່ງເສີມການຄ້າໄມ້ທີ່ຖືກກົດໝາຍ ຄັ້ງທີ 2 ກັບສະຫະພາບເອີຣົບ ຫຼື EU ພາຍໃຕ້ການເປັນປະທານຂອງ ທ່ານ ຊູຊາດ ໄຊຍະກຸມມານ, ຫົວໜ້າກົມປ່າໄມ້, ກະຊວງກະສິກໍາ ແລະ ປ່າໄມ້, ເຂົ້າຮ່ວມດ້ວຍ ທ່ານ ທິມ ດໍສັນ, ຊ່ຽວຊານປະຈຳຫ້ອງການ EU FLEGT Facility, ສະຖາບັນປ່າໄມ້ EU (European Forest Institute), ພ້ອມດ້ວຍນັກວິຊາການຈາກຈາກ EU, ຫົວໜ້າພະແນກ ແລະ ແຂກຖືເຊີນຈາກພາກສ່ວນທີ່ກ່ຽວຂ້ອງເຂົ້າຮ່ວມ 50 ກວ່າທ່ານ.
ທ່ານ ຊູຊາດ ໄຊຍະກຸມມານ ກ່າວວ່າ: ການຈັດກອງປະຊຸມໃນຄັ້ງນີ້ແມ່ນເພື່ອດຳເນີນຕາມແຜນງານການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ ລະຫວ່າງ ສປປ ລາວ ແລະ EU (Lao-EU FLEGT), ເຊິ່ງໄດ້ຮັບການລິເລີ່ມໂດຍລັດຖະບານແຫ່ງ ສປປ ລາວ ແລະ ບັນດາພາກສ່ວນທີ່ກ່ຽວຂ້ອງທັງຈາກພາຍໃນ ແລະ ຕ່າງປະເທດ ໂດຍມີເປົ້າໝາຍໃນການສົ່ງເສີມ ແລະ ຄຸ້ມຄອງປ່າໄມ້ທີ່ດີ ແລະ ການຫຼຸດຜ່ອນການຕັດໄມ້ທີ່ຜິດກົດໝາຍໃນລາວ ທັງເປັນການກະກຽມໃນການເຈລະຈາຄັ້ງທີ 2 ກັບ EU ໃນຂໍ້ຕົກລົງການເຂົ້າເປັນຄູ່ຮ່ວມສັນຍາການຄ້າແບບສະໝັກໃຈ ພາຍໃຕ້ການຈັດຕັ້ງປະຕິບັດກົດໝາຍປ່າໄມ້, ການຄຸ້ມຄອງ ແລະ ການຄ້າໄມ້ ລະຫວ່າງ ສປປ ລາວ ແລະ EU.

 ທັງນີ້, ທ່ານກ່າວຕື່ມອີກວ່າ: ສໍາລັບນິຍາມໄມ້ທີຖືກຕ້ອງຕາມກົດໝາຍ ຈະສະແດງໃຫ້ເຫັນການຄຸ້ມຄອງປ່າໄມ້ທີ່ດີ ແລະ ການບໍລິຫານຈັດການປ່າໄມ້ແບບຍືນຍົງ ເຊິ່ງຈະເປັນຜົນດີຕໍ່ກັບການເພີ່ມຂຶ້ນຂອງເນື້ອທີ່ປົກຫຸ້ມຂອງປ່າໄມ້ໃນ ສປປ ລາວ ແລະ ປະຕິບັດຕາມແຜນຍຸດທະສາດປ່າໄມ້ແຕ່ນີ້ ຮອດປີ 2020 ໃຫ້ມີເນື້ອທີ່ປົກຫຸ້ມກວມ 70%. 
ແຕ່ຢ່າງໃດກໍ່ຕາມ, ສໍາລັບການຈັດຕັ້ງປະຕິບັດຕົວຈິງກໍ່ມີພົບຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງໃນການປົກປັກຮັກສາປ່າໄມ້ ເນື່ອງຈາກພະນັກງານປ່າໄມ້ທີ່ເຮັດໜ້າທີ່ຄຸ້ມຄອງປ່າໄມ້ ຫຼື ປ່າສະຫງວດຍັງມີໜ້ອຍ ແລະ ກໍ່ຍັງມີຄົນບາງກຸ່ມທີ່ຍັງມີການລັກລອບຕັດໄມ້ແບບຜິດກົດໝາຍຢູ່, ຢ່າງໃດກໍ່ຕາມໃນເບື້ອງມະຫາພາກ ຄຳສັ່ງນາຍົກເລກທີ 15 ຈະເປັນຕົວຊ່ວຍເຮັດໃຫ້ການຄຸ້ມຄອງຕັດ ແລະ ຄ້າໄມ້ຖືກຕ້ອງຕາມກົດໝາຍ.


ແຫຼ່ງຂ່າວຈາກ ໜັງສືພິມເສດຖະກິດ ການຄ້າ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.