Header Ads

ຊາວໜຸ່ມແຂວງປຸກລະດົມຂະບວນການຊາວໜຸ່ມສ້ອມແປງເສັ້ນທາງ



ຕອນເຊົ້າວັນທີ່ 15 ສີງຫານີ້ ຄະນະບໍລິຫານງານຊາວໜຸ່ມແຂວງຫຼວງພະບາງ ສົມທົບກັບວິຊາການຂອງພະແນກໂຍທາທິການ ແລະ ຂົນສົ່ງແຂວງ ພ້ອມກັນປຸກລະດົມຂະບວນການຊາວໜຸ່ມ ເພື່ອສ້ອມແປງເສັ້ນທາງອ້ອມເທດສະບານເມືອງຫຼວງພະບາງ ເພື່ອຕ້ອນຮັບບຸນຫໍ່ເຂົ້າປະດັບດີນ ກໍ່ຄືບຸນຊ່ວງເຮືອທີ່ເມືອງມໍລະດົກໂລກຫຼວງພະບາງທີ່ຈະມາເຖີງ ໃຫ້ມີຄວາມເບີກບານມ່ວນຊື່ນ ແລະ ການຊົມໃຊ້ເສັ້ນທາງມີຄວາມສະດວກ.
















ທ່ານ ອຸ່ນຄໍາ ສຸວັນນະພັນ ເລຂາຄະນະບໍລິຫານງານຊາວໜຸ່ມແຂວງ ໄດ້ໃຫ້ສຳພາດວ່າ: ໃນການປຸກລະດົມຂະບວນການຄັ້ງນີ້ ໄດ້ປຸກລະດົມກຳລັງຊາວໜຸ່ມຈາກພະແນກການ ກົມກອງ, ຫ້ອງການ ແລະ ບັນດາບ້ານ ອ້ອມຂ້າງເທດສະບານແຂວງ ເຂົ້າຮ່ວມຂະບວນການສ້ອມແປງເສັ້ນທາງ ບ່ອນທີ່ເປັນບວກເປັນຂຸມ ເຮັດໃຫ້ການສັນຈອນພົບຄວາມຫຍຸ້ງຍາກ ໂດຍໄດ້ຮັບການຕອບສະໜອງທາງດ້ານພາຫະນະ ເປັນຕົ້ນແມ່ນກົນຈັກໜັກ ເພືອຂູດ ລອກເສັ້ນທາງບາງຈຸດ ເພື່ອຈະໄດ້ນຳໃຊ້ຢາງຂົ້ວ ທີ່ໄດ້ມາດຕະຖານຖົມໃສ່ ໃຫ້ຮາບພຽງ ສ່ວນບ່ອນທີ່ເປັນຂຸມເລັກນ້ອຍ ແມ່ນໄດ້ນຳໃຊ້ແຮງງານຊາວໜຸ່ມຂຸດ, ໃນນີ້ ໄດ້ສຸມໃສ່ເສັ້ນທາງທີ່ພົບຄວາມຫຍຸ້ງຍາກຫຼາຍ ເປັນຕົ້ນເຂດຕະຫຼາດໂພສີ, ເສັ້ນທາງມິດຕະພາບລາວ-ໄທ ແລະ ອື່ນໆ. 




ໂອກາດນີ້ ເລຂາຄະນະບໍລິຫານງານຊາວໜຸ່ມແຂວງ ໄດ້ຮຽກຮ້ອງເຖີງຜູ່ໃຊ້ລົດ ໃຊ້ຖະໜົນ ຈົ່ງພ້ອມກັນຂັບຂີ່ຍານພາຫະນະດ້ວຍຄວາມລະມັດລະວັງ ແລະ ຂໍໃຫ້ອຳນວຍຄວາມສະດວກໃຫ້ແກ່ວິຊາການທີ່ລົງສ້ອມແປງ ເພື່ອເຮັດໃຫ້ການສ້ອມແປງສຳເລັດຕາມແຜນການທີ່ວາງໄວ້. ສຳລັບເສັ້ນທາງອ້ອມເທດສະບານເມືອງຫຼວງພະບາງໃນປະຈຸບັນ ແມ່ນມີຫຼາຍຈຸດທີ່ເປ່ເພ ເຮັດໃຫ້ການສັນຈອນພົບຄວາມຫຍຸ້ງຍາກ ເຊີ່ງພາກສ່ວນກ່ຽວຂ້ອງ ໄດ້ວາງແຜນການຈະປັບປຸງໃຫ້ດີຂື້ນ ພາຍຫຼັງສີ້ນສຸດລະດູຝົນ.











ຂ່າວ: ເພັດສາຄອນ ສິມມະວົງ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ

No comments

Powered by Blogger.