Header Ads

ແນວລາວສ້າງຊາດແຂວງຫຼວງພະບາງສະເຫຼີມສະຫຼອງວັນສ້າງຕັ້ງຄົບຮອບ 67 ປີ



ຕອນເຊົ້າຂອງວັນທີ 9 ສິງຫາ 2017 ອົງການແນວລາວສ້າງຊາດ ນໍາໂດຍທ່ານ ຄໍາຫຼ້າ ທະສິນິພອນ ປະທານແນວລາວສ້າງຊາດແຂວງຫຼວງພະບາງ ພ້ອມດ້ວຍຄະນະ ແລະ ການນໍາອ້ອມຂ້າງແຂວງ ໄດ້ໄປວາງກະຕ່າດອກໄມ້ຢູ່ອານຸສາວະລີປະທານ ສຸພານຸວົງ ແລະ ປະທານ ໄກສອນ ພົມວິຫານ ວິລະບູລຸຂອງຊາດລາວ ເພື່ອລະນຶກເຖິງຄຸນງາມຄວາມດີ ໃນການປະກອບສ່ວນນໍາພາປະຕິບັດພາລະກິດປົດປ່ອຍປະເທດຊາດ ແລະ ຕ້ອນວັນສ້າງຕັ້ງແນວລາວສ້າງຊາດຄົບຮອບ 67 ປີ 13 ສິງຫາ 1950 – 13 ສິງຫາ 2017.ຈາກນັ້ນວັນທີ 10 ສິງຫາ 2017 ຢູ່ທີ່ຫ້ອງວ່າການປົກຄອງແຂວງຫຼວງພະບາງ ໄດ້ມີພິທີປາຖະກາຖາວັນດັ່ງກ່າວຂື້ນໂດຍການໃຫ້ກຽດເລົ່າມູນເຊື້ອວັນສ້າງຕັ້ງແນວລາວສ້າງຊາດ ຂອງທ່ານ ສາຍສະໝອນ ຄົມທະວົງ ຮອງເລຂາພັກແຂວງ,ປະທານສະພາປະຊາຊົນແຂວງຫຼວງພະບາງ,ມີພະເຖລະອານຸເຖລະ,ອາດິດການນໍາ,ປະທານແນວລາວສ້າງຊາດແຂວງ ພ້ອມດ້ວຍຄະນະ,ພະນັກງານ ແລະ ພະແນກການຕ່າງໆຕະຫຼອດຮອດອໍານາດການປົກຄອງບ້ານພາຍໃນແຂວງເຂົ້າຮ່ວມຮັບຟັງ.



ທ່ານ ສາຍສະໝອນ ຄົມທະວົງ ໄດ້ກ່າວມູນເຊື້ອວັນສ້າງຕັ້ງແນວລາວສ້າງຊາດບາງຕອນວ່າ: ປະເທດລາວໄດ້ຖຶກພວກສັກດີນາ ແລະ ຈັກກະພັດຕ່າງດ້າວ ເຂົ້າມາຮຸກຮານ ຍຶດຄອງເອົາເປັນເມືອງສ່ວຍ ແລະ ເປັນຫົວເມືອງຂື້ນຫຼາຍຮ້ອຍປີ,ດັ່ງນັ້ນປະຊາຊົນລາວ ເຊິ່ງມີນໍ້າໃຈຮັກຊາດ ໂດຍບໍ່ຍອມເປັນຂ້ອຍຂ້າ ໃຫ້ຊາດອື່ນຈິ່ງໄດ້ເກີດມີຂະບວນການລຸກຮືຂື້ນຕໍ່ສູ້ ຢູ່ໃນຫຼາຍພາກຄື: ພາກໃຕ້ແມ່ນນໍາພາຂອງພໍ່ກະດວດ,ອົງແກ້ວ-ອົງກົມມະດໍາ,ພາກເໜືອແມ່ນນໍາພາຂອງເຈົ້າຟ້າປັດໃຈ,ໃນເວລານັ້ນຍັງບໍ່ທັນມີທິດສະດີປະຕິວັດ ແລະ ບໍ່ທັນມີແນວທາງປະຕິວັດຈະແຈ້ງ,ໝາຍຄວາມວ່າບໍ່ທັນມີການນໍາພາຂອງພັກຢ່າງຖຶກຕ້ອງ,ຂະບວນການຕໍ່ສູ້ຕ່າງໆທີ່ມີບັນພະບູລຸດທີຮັກຊາດ ແລະ ຜູ້ຊົງຄຸນວຸດທິນັ້ນ ຍັງຢູ່ກະແຈກກະຈາຍ,ການຕໍ່ສູ້ແມ່ນເກີດຢູ່ທ້ອງຖິ່ນຂອງໃຜມັນ.ໂດຍບໍ່ມີການປະສານສົມເຕົ້າໂຮມກໍາລັງ ແລະ ການຈັດຕັ້ງແນວໂຮມຢ່າງກ້ວາງຂວາງ.ພາຍຫຼັງພັກກອມມຸ່ຍນິດອິນດູຈີນໄດ້ຮັບການສ້າງຕັ້ງຂື້ນໃນປີ 1930 ພັກໄດ້ແຈ້ງພາລະບົດບາດທີສໍາຄັນຂອງແນວໂຮມ,ສະນັ້ນ ອົງການຈັດຕັ້ງທີ່ມີລັກຊະນະການເມືອງຢູ່ລາວ ຈິ່ງໄດ້ຮັບການສ້າງຕັ້ງຂື້ນ ເພື່ອນໍາພາຕໍ່ຕ້ານຈັກກະພັດລ່າເມືອງຂື້ນເຊັ່ນ: ແນວໂຮມພັນທະມິດແນວລາວອິດສະຫຼະ,ລາວເປັນລາວ,ສະມາຄົມສະຫວັດດີການ,ສະມາຄົມສໍາພັນທະມິດແນວລາວອິດສະຫຼະ ແລະ ອື່ນໆ.ນອກຈາກນັ້ນ ປີ 1941 ຄະນະບໍລິຫານງານສູນກາງພັກຄອມມຸ່ຍນິດອິນດູຈີນ ໄດ້ມີຄໍາສັ່ງກ່ຽວກັບການສ້າງຕັ້ງສໍາພັນທະມິດອ້າຍລາວເອກະລາດ ເຊິ່ງແມ່ນຮູບການແນວໂຮມຕ້ານຈັກກະພັດຜູ້ຮຸກຮານຂອງຄົນລາວ.


