Header Ads

ຂອບໃຈ! ສ.ເກົາຫຼີ ຊ່ວຍສ້າງໂຮງໝໍ ຢູ່ບ້ານຄຳປ່າແໜ ເມືອງຈຳພອນ



ພິທີວາງສີລາລືກກໍ່ສ້າງໂຮງໝໍນ້ອຍຄຳປ່າແໜ-ເຢີມິນຣັກ ດ້ວຍທຶນຊ່ວຍເຫຼືອຂອງສະມາຄົມຄອມສິດ ອາຣຶມດາອຸນ ຊາຣາມດືລ ແຫ່ງ ສ.ເກົາຫຼີ ໄດ້ຈັດຂຶ້ນໃນວັນທີ 29 ກໍລະກົດ 2017 ທີ່ບ້ານຄຳປ່າແໜ ເມືອງຈຳພອນ ແຂວງສະຫວັນນະເຂດ ສປປ ລາວ ໂດຍການເປັນກຽດເຂົ້າຮ່ວມຂອງທ່ານ ສັນຕິພາບ ພົມວິຫານ, ທ່ານ ວິໄລສຸກ ພິມມະສອນ ສສຊ ເຂດເລືອກຕັ້ງທີ 9 ແຂວງຊຽງຂວາງ ຜູ້ປະສານງານ ແລະລະດົມຂົນຂວາຍໂດຍກົງທຶນ ກໍ່ສ້າງໂຮງໝໍນ້ອຍຄຳປ່າແໜ-ເຢີມິນຣັກ, ທ່ານ ກວັນ ເກື່ອງ ເອິບ ປະທານສະມາຄົມອາຣຶມດາອຸນ ຊາຣາມດື ພ້ອມທີມງານຈາກ ສ.ເກົາຫຼີ ຊຶ່ງເປັນຜູ້ປະກອບສ່ວນທຶນຮອນຫຼັກ ຈາກນີ້ກໍ່ຄະນະການນຳຈາກແຂວງ, ເມືອງ, ພະແນກການ, ສສຊ, ສສຂ ປະຈຳເມືອງຈຳພອນ, ອຳນາດການປົກຄອງ ແລະພໍ່ແມ່ປະຊາຊົນບ້ານຄຳປ່າແໜເຂົ້າຮ່ວມຢ່າງພ້ອມພຽງ.


ທ່ານ ວິໄລສຸກ ພິມມະສອນ ກ່າວວ່າ: ໂຮງໝໍນ້ອຍຄຳປ່າແໜ-ເຢີມິນຣັກ ລວມມູນມີມູນຄ່າການກໍ່ສ້າງທັງໝົດ 62.500 ໂດລາສະຫະລັດ ໃນນີ້ ສະມາຄົມເຢີມິນຣັກປະກອບສ່ວນ 40.000 ໂດລາ ແລະແຂວງສະຫວັນນະເຂດປະກອບ 22.500 ໂດລາ. ຊຶ່ງຄາດຄະເນຈະມີການປະກອບອຸປະກອນເຄື່ອງມືການແພດ, ລົດສົ່ງຄົນເຈັບ, ຄອມພີວເຕີ ແລະອື່ນໆໃນມູນຄ່າປະມານ 200.000 ກວ່າໂດລາ ໂດຍມອບໃຫ້ບໍລິສັດດາລາວົງກໍ່ສ້າງເຄຫາສະຖານຈຳກັດຜູ້ດຽວ ເປັນຜູ້ຮັບເໝົາກໍ່ສ້າງດ້ວຍການທາບທາມລາຄາຕ່ຳສຸດ, ການກໍ່ສ້າງຄາດວ່າຈະໃຫ້ສຳເລັດ ແລະມີການມອບ-ຮັບໃນຕົ້ນເດືອນຕຸລາ 2017ນີ້.



ໂອກາດນີ້, ທ່ານເຈົ້າແຂວງສະຫວັນນະເຂດ ກໍ່ໄດ້ກ່າວສະແດງຄວາມຂອງໃຈຕໍ່ການປະກອບສ່ວນທຶນຮອນຊ່ວຍເຫຼືອສ້າງໂຮງໝໍນ້ອຍແຫ່ງນີ້ຂຶ້ນມາ ເຊິ່ງເປັນການເສີມຂະຫຍາຍສາຍພົວພັນການຮ່ວມມືລະຫວ່າງສອງປະເທດ ກໍ່ຄືສປປ ລາວ ແລະສ.ເກົາຫຼີ ໃຫ້ມີຄວາມແໜ້ນແຟ້ນຂຶ້ນກວ່າເກົ່າ ອີກທັງກໍ່
ເພື່ອແນໃສ່ເຮັດໃຫ້ປະຊາຊົນພາຍໃນບ້ານຄຳປ່າແໜ ແລະບ້ານໃກ້ຄຽງໄດ້ເຂົ້າເຖິງການບໍລິການສາທາລະນະສຸກ ເພື່ອແກ້ໄຂຄວາມທຸກຍາກຂອງປະຊາຊົນບັນເຜົ່າພ້ອມນີ້ກໍ່ຂໍຮັບປາກວ່າຈະນຳໃຊ້ໂຮງໝໍແຫ່ງດັ່ງກ່າວໃຫ້ເກີດປະໂຫຍດສູງສຸດ.

 ນອກນີ້, ໃນພິທີກໍ່ຍັງໄດ້ມີການມອບເຄື່ອງຊ່ວຍເຫຼືອເປັນຕົ້ນເຄື່ອງນຸ່ງຫົ່ມ, ເຄື່ອງບໍລິໂພກ-ອຸປະໂພກໃຫ້ປະຊາຊົນບ້ານຄຳປ່າແໜນຳອີກ.

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.