Header Ads

7 ແຂວງພາກເໜືອເປີດກອງປະຊຸມເຜີຍແຜ່ວຽກງານອະໄພຍະໂທດປະຈໍາປີ 2017



ເພື່ອເຮັດໃຫ້ການຈັດຕັ້ງປະຕິບັດວຽກງານອະໄພຍະໂທດໃນປີ 2017 ມີຄວາມເປັນເອກະພາບ, ຮັບ ປະກັນຄວາມຖືກຕ້ອງດ້ານເນື້ອໃນ, ທັນຕາມກໍານົດເວລາແລະເປັນຂະບວນຟົດຟື້ນ ທາງຄະນະກໍາມະການອະໄພຍະໂທດລະດັບຊາດ ຈິ່ງໄດ້ເປີດກອງປະຊຸມເຜີຍແຜ່ຂື້ນທີ່ແຂວງຫຼວງພະບາງ ໂດຍການເປັນປະທານຮ່ວມຂອງ ທ່ານ ຄໍາສານ ສຸວົງ ຫົວໜ້າອົງການໄອຍະການປະຊາຊົນສູງສຸດ, ທັງເປັນຮອງປະ ທານຄະນະກໍາມະການອະໄພຍະໂທດ ລະດັບຊາດຜູ້ປະຈໍາການ, ທ່ານ ບຸນລອດ ອ່ອນພະຈັນ ຮອງເລ ຂາພັກແຂວງ, ປະທານສະພາປະຊາຊົນແຂວງ ອຸດົມໄຊ, ມີຄະນະອະໄພຍະໂທດລະດັບແຂວງພາກເໜືອ ຄື: ຫຼວງພະບາງ, ຫົວພັນ, ຜົ້ງສາລີ, ບໍ່ແກ້ວ, ຫຼວງນໍ້າທາ, ອຸດົມໄຊ ແລະ ແຂວງ ໄຊຍະບູລີເຂົ້າຮ່ວມ.



ທ່ານຮອງປະທານຄະນະກໍາມະການອະໄພຍະໂທດ ລະດັບຊາດຜູ້ປະຈໍາການ ໄດ້ກ່າວໃນພິທີເປີດກອງປະຊຸມວ່າ: ສໍາລັບກອງປະຊຸມຄັ້ງນີ້ຄະນະກໍາມະການອະໄພຍະໂທດ 7 ແຂວງພາກເໜືອ ຈະໄດ້ຮັບຟັງການເຜີຍແຜ່ວຽກງານອະໄພຍະໂທດ ແລະ ແນະນໍາວິທີການຈັດຕັ້ງປະຕິບັດ ຄໍາສັ່ງແນະນໍາເລກທີ 06/ຄອຊ, ລົງວັນທີ 23 ມິຖຸນາ 2017 ວ່າດ້ວຍການຈັດຕັ້ງປະຕິບັດວຽກງານອະໄພຍະໂທດປະຈໍາປີ 2017 ໂດຍສະເພາະແມ່ນຈະໄດ້ເນັ້ນໜັກວິທີຄົ້ນຄວ້າ, ຄັດເລືອກນັກໂທດ ຜູ້ທີ່ມີຄວາມກ້າວໜ້າໃນການຝຶກຝົນຫຼໍ່ຫຼອມຕົນເອງ, ປະຕິບັດລະບຽບຄ້າຍຄຸມຂັງ-ດັດສ້າງແລະອອກແຮງງານດີ, ມີການປ່ຽນແປງທາງດ້ານທັດສະນະແນວຄິດ, ຮູ້ສຶກກິນແໜງແຄງໃຈຕໍ່ການກະທໍາຂອງຕົນໃນໄລຍະຜ່ານມາໃຫ້ມີຄວາມຖືກ ຕ້ອງຕາມຫຼັກການ, ເງື່ອນໄຂ, ວິທີການຄັດເລືອກປະເພດ ແລະ ການປະກອບເອກະສານເພື່ອຮັບປະກັນໃຫ້ການປະຕິບັດນະໂຍບາຍອະໄພຍະໂທດໃນ ວັນທີ 2 ທັນວາ 2017 ທີ່ຈະມາເຖິງນີ້ ໃຫ້ມີຂະບວນການຟົດຟື້ນ, ເປັນເອກະພາບ, ມີຄວາມຮັບປະກັນທາງດ້ານຄວາມຖືກຕ້ອງ, ມີຄຸນະພາບ ແລະ ທັນຕາມກໍານົດເວລາ.


ສໍາລັບວຽກງານອະໄພຍະໂທດໃຫ້ແກ່ນັກໂທດຜູ້ທີ່ມີຄວາມກ້າວໜ້າໃນການຝຶກຝົນຫຼໍ່ຫຼອມຕົນເອງໃນໄລຍະປະຕິບັດໂທດ ເປັນວຽກງານທີ່ມີຄວາມໝາຍ ແລະ ຄວາມສໍາຄັນ ເພາະວ່າເປັນການປະຕິບັດແນວ ທາງນະໂຍບາຍມະນຸດສະທໍາຂອງພັກເຮົາ, ທັງແມ່ນການຈັດຕັ້ງປະຕິບັດສິດ-ໜ້າທີ່ໂດຍກົງຂອງປະທານປະເທດທີ່ໄດ້ຮັບການຈັດຂື້ນເນື່ອງໃນໂອກາດ ວັນຊາດທີ 2 ທັນວາ ຂອງທຸກໆປີ.


ທີ່ມາ: ຂ່າວສານຫຼວງພະບາງ 
 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.