Header Ads

ຊົມເຊີມນໍ້າໃຈປະກອບສ່ວນ! ຮ້ານຄຳລີຈ່ຽນ ມອບອຸປະກອບກູ້ຊີບໃຫ້ແກ່ອາສາກູ້ໄພສະຫວັນນະເຂດ

 

ກຸ່ມ​ບໍລິສັດ​ດວງ​ເດືອນ (ຮ້ານ​ຄຳ ລີ​ຈ່ຽນ) ​ໄດ້​ມອບ​ອຸປະ​ກອນ​ກູ້​ຊີບ ​ໃຫ້​ແກ່​ມູນ​ນິທິ ອາສາ​ຊ່ວຍ​ເຫຼືອ​ກູ້​ໄພ ​ແຂວງ​ສະຫວັນ​ນະ​ເຂດ ​ໃນ​ວັນ​ທີ 31 ກໍລະກົດ 2017 ເຊິ່ງປະກອບ​ມີ: ຕຽງ​ນອນ​ຄົນ​ເຈັບ, ລາງ​ຕຽງ, KED (​ຊຸດ​ດາມ​ແຂນ, ຂາ​ຫັກ, ດາມ​ແອວ, ສະ​ໂພ​ກ) ຈຳນວນ 3 ຊຸດ, ຈວຍ​ກັ້ນ​ທາງ 3 ອັນ, ​ເຝືອກ​ດາມ 3 ຊຸດ, ກະ​ເປົ໋າຢາ 3 ໜ່ວຍ, ອາມ​ບູ (ປອກຄໍ), ​ໄຟ​ສາຍ 2 ​ເຄື່ອງ, ໝວກ 50 ຫົວ, ພ້ອມ​ນັ້ນ ຍັງ​ມີ: ນ້ຳ​ດື່ມ, ຈອກ​ແກ້ວ. ລວມມູນ​ຄ່າ 51 ລ້ານ​ກີບ. ​ເຊິ່ງພິທີ​ຄັ້ງ​ນີ້ ​ໄດ້​ຈັດ​ຂຶ້ນ​ທີ່​ຮ້ານ​ຄຳ ລີ​ຈ່ຽນ ສາຂາ 2. ​ໂດຍ​ຜູ້​ມອບ​ແມ່ນ ທ່ານ ຄຳ​ສັງ ​ແລະ​ນາງ​ ດວງ​ເດືອນ ພົງ​ສະຫວັນ ປະທານ​ກຸ່ມ​ບໍລິສັດ​ດວງ​ເດືອນ ​ແລະ​ຮ້ານ​ຄຳ ລີ​ຈ່ຽນ, ຜູ້​ຮັບ​ແມ່ນ​ທ່ານ ພັທ ມະນີ​ເພັດ ບຸບຜາ​ລາສີ ປະທານ​ມູນ​ນິທິ ອາສາ​ຊ່ວຍ​ເຫຼືອ​ກູ້​ໄພ ສະຫວັນ​ນະ​ເຂດ.

ໃນ​ໂອກາດ​ດັ່ງກ່າວ ທ່ານ ນາງ ດວງ​ເດືອນ ກໍ່​ໄດ້​ຍົກ​ໃຫ້​ເຫັນ​ເຖິງ​ຄວາມ​ສຳຄັນ ​ແລະ​ຄວາມ​ຈຳ​ເປັນ​ຂອງ ໜ່ວຍ​ກູ້​ໄພ ທີ່​ເຮັດ​ໜ້າ​ທີ່​ໂດຍ​ບໍ່​ຫວັງ​ສິ່ງ​ຕອບ​ແທນ, ​​ບໍ່​ມີ​ວັນພັກ. ດັ່ງ​ນັ້ນ ທາງ​ກຸ່ມ​ບໍລິສັດ​ດວງ​ເດືອນ ກໍ່​ຄື​ຮ້ານ​ຄຳ ລີ​ຈ່ຽນ ກໍ່​ໄດ້​ນຳ​ເອົາ​ວັດຖຸ​ຈຳນວນ​ດັ່ງກ່າວ​ນີ້ມອບ​ໃຫ້​ ​ແລະ​ຫວັງ​ຢ່າງ​ຍິ່ງ​ວ່າ ລູກ​ຄ້າ​ທີ່​ມາ​ໃຊ້​ບໍລິການ ຫຼື​ມວນ​ຊົນ​ທົ່ວ​ໄປ ຈະ​ໄດ້​ຮັບ​ການ​ຊ່ວຍ​ເຫຼືອ​ຢ່າງ​ທ່ວງທັນ ​ແລະ​ໄດ້​ຮັບ​ຄວາມ​ປອດ​ໄພ​ທຸກ​ປະການ.