ດັ່ງນັ້ນໃນວັນທີ 13 ສິງຫາ 1950 ກອງປະຊຸມຜູ້ແທນແນວລາວຕໍ່ຕ້ານທົ່ວປະເທດໄດ້ໄຂຂື້ນຢູ່ ແຂວງຕວຽນກວາງ ສສ ຫວຽດນາມ ໂດຍມີຜູ້ແທນເຂົ້າຮ່ວມທັງໝົດ ຈໍານວນ 150 ທ່ານ,ກອງປະຊຸມດັ່ງກ່າວໄດ້ປະກາດສ້າງຕັ້ງແນວໂຮມແຫ່ງຊາດລາວຂື້ນໂດຍໃສ່ຊື່ວ່າ: (ແນວລາວອິດສະຫຼະ) ເຊິ່ງໃນປະຈຸບັນໄດ້ປ່ຽນຊື່ມາເປັນ (ແນວລາວສ້າງຊາດ) ປະກອບມີຄະນະກໍາມະການສູນກາງແນວລາວອິດສະຫຼະ 15 ທ່ານ,ໂດຍແມ່ນສະເດັດເຈົ້າສຸພານຸວົງເປັນສູນກາງແນວລາວອິດສະຫຼະ ແລະ ມີທ່ານ ໄຟດ່າງ ລໍເບຼຍຢາວ,ທ່ານ ສິທົນ ກົມມະດໍາ ເປັນຮອງປະທານ.ໃນໄລຍະນັ້ນແນວລາວອິດສະຫຼະໄດ້ປະຕິບັດບົດບາດອອກໜ້າແທນພັກ ເພື່ອເຕົ້າໂຮມກໍາລັງສໍາພັນທະພາບລະຫວ່າງຊົນຊັ້ນກໍາມະກອນ ແລະ ບັນດາກໍາລັງການເມືອງ,ກໍາລັງຈາກສັງຄົມຕ່າງໆໃນທົ່ວປະເທດ.ທັງເຮັດໜ້າທີ່ສໍາພັນພິເສດກັບກອງທັບ ແລະ ປະຊາຊົນຫວຽດນາມອ້າຍນ້ອງ ໃນ 3 ຊາດອິນດູຈີນ.ຕັ້ງແຕ່ນັ້ນມາໄດ້ດໍາເນີນກອງປະຊຸມແນວລາວອິດສະຫຼະ ເປັນແຕ່ລະໄລຍະແຕ່ລະສະໄໝມາ ແລະ ໄດ້ຮັບການສະນັບສະໜູນຈາກພັກ ແລະ ປະຊາຊົນເລື້ອຍໆມາ.

