Header Ads

8 ແຂວງພາກເໜືອທາບທາມຕໍ່ຮ່າງດໍາລັດວ່າດ້ວຍການຄຸ້ມຄອງນໍາໃຊ້ລົດລັດ



8 ແຂວງພາກເໜືອທາບທາມຕໍ່ຮ່າງດໍາລັດວ່າດ້ວຍການຄຸ້ມຄອງນໍາໃຊ້ລົດລັດເພື່ອປະຕິບັດຮ່າງດໍາລັດຂອງລັດຖະບານວ່າດ້ວຍການຄຸ້ມຄອງ ແລະ ນໍາໃຊ້ລົດຂອງລັດ ຈຸດປະສົງແມ່ນເພື່ອຄຸ້ມຄອງ ແລະ ນໍາໃຊ້, ຕິດຕາມກວດກາລົດຂອງລັດເຂົ້າໃນວຽກງານທາງລັດຖະການໃຫ້ຖືກຕ້ອງຕາມເປົ້າໝາຍ ແລະ ເປັນເອກະພາບໃນຂອບເຂດທົ່ວປະເທດ ແນໃສ່ປະຢັດລາຍຈ່າຍງົບປະມານແຫ່ງລັດ ແລະ ໃຫ້ສອດຄ່ອງກັບສະພາບຄວາມເປັນຈິງຂອງປະເທດເຮົາ. ສະນັ້ນທາງກະຊວງການເງີນຈິ່ງໄດ້ຈັດກອງປະຊຸມເພື່ອທາບທາມຕໍ່ຮ່າງດໍາລັດດັ່ງກ່າວຂື້ນໃນຕອນເຊົ້າຂອງ ວັນທີ 10 ສິງຫາ ນີ້ ທີ່ຫ້ອງປະຊຸມໃຫຍ່ຂອງເມືອງຫຼວງພະບາງ ໂດຍການເປັນປະທານຮ່ວມຂອງ ທ່ານ ປອ ບົວຄົງ ນາມມະວົງ ຮອງເຈົ້າແຂວງໆຫຼວງພະບາງ, ທ່ານ ປອ ອາດສະພັງທອງ ສີພັນດອນ ຮອງລັດຖະມົນຕີກະຊວງການເງີນ,ມີບັນດາຫົວໜ້າພະແນກການເງີນ ແລະ ພະແນກການຕ່າງໆທີ່ກ່ຽວຂ້ອງທີ່ມາຈາກ ແຂວງຜົ້ງສາລີ, ແຂວງບໍ່ແກ້ວ, ຫຼວງນໍ້າທາ, ອຸດົມໄຊ, ໄຊຍະບູລີ, ຊຽງຂວາງ, ຫົວພັນ ແລະ ແຂວງຫຼວງພະບາງ ເຂົ້າຮ່ວມ. 