 ຈາກ​ນັ້ນ ທ່ານ ພັທ ມະນີ​ເພັດ ປະທານ​ມູນ​ນິທິ ກໍ່​ໄດ້​ຕາງໜ້າ​ແກ່​ອາສາ​ສະ​ໝັນ ​ໄດ້​ກ່າວສະ​ແດງ​ຄວາມ​ຂອບ​ໃຈ​ມາ​ຍັງ​ທ່ານ ຄຳ​ສັງ ​ແລະ​ທ່ານ​ ນາງ​ ດວງ​ເດືອນ ຕະຫຼອດ​ເຖິງ​ພະນັກງານ, ກຳມະກອນ​ໃນ​ບໍລິສັດ ທີ່​ໄດ້​ສະຫຼະ​ວັດຖຸ-ປັດ​ໄຈ ​ແລະ​ເຫັນ​ໄດ້​ຄວາມ​ຈຳ​ເປັນ​ຂອງ​ໜ່ວຍ​ກູ້​ໄພ​ພວກ​ເຮົາ, ພວກ​ເຮົາ​ຈະ​ໃຫ້​ຄຳ​ໝັ້ນ​ສັນຍາ​ວ່າ ຈະ​ນຳ​ເອົາ​ອຸປະກອນ​ດັ່ງກ່າວ ​ໄປ​ນຳ​ໃຊ້​ໃຫ້​ເກີດ​ປະ​ໂຫຍ​ດສູງ​ສຸດ ​ໃນ​ການ​ກອບ​ກູ້, ຊ່ວຍ​ເຫຼືອ​ຜູ້​ທີ່​ເກີດ​ອຸປະຕິ​ເຫດ, ອຸປະຕິ​ໄພ, ອຸ​ທົກ​ກະ​ໄພ​ ​ແລະ​ອື່ນໆ ​ເຊິ່ງອຸປະກອນ​ດັ່ງກ່າວ​ນີ້ ພວກ​ເຮົາ​ມີ​ຄວາມ​ຈຳ​ເປັນ ​ແລະ​ມີ​ຄວາມ​ສຳຄັນ​ຫຼາຍ ​ໃນ​ການ​ນຳ​ໃຊ້​ເຂົ້າ​ໃນ​ວຽກ​ງານ​ຂອງ​ພວກ​ເຮົາ.

ປະຈຸ​ບັນ​ນີ້ ມູນ​ນິທິ​ອາສາ​ຊ່ວຍ​ເຫຼືອ​ກູ້​ໄພ ສະຫວັນ​ນະ​ເຂດ, ມີ​ອາສາ​ສະໝັກ​ທັງ​ໝົດ 67 ຄົນ, ​ໃນ​ຕະຫຼອດ​ໄລຍະ 1 ປີກ​ວ່າ​ຜ່ານ​ມາ ສາມາດ​ອອກ​ຊ່ວຍ​ເຫຼືອ​ສັງຄົມ​ໄດ້​ທັງ​ໝົດ 800 ກວ່າ​ຄັ້ງ, ​ໃນ​ນັ້ນ ຍັງ​ໄດ້​ມີ​ການ​ຊ່ວຍ​ງານ​ສັງຄົມ ​ເປັນ​ຕົ້ນ: ງານ​ບຸນ​ປະ​ເພນີ​ທີ່​ມີ​ຄວາມ​ສ່ຽງ ​ເຊັ່ນ: ງານ​ບຸນ​ບັ້ງ​ໄຟ ​ແລະ​ງານ​ອື່ນໆ ທີ່​ເຫັນ​ວ່າ​ມີ​ຄວາມ​ສ່ຽງ ໜ່ວຍ​ກູ້​ໄພ​ກໍ່​ໄດ້​ປະຈຳການ​ຢ່າງ​ຕໍ່​ເນື່ອງ. ດັ່ງ​ນັ້ນ ມານະ​ໂອກາດ​ນີ້ ກໍ່​ຂໍ​ຮຽກຮ້ອງ​ມາ​ຍັງ​ພາກສ່ວນ​ຕ່າງໆ ທີ່​ມີ​ຈຸດປະສົງ​ຢາກ​ປະກອບສ່ວນ ສາມາດ​ຕິດ​ຕໍ່​ໄດ້​ທີ່: 020 28285454, 020 98985454 ​ໄດ້​ທຸກ​ເວລາ.

ແຫລ່ງຂ່າວຈາກ ແຂວງສະຫວັນນະເຂດ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.