Header Ads

ລັດຖຸະບານລາວ ເລັ່ງແກ້ໄຂຜູ້ໄດ້ຮັບຜົນກະທົບສິ່ງກີດຂວາງ ຈາກໂຄງການທາງລົດໄຟ ລາວ-ຈີນ



ອີງຕາມການລາຍງາຍຂ່າວຂອງ ໜັງສືພີມ ເສດຖະກິດ-ການຄ້າ ວ່າ: ວັນທີ 18 ສິງຫາ 2017 ຜ່ານມານີ້, ທ່ານ ບຸນຈັນ ສິນທະວົງ ລັດຖະມົນຕີກະຊວງໂຍທາທິການ ແລະ ຂົນສົ່ງ ໄດ້ລາຍງານຕໍ່ກອງປະຊຸມຮ່ວມລະຫວາງຄະນະປະຈຳສະພາບແຫ່ງຊາດ ກັບລັດຖະບານ ປະຈຳປີ 2017 ກ່ຽວກກັບການທົບທວນລາຄາຫົວໜ່ວຍຄ່າຊົດເຊີຍສິ່ງກີດຂວາງ ໂຄງການກໍ່ສ້າງທາງລົດໄຟ ລາວ-ຈີນ ກ່ຽວກັບຜົນສຳເລັດ ແລະ ຄວາມຄືບໜ້າພື້ນຖານການຈັດຕັ້ງປະຕິບັດ ເຊິ່ງສາມາດສະຫຼຸບໄດ້ 8 ຂັ້ນ.


ທ່ານຍັງກ່າວຕື່ມວ່າ: ສຳລັບຄວາມຄືບໜ້າການເຈລະຈາກັບປະຊາຊົນ ໃນການຍົກຍ້າຍສິ່ງກີດຂວາງ ແລະ ມອບພື້ນທີ່ກໍ່ສ້າງໃຫ້ບໍລິສັດຮັບເໝົາກໍ່ສ້າງຂອງຈີນ ມາຮອດວັນທີ 10 ກໍລະກົດ 2017 ສະເພາະນະຄອນຫຼວງວຽງຈັນໄດ້ ມອບພື້ນທີ່ໃຫ້ຜູ້ຮັບເໝົາ ຈຳນວນ 15.26 ກິໂລແມັດ ເທົ່າກັບ 38.15% ຂອງຄວາມຍາວທັງໝົດ 40 ກິໂລແມັດ; ແຂວງວຽງຈັນ ມອບ 82.26 ກິໂລແມັດ ເທົ່າກັບ 58.56% ຂອງຄວາມຍາວທັງໝົດ 145.5 ກິໂລແມັດ; ແຂວງຫຼວງພະບາງ ມອບ 49 ກິໂລແມັດ ເທົ່າກັບ 61.25% ຂອງຄວາມຍາວທັງໝົດ 80 ກິໂລແມັດ; ແຂວງອຸດົມໄຊ ມອບ 56.97 ກິໂລແມັດ ເທົ່າກັບ 45% ຂອງຄວາມຍາວທັງໝົດ 126.6 ກິໂລແມັດ ແລະ ແຂວງຫຼວງນ້ຳທາ ມອບພື້ນທີ່ໃຫ້ບໍລິສັດຮັບເໝົາກໍ່ສ້າງທາງລົດໄຟທັງໝ້ 219 ກິໂລແມັດ ເທົ່າກັບ 53.57% ຂອງຄວາມຍາວທັງໝົດ 409 ກິໂລແມັດ.



ຕາມການລາຍງານຂອງ ທ່ານ ລັດຕະນະມະນີ ຄູນນິວົງ ຮອງລັດຖະມົນຕີກະຊວງໂຍທາທິການ ແລະ ຂົນສົ່ງ ຕໍ່ກອງປະຊຸມ ຄະນະຊີ້ນຳໂຄງການກໍ່ສ້າງທາງລົດໄຟແຕ່ຊາຍແດນລາວ-ຈີນ ຫາ ນະຄອນຫຼວງວຽງຈັນ ເມື່ອວັນທີ 19 ກໍລະກົດ 2017 ຜ່ານມາໃຫ້ຮູ້ວ່າ: ມາຮອດປັດຈຸບັນ ບໍລິສັດຮັບເໝົາກໍ່ສ້າງເສັ້ນທາງລົດໄຟລາວ-ຈີນ ໄດ້ມີການຕັ້ງແຄມສຳເລັດແລ້ວ 88 ແຫ່ງ, ແຄມທີ່ປຶກສາໂຄງການ 12 ແຫ່ງ(ລວມ 100 ແຫ່ງ); ກໍ່ສ້າງທາງຮ່ອມ ເພື່ອເຂົ້າຫາສະຖານທີ່ກໍ່ສ້າງໄດ້ 657.9 ກິໂລແມັດ, ຂົວ 2,342 ແມັດ; ຕິດຕັ້ງສາຍສົ່ງໄຟຟ້າໄດ້ 360.2 ກິໂລແມັດ ແລະ ຕິດຕັ້ງໝໍ້ແປງໄຟໄດ້ 172 ໜ່ວຍ; ກໍ່ສ້າງລະບົບນ້ຳປະປາ ເພື່ອເຂົ້າຫາແຄ້ມ ແລະ ສະຖານທີ່ກໍ່ສ້າງໄດ້ 77 ກິໂລແມັດ; ເຈາະອຸໂມງໄດ້ 49 ອຸໂມງ ຊຶ່ງປະກອບມີ 101 ຈຸດກໍ່ສ້າງລວມຄວາມຍາວທັງໝົດໄດ້ 5,835ແມັດ, ຊີເຈາະເສົາຂົວໄດ້ 268 ເສົາ ລວມຍາວ 7,304ແມັດ; ຕິດຕັ້ງໂຮງໂມ້ຊີມັງ ສຳເລັດ 14 ແຫ່ງ, ຫ້ອງທົດລອງ 18 ແຫ່ງ; ໂດຍລວມເຫັນວ່າມີຄວາມຄືບໜ້າປະມານ 31.35% ຂອງແຜນການປີ.

ພາບແລະຂ່າວ: ເສດຖະກິດ-ການຄ້າ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.