ທ່ານຮອງລັດຖະມົນຕີກະຊວງການເງີນກ່າວວ່າ: ສໍາລັບຮ່າງດໍາລັດວ່າດ້ວຍການຄຸ້ມຄອງ ແລະ ນໍາໃຊ້ລົດຂອງລັດ ຄະນະວິຊາການໄດ້ຄົ້ນຄວ້າສໍາເລັດໃນທ້າຍເດືອນ ກໍລະກົດ ໂດຍປະຕິບັດຕາມກົດໝາຍວ່າດ້ວຍການສ້າງນິຕິກໍາສະບັບເລກທີ 19/ສພຊ, ລົງວັນທີ 12 ກໍລະກົດ 2012 ກ່ອນນໍາສະເໜີຕໍ່ກອງປະຊຸມລັດຖະບານ, ການຄົ້ນຄວ້າສ້າງ ແລະ ປັບປຸງນິຕິກໍາຕ້ອງໄດ້ມີການທາບທາມຄໍາເຫັນຢ່າງກວ້າງຂວາງ ແລະ ເລິດເຊິ່ງນໍາພາກສ່ວນກ່ຽວຂ້ອງ ທັງພາກລັດແລະເອກະຊົນ ເພື່ອໃຫ້ຮ່າງນິຕິກໍາທີ່ສະ ເໜີສ້າງ ແລະ ປັບປຸງດັ່ງກ່າວມີເນື້ອໃນຈະແຈ້ງ, ຄົບຖ້ວນ ແລະ ສອດຄ່ອງກັບນິຕິກໍາຂອງ ສປປ ລາວ ຊຶ່ງຄະນະຮັບຜິດຊອບ ໄດ້ເລີ້ມດໍາເນີນກອງປະຊຸມລະດົມຄວາມຄິດເຫັນຢູ່ຂັ້ນສູນກາງ, ບັນດາກະຊວງ, ອົງການທຽບເທົ່າ, ແຂວງ, ນະຄອນຫຼວງ ເມື່ອຕົ້ນເດືອນ ສິງຫາ ຜ່ານມານີ້ ພ້ອມປັບປຸງຄວາມຄິດເຫັນດັ່ງກ່າວ ແລະ ໄດ້ສືບຕໍ່ຈັດກອງປະຊຸມລະດົມຄໍາຄິດເຫັນຢູ່ພາກເໜືອກໍຄືແຂວງຫຼວງພະບາງ ແລະ ຈະໄດ້ສືບຕໍ່ນໍາໄປທາບທາມຢູ່ບັນດາແຂວງພາກໃຕ້ ເຊິ່ງຈະຈັດຢູ່ແຂວງສະຫວັນນະເຂດໃນອາທິດຕໍ່ໄປ ຄາດວ່າຈະນໍາສະເໜີເຂົ້າຜ່ານກອງປະຊຸມເປີດກວ້າງຂອງລັດຖະບານສະໄໝສາມັນປະຈໍາເດືອນ ກັນຍາ 2017 ນີ້


ສະນັ້ນເພື່ອຈັດຕັ້ງຜັນຂະຫຍາຍຄໍາສັ່ງເລກທີ 09/ນຍ ວ່າດ້ວຍການປະຢັດລາຍຈ່າຍງົບປະມານຂອງລັດ ໃຫ້ມີປະສິດທິພາບ ແລະ ປະສິດທິຜົນສູງຈິ່ງມີຄວາມຈໍາເປັນຄົ້ນຄວ້າສ້າງດໍາລັດວ່າດ້ວຍການຄຸ້ມຄອງ ແລະ ນໍາໃຊ້ລົດຂອງລັດ ເພື່ອໃຫ້ເປັນເຄື່ອງມືທາງດ້ານນິຕິກໍາທີ່ໜັກແໜ້ນໃນການຄຸ້ມຄອງ ແລະ ນໍາໃຊ້ລົດຂອງລັດໃຫ້ມີປະສິດທິຜົນ ແລະ ຮັບປະກັນການເຄື່ນອໄຫວວຽກງານໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານແຫ່ງລັດ 5 ປີຄັ້ງທີ VIII ແລະ ແຜນງົບປະມານແຫ່ງລັດປະຈໍາປີໃຫ້ໄດ້ຮັບຜົນສໍາເລັດ. ພ້ອມນີ້ທ່ານຮອງກະຊວງການເງີນຍັງໄດ້ຮຽກຮ້ອງໃຫ້ບັນດາທ່ານທີ່ເຂົ້າຮ່ວມກອງປະຊຸມຈົ່ງຍົກສູງຄວາມຮັບຜິດຊອບໃນການປະກອບຄໍາຄິດເຫັນຕໍ່ຮ່າງດໍາລັດດັ່ງກ່າວໃຫ້ມີຄວາມຮັດກຸ່ມ, ຖືກຕ້ອງ ແລະ ໃຫ້ເປັນເອກະພາບກັນໃນຂອບເຂດທົ່ວປະເທດ.


ທີ່ມາ: ຂ່າວສານຫຼວງພະບາງ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.