ເຊິ່ງໄດ້ດໍາເນີນກອງປະຊຸມຕັ້ງແຕ່ວັນສ້າງຕັ້ງມາເຖິງປະຈຸບັນໄດ້ X ສະໄໝ.ທ່ານ ສາຍສະໝອນ ຍັງໄດ້ກ່າວຕື່ມວ່າ: ສໍາລັບແນວລາວສ້າງຊາດແຂວງຫຼວງພະບາງ ໃນປີ 2016 ໄດ້ຈັດຕັ້ງປະຕິບັດວຽກງານໃນຫຼາຍດ້ານ ອັນພົ້ນເດັ່ນແມ່ນໄດ້ເຜີຍແຜ່ມະຕິຕ່າງໆຂອງພັກປະຊາຊົນປະຕິວັດລາວ,ສຶກສາອົບຮົມແນວທາງການເມືອງໃຫ້ ສະມາຊິກພັກ,ພະນັກງານ ແລະ ປະຊາຊົນບັນດາເຜົ່າພາຍໃນແຂວງ,ປັບປຸງກົງຈັກການຈັດຕັ້ງຂອງແນວລາວສ້າງຊາດແຂວງ ແລະ ເມືອງສໍາເລັດ 12 ເມືອງ.ປຸກລະດົມເຕົ້າໂຮມປະຊາຊົນທຸກຊັ້ນຄົນ,ລວມທັງດ້ານສາສະໜາ ເຂົ້າຮ່ວມຂະບວວນການ ຕາມແຜນນະໂຍບາຍຂອງພັກ,ລະບຽບກົດໝາຍຂອງລັດວາງອອກ,ເປັນເຈົ້າການເຂົ້າຮ່ວມບຸນປະເພນີຂອງເຜົ່າ ແລະ ບຸນປີໃໝ່ຂອງຊາວຕ່າງປະເທດທີ່ດໍາລົງຊີວິດຢູ່ແຂວງຫຼວງພະບາງ.ລົງເກັບກໍາຂໍ້ມູນ ປະຊາຊົນບັນດາເຜົ່າໃນທົ່ວແຂວງມີ 11 ເຜົ່າ,ໃນ 4 ໝວດພາສາ,ໃນທົ່ວແຂວງມີ 2 ສາສະໜາຄື: ສາສະໜາພຸດ ແລະ ສາສະໜາເຢຊູຄຼີດ.ໃນນັ້ນມີຜູ້ເຊື່ອຖືສາສະໜາພຸດ 189.180 ຄົນ,ຍິງ 94.136ຄົນ,ມີວັດ 321 ແຫ່ງ,ພະສົງ 373 ຕົນ,ຈົວ 1.680 ຕົນ ແລະ ເຊື່ອຖືສາສະໜາຄຼີດ 8.047 ຄົນ,ຍິງ 4.210 ຄົນ ແລະ ຍັງມີເຜົ່າອື່ນໆທີ່ເຊື່ອຖືບັນພະບູລຸດຈໍານວນໜຶ່ງ.

ນອກນັ້ນແນວລາວສ້າງຊາດແຂວງຍັງໄດ້ປະກອບສ່ວນຊ່ວຍເຫຼືອສັງຄົມ ເປັນຕົ້ນແມ່ນ ໄພນໍ້າຖ້ວມ,ສ້າງສາບູລະນະວັດວາອາຮາມ,ໂຮງຮຽນ ມສ ສົງ ແລະ ຊ່ວຍທະຫານປະຈໍາເສັ້ນທາງພາຍໃນແຂວງຫາກາສີ ມູນຄ່າ 1.697.723.000ກີບ.ໄດ້ປຸກລະດົມເຕົ້າໂຮມຄວາມສາມັກຄີໃນການໃຫ້ການຊ່ວຍເຫຼືອຜູ້ປະສົບໄພ ບັນດາຊັ້ນຄົນໃນສັງຄົມທົ່ວແຂວງມີ 5 ຊັ້ນຄົນ ແລະ 14 ສະມາຄົມ.ໃນມູນຄ່າ 17.150.000ກີບ.ໄດ້ນໍາພາປະຊາຊົນເປີດຂະບວນການສ້າງຄອບຄົວ ແລະ ບ້ານສາມັກຄີປອງດອງໄດ້ 10 ເມືອງ,ມີ 126 ບ້ານ ແລະ 11.940 ຄອບຄົວ,ປະເມີນແລ້ວ 46 ບ້ານ ພ້ອມທັງໄດ້ມອບໃບຢັ້ງຢືນບ້ານສາມັກຄີປອງດອງແລ້ວ 33 ບ້ານ,ມີ 3.360 ຄອບຄົວ.

ຂ່າວ: ເພັດສາຄອນ ສິມມະວົງ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com




No comments

Powered by Blogger.