Header Ads

ວັດທະນະທຳ-ສັງຄົມ ສື່ມວນຊົນລາວ ນັບມື້ເຕີບໃຫຍ່ຂະຫຍາຍຕົວ ທ່າມກາງສິ່ງທ້າທ້າຍຫລາຍຢ່າງ



ການ​ເຕີບ​ໃຫຍ່​ຂະຫຍາຍຕົວ ​ຂອງ​ສື່​ມວນ​ຊົນຕະຫລອດ 67 ປີ ຈາກ​ການ​ເປັນພຽງ​ກະບອກ​ສຽງ​ຂອງ​ພັກ-ລັດ ​ແລະ ປະຊາຊົນລາວບັນດາເຜົ່າ ໃນການນໍາສະເໜີຂໍ້ມູນຂ່າວສານ ຜ່ານ ເຄື່ອງມືແບບປະຖົມປະຖານທີ່ບໍ່ທັນສະໄໝ ໃນເມື່ອກ່ອນ ຈົນໄດ້ຮັບການພັດທະນາຢ່າງຮອບດ້ານ ສໍາລັບສື່ມວນຊົນລາວ ທ່າມກາງສິ່ງທ້າທາຍ ແລະ ສະພາບການຂອງໂລກ ທີ່ມີການປ່ຽນແປງ ແຕ່ລະ​ໄລຍະ ໄດ້ຮຽກຮ້ອງໃຫ້ນັກຂ່າວ, ນັກຂຽນ, ນັກປະພັນ ແລະ ອົງການກ່ຽວຂ້ອງ ຕ້ອງປັບປຸງຄວາມສາມາດຂອງຕົນເອງ ໄປຄວບຄູ່ກັບການຫັນທິດ ຈາກລະບົບອານາລ໋ອກ ​ໄປ​ສູ່ລະບົບດີຈີຕອນ.

ໃນວັນທີ 11 ສິງຫາ 2017 ນີ້ ທີ່ຫໍວັດທະນະທໍາແຫ່ງຊາດ ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ໄດ້ຈັດພິທີໂຮມຊຸມນຸມສະເຫລີມສະຫລອງ ວັນສື່ມວນຊົນແຫ່ງຊາດລາວ ແລະ ວັນພິມຈໍາໜ່າຍຄົບຮອບ 67 ປີ (13 ສິງຫາ 1950 -13 ສິງຫາ 2017) ໂດຍໄດ້ຮັບກຽດເຂົ້າຮ່ວມ ແລະ ໂອ້ລົມຂອງທ່ານ ບໍ່ແສງຄໍາ ວົງດາລາ ລັດຖະມົນຕີກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ, ມີບັນດາຮອງລັດຖະມົນຕີ, ​ພະນັກງານ​ອາວຸ​ໂສ, ພ້ອມ​ດ້ວຍ ​ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

