Header Ads

ທ່ານບຸນຄົງ ຫຼ້າສຸກັນ ລົງຢ້ຽມຢາມ ແລະ ມອບເຄື່ອງຊ່ວຍເຫຼືອຜູ້ປະສົບໄພນໍ້າຖ້ວມຢູ່ເມືອງແກ່ນທ້າວ


ໃນວັນທີ 6 ສິງຫາ 2017 ນີ້, ທ່ານ ບຸນຄົງ ຫຼ້າສຸກັນຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ເດີນທາງມາຢ້ຽມຢາມ ເຮັດວຽກ ແລະ ມອບເຄື່ອງຊ່ວຍເຫຼືອໃຫ້ປະຊາຊົນທີ່ປະສົບໄພພິບັດນໍ້າຖ້ວມຢູ່ເມືອງແກ່ນທ້າວ ແຂວງໄຊຍະບູລີພາທາງ.  ທ່ານໄດ້ຮັບການຕ້ອນຮັບຈາກທ່ານ ສໍາລານ ສຸວັັນນະໂຊດ ເຈົ້າເມືອງໆແກ່ນທ້າວ, ມີຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການ, ກົມກອງ ແລະ ອໍານາດການປົກຄອງບ້ານເຂົ້າຮ່ວມຕ້ອນຮັບຢ່າງຫຼວງຫຼາຍ.


​ໂອກາດນີ້, ທ່ານເຈົ້າເມືອງແກ່ນທ້າວ ໄດ້ຂຶ້ນລາຍງານໃຫ້ທ່ານຮອງລັດຖະມົນຕີຮັບຊາບ ກ່ຽວກັບສະພາບໄພນໍ້າຖ້ວມ ແລະ ການຊ່ວຍເຫຼືອບັນເທົາທຸກແກ່ຜູ້ປະສົບອຸທົກກະໄພ ໂດຍສະເພາະນໍ້າຖ້ວມໄຫຼຊຸແຮງ ຢູ່ 6ບ້ານຂອງເມືອງແກ່ນທ້າວ ຄື: ບ້ານໜອງ, ປົ່ງແດງ, ຫ້ວຍເລີກ, ວັງປູນ, ຫ້ວຍບູຮາ ແລະ ບ້ານປາກແຄມ. ສ້າງຄວາມເສຍຫາຍໜັກໃຫ້ແກ່ເຮືອນຊານບ້ານຊ່ອງ, ສັດລ້ຽງ, ຊັບສິນຂອງປະຊາຊົນ ເຊິ່ງມີປະຊາຊົນຖືກຜົນກະທົບຈາກໄພພິບັດໄພທໍາມະຊາດໃນຄັ້ງນີ້ ຈໍານວນ 141 ຄອບຄົວ, ມີຈໍານວນພົນທັງໝົດ 673 ຄົນ, ຍິງ 315 ຄົນ, ມູນຄ່າເສຍທັງໝົດ 15 ຕື້ກວ່າກີບ, ພ້ອມນີ້ ທ່ານ ສໍາລານ ສຸວັັນນະໂຊດ ເຈົ້າເມືອງໆແກ່ນທ້າວ ຍັງໄດ້ແຈ້ງໃຫ້ຊາບເຖິງການແກ້ໄຂຊ່ວຍເຫຼືອຜ່ານມາ ເຊິ່ງພາຍຫຼັງເກີດເຫດການອຸທົກກະໄພ.

ທາງເມືອງໄດ້ຮີບຮ້ອນຄົ້ນຄວ້າວິທີແກ້ໄຂ ແລະ ຊ່ວຍເຫຼືອບັນເທົາທຸກເບື້ອງຕົ້ນທັນທີ. ພ້ອມທັງແຕ່ງຕັັັັັັ້ງໃຫ້ມີຜູ້ປະຈໍາການ ຕະຫຼອດ 24 ຊົ່ວໂມງ ເຊິ່ງຈຸດສູນລວມບັນຊາແມ່ນຫ້ອງວ່າການປົກຄອງເມືອງ, ໄດ້ແຕ່ງຕັ້ງຮອງເຈົ້າເມືອງຫົວໜ້າຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນເມືອງ, ພ້ອມດ້ວຍຄະນະປະຈໍາພັກເມືອງຜູ້ຊີ້ນໍາກຸ່ມບ້ານ, ເລຂາຄະນະພັກຮາກຖານກຸ່ມບ້ານທີ່ເກີດໄພພິບັດນໍ້າຖ້ວມໄຫຼຊຸແຮງ ໂດຍສະເພາະບ້ານໜອງ ແລະ ປົ່ງແດງ ແລະ ໄດ້ຈັດສົ່ງອ້າຍນ້ອງທະຫານ, ຕໍາຫຼວດ ຈໍານວນ 32 ສະຫາຍ, ຈາກກອງບັນຊາການທະຫານເມືອງ, ກອງຮ້ອຍຊາຍແດນ ຄ 158 ແລະ ກອງບັນຊາການ ປກສ ເມືອງ ລົງຊ່ວຍເຫຼືອປະຊາຊົນ. ມາຮອດປັດຈຸບັນນີ້ ຍອດລາຍຮັບຈາກການຊ່ວຍເຫຼືອຂອງການນໍາຂັ້ນຕ່າງໆ, ບັນດາສໍານັກງານ, ອົງການຈາກແຂວງ, ເມືອງ, ບ້ານ, ຈາກນັກທຸລະກິດຜູ້ປະກອບການ, ພໍ່ແມ່ປະຊາຊົນພາຍໃນເມືອງລວມມູນຄ່າທັງໝົດ 200 ລ້ານກວ່າກີບ, ໃນນີ້ ເປັນເງິນສົດ 47.300.000 ກວ່າກີບ.


ໃນໂອກາດນີ້, ທ່ານຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ໄດ້ມອບເຄື່ອງຊ່ວຍເຫຼືອໃຫ້ຄອບຄົວປະຊາຊົນ ທີ່ປະສົບໄພພິບັດນໍ້າຖ້ວມຄັ້ງນີ້, ລວມມູນຄ່າທັງໝົດ 259 ລ້ານກວ່າກີບ ປະກອບມີເຂົ້າສານ 8.000 ກວ່າກິໂລ, ສັງກະສີ 2.600 ກວ່າແຜ່ນ, ເຫຼັກຕະປູ 1.500 ກວ່າກິໂລ ແລະ ເຄື່ອງໃຊ້ໃນຄົວເຮືອນ 50 ກວ່າຊຸດ.

ກ່າວມອບໂດຍທ່ານ ບຸູນຄົງ ຫຼ້າສຸກັນ ຮອງລັດຖະມົນຕີກະຊວງແຮງງານ ແລະ ສະຫວັດີການສັງຄົມ ແລະ ກ່າວຮັບໂດຍທ່ານ ສໍາລານ ສຸວັນນະໂຊດ ເຈົ້າເມືອງໆແກ່ນທ້າວ ໂດຍຊ່ອງໜ້າທ່ານ ຍັນຍົງ ສີປະເສີດ ຮອງເຈົ້າແຂວງໆໄຊຍະບູລີ, ບັນດາຫົວໜ້າກົມ, ຫົວໜ້າພະແນກການຈາກສູນກາງແຂວງ ແລະ ເມືອງ ເຂົ້າຮ່ວມເປັນສັກຂີພະຍານ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.