​ໃນ​ໂອກາດ​ດັ່ງກ່າວ​, ທ່ານ ບໍ່ແສງຄໍາ ວົງດາລາ ​ໄດ້​ໃຫ້​ກຽດ​ໂອ້​ລົ​ມ ​ໂດຍ​ເນັ້ນ​ໃຫ້​ບັນດາ​ສື່​ມວນ​ຊົນ ​ແລະ ພີ​ມຈໍາ​ໜ່າຍ ​ຕ້ອງ​ເອົາ​ໃຈ​ໃສ່​ພັດທະນາ​ວຽກ​ງານ​ດັ່ງກ່າວ ​ໃຫ້​ດີ​ຂຶ້ນ​ທາງ​ດ້ານ​ຄຸນ​ນະພາ​ບ ​ແລະ ປະລິມານ​ ເພີ່ມ​ຄວາມ​ສາມາດ​ການ​ແຂ່ງຂັນ​ໃຫ້​ດີ​ຂຶ້ນ. ປັດຈຸບັນ ​ສື່​ມວນ​ຊົນ​ພາກ​ພື້ນ ​ແລະ ​ໃນ​ໂລກ ມີ​ການ ​ຂະຫຍາຍຕົວ​ຢ່າງ​ວ່ອງ​ໄວ ​ໃນ​ການ​ເຊື່ອມ​ຕົວ​ເຂົ້າ​ສູ່​ລະບົບ​ທັນ​ສະ​ໄໝ ​ເຊິ່ງ​ເປັນ​ການ​ຊຸກຍູ້​ໃຫ້​ສື່​ມວນ​ຊົນ​ລາວ ​ຕ້ອງ​ໄດ້​ບຸກບືນ ​ແລະ ປັບປຸງ​ຕົນ​ເອງ​ໃຫ້​ທັນ​ກັບ​ຍຸກ​ສະ​ໄໝ​ເຕັກ​ໂນ​ໂລ​ຊີ. ພ້ອມ​ນັ້ນ ການພັດທະນາ​​ບຸກຄະລາ​ກອນ ​ໃນ​ທຸກ​ດ້ານ​ກໍ​ຕ້ອງໃຫ້​ມີ​ຄວາມ​ຮູ້, ຄວາມ​ສາມາດ, ຄຽງ​ຄູ່​ກັບ​ວຽກ​ງານ​ສື່​ມວນ​ຊົນ ​ແລະ ການ​ພີ​ມຈໍາ​ໜ່າຍ​ໃຫ້​ມີ​ຜະລິດ​ຕະພັນ​ຫລາກ​ຫລາຍ, ພັດທະນາພື້ນຖານ​ໂຄ່ງ​ລ່າງ, ພັດທະນາ​ວັດຖຸອຸປະ​ກອນຮັບ​ໃຊ້​ ໜ້າ​ທີ່​ວຽກ​ງານ​ຈາກ​ພາກ​ລັດ ​ແລະ ​ເອກະ​ຊົນ ​ເພື່ອ​ຮອງ​ຮັບ​ກັບ​ຄວາມ​ຮຽກຮ້ອງ​ຕ້ອງການ​ຂອງ​ວຽກ​ງານ​. ​ໃນ​ນັ້ນ ການ​ນໍາພາ​ແນວ​ຄິດ​ການ​ເມືອງ ກໍ​ເປັນ​ບັນຫາ​ສໍາຄັນ​​​ທີ່​ຈະ​ຕ້ອງ​ໄດ້​ເອົາ​ໃຈ​ໃສ່ ​ໂດຍ​ສະ​ເພາະ ​ພະນັກງານ​ທີ່​ເຮັດ​ໜ້າ​ທີ່​ການ​ເມືອງ ຈະ​ເປັນ​ນັກ​ຂ່າວ, ການ​ພີ​ມຈໍາໜ່າຍ ​ທັງ​ພາກ​ລັດ-ພາກ​ເອກະ​ຊົນ ຖ້າ​ບໍ່​ເອົາ​ໃຈ​ໃສ່​ ກໍຈະ​ນໍາ​ໃຊ້​ໄປ​ໃນ​ທາງ​ທີ່​ຜິດ ​ແລະ ບໍ່​ມີ​ປະສິດທິ​ຜົນ ​​ຕ້ອງ​ໄດ້​ມີ​ການ​ຫລີກ​ເວັ້ນ ​ແລະ ຈໍາ​ແນ​ກ​ໃຫ້​ຖືກຕ້ອງ. ສະ​ນັ້ນ​​ຕ້ອງ​ເສີດ​ຊູຄວາມ​ຮັບຜິດຊອບ​ທາງ​ດ້ານ​ການ​ເມືອງ​​ໃຫ້ສູງ ຕ້ອງ​ຢຶດໝັ້ນ​ຕາມ​ກົດໝາຍ​ວ່າ​ດ້ວຍ​ສື່​ມວນ​ຊົນ ​ເພາະ​ສື່​ມວນ​ຊົນ​ເປັນ​ກະບອກ​ສຽງ ​​ໃນ​ການ​ໂຄ​ສະນາ​ແນວທາງ​ນະ​ໂຍບາຍ​ຂອງ​ ພັກ - ລັດ ​ເປັນ​ເວທີ​ສະ​ແດງ​ແນວຄວາມ​ຄິດ​​ເຫັນ ​ແລະ ສ່ອງ​ແສງ​​ໃຫ້​ສັງຄົມ​ຮັບ​ຮູ້ ​ແລະ ​ເຂົ້າ​ໃຈ.

​​ໃນ​ໂອກາດ​ດັ່ງກ່າວ, ທ່ານ ສະຫວັນ​ຄອນ ລາຊະມຸນຕີ ຮອງ​ລັດຖະມົນຕີ​ກະຊວງ​ຖະ​ແຫລ​ງຂ່າວ,ວັດທະນະ​ທໍາ ​ແລະ ທ່ອງ​ທ່ຽວ ​ກ່າວ​ວ່າ: ມາ​ຮອດປັດຈຸບັນ​ ສື່​ສິ່ງ​ພິມ​ມີ​ໜັງສື​ພິມ ​ແລະ ວາລະສານ 144 ສະບັບ ​ໃນ​ນັ້ນ​ ມີ​ໜັງສື​ພິມ 29 ສະບັບ (ລາຍ​ວັນ​ເປັນ 11 ສະບັບ), ວາລະສານ 111 ສະບັບ ​ແລະ ​ໃບ​ຂ່າວ 4 ສະບັບ, ວິທະຍຸ​ກະຈາຍສຽງ​ມີ 63 ສະຖານີ​ ສູນ​ກາງ 11 ສະຖານີ ​ແລະ ທ້ອງ​ຖິ່ນ 52 ສະຖານີ ກວມ 95%, ​ໂທລະພາບ 37 ສະຖານີ, ສູນ​ກາງ 9 ສະຖານີ ​ແລະ ທ້ອງ​ຖິ່ນ 28 ສະຖານີ, ລະບົບ​ໂທລະ​ໂຄ່ງ​ ສາມາດ​ຕິດ​ຕັ້ງ​ໄດ້ 4.835 ບ້ານ ​ໃນ​ຈໍານວນ 8.662 ບ້ານ​ ໃນ​ທົ່ວ​ປະ​ເທດ. ສໍາລັບ​ວຽກ​ງານ​ພິມ​ຈໍາ​ໜ່າຍ​ທົ່ວ​ປະ​ເທດມີ 103 ​ແຫ່ງ ຂອງ​ລັດ 7 ​ແຫ່ງ, ມີ​ສຳນັກ​ພິມ 20 ​ແຫ່ງ ​ເປັນ​ຂອງ​ລັດ 2 ​ແຫ່ງ. ປັດຈຸບັນ ​ມີນັກ​ປະພັນ 145 ຄົນ ຍິງ 30 ຄົນ.

ຂ່າວ: ຂັນ​ໄຊ, ພາບ:​ ເກດ/ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.