Header Ads

ສາທາລະນະສຸກ ລາວ ສົ່ງເສີມລ້ຽງລູກດ້ວຍນ້ຳນົມແມ່ ຢ່າງດຽວ ໃຫ້ໄດ້ 50% ໃນປີ 2020


ປັດຈຸບັນ ພັກ​-ລັດຖະບານ​ ພວມສຸມ​ໃສ່ຈັດ​ຕັ້ງ​ປະຕິບັດວຽກງານ ການ​ລ້ຽງລູກ​ດ້ວຍ​ນ້ຳນົມ​ແມ່ພຽງຢ່າງ​ດຽວ ​ແຕ່ມື້ເກີດ​ຈົນ​ຮອດ 6 ​ເດືອນ ດ້ວຍການໂຄ​ສະນາ​ເຜີຍ​ແຜ່​ຂໍ້​ມູນ​ຂ່າວສານ ​ແລະ ຄວາມ​ຮູ້ກ່ຽວ​ກັບຄຸນ​ປະ​ໂຫຍ​ດ ຂອງນ້ຳນົມ​ແມ່ ​​ໃ​ນກຸ່ມ​ເປົ້າ​ໝາຍ ​​ມີຄວາມຮູ້ ​ແລະ ເຂົ້າ​ໃຈ​ຕໍ່​ກັບ​ການ​ລ້ຽງລູກ​ໃຫ້​ຖືກ​ວິທີ. ທັງ​ນີ້​ກໍ​ເພື່ອ ​ໃຫ້​ບັນລຸ​ເປົ້າ​ໝາຍ​ສົ່ງ​ເສີມ​ການ​ລ້ຽງ​ລູກ ​ດ້ວຍ​ນົມ​ແມ່​ພຽງ​ຢ່າງ​ດຽວ ​ໃຫ້​ໄດ້ 50% ​ໃນ​ປີ 2020.

ທ່ານ ພູທອນ ​ເມືອງ​ປາກ ຮອງ​ລັດຖະມົນຕີ ກະຊວງ​ສາທາລະນະ​ສຸກ ​ໄດ້​ໃຫ້​ສຳພາດ​ຕໍ່​ສື່​ມວນ​ຊົນ ​ໃນ​ວັນ​ທີ 1 ສິງຫາ 2017 ​ໂອກາດສະ​ເຫລີ​ມສະຫລອງ ສັບປະດາ​ສາກົນ ​ການລ້ຽງລູກ​ດ້ວຍ​ນົມ​ແມ່ 1-7 ສິງຫາ ​ໂດຍ​ທ່ານ​ໄດ້​ໃຫ້​ຮູ້​ວ່າ: ​ການ​ລ້ຽງລູກ​ດ້ວຍນ້ຳນົມ​ແມ່ພຽງດຽວ ​ແມ່ນພຽງພໍ​ສຳລັບ​ເດັກ ​ແຕ່​ມື້​ເກີດ​ຈົນ​ຮອດ 6 ​ເດືອນ ຫລັງ​ຈາກ​ນັ້ນ​ໃຫ້ສືບ​ຕໍ່​ລ້ຽງລູກ​ດ້ວຍ​ນົມ​ແມ່​ ​ໄປພ້ອມ​ກັບ​ອາຫານ​ເສີມ​ຕ່າງໆ ຈົນ​ຮອດ 2 ປີ ຫລື ຫລາຍ​ກວ່າ​ນັ້ນ. ​ເນື່ອງ​ຈາກ​ວ່ານ້ຳນົມ​ແມ່ ມີ​ຄຸນ​ປະ​ໂຫຍ​ດຢ່າງ​ມະຫາສານ​ສຳລັບ​ເດັກ, ​ມີ​ສານ​ອາ ຫານ​ຄົບ​ຖ້ວນ, ​ເປັນພູມ​ຄຸ້ມ​ກັນ​ເຮັດ​ໃຫ້​​ເດັກ​ມີ​ສຸຂະພາບ​ແຂງ​ແຮງ, ມີ​ໂພຊະ​ນາ​ການ​ທີ່​ດີ, ມີ​ການຈະ​ເລີ​ນ​ເຕີບ​ໂຕ ​​ແລະ ພັດທະນາ​ການທາງ​ດ້ານ​ຮ່າງກາຍ ​ແລະ ມັນສະໜອງ​ເຮັດ​ໃຫ້​ເດັກ​ສະຫລາດ​ຮຽນຮູ້​ໄດ້​​ໄວ, ​ທັງເປັນ​ເກາະປ້ອງກັນ​ພະຍາດ​ຊຶມ​ເຊື້ອ ​ແລະ ອື່ນໆ.

ຕໍ່​ກັບ​ວຽກ​ງານ​ດັ່ງກ່າວ, ພັກ ​ແລະ ລັດຖະບານລາວ ​ໄດ້​ມີ​ນະ​ໂຍບາຍ ​ໃນ​ການ​ປົກ​ປ້ອງ, ຊຸກຍູ້, ສົ່ງ​ເສີມວຽກງານ ການ​ລ້ຽງ​ລູກ​ດ້ວຍ​ນົມ​ແມ່​ ​ໂດຍ​​ໄດ້ອະນຸມັດ​ງົບ​ປະມານ ​ໃນ​ການໂຄ​ສະນາ ​ເຜີຍ​ແຜ່​ຄວາມ​ຮູ້ກ່ຽວ​ກັບຄຸນ​ປະ​ໂຫຍ​ດຂອງນ້ຳນົມ​ແມ່, ​ພ້ອມ​ທັງ​ອອກ​ກົດໝາຍ​ແຮງ​ງານ​ ໃຫ້​ແມ່ຍິງ ທັງ​ພາກລັດ ​ແລະ ​ເອ​ກະ​ຊົນສາມາດ ລາ​ພັກ​ເກີດ​ລູກ​​ເພີ່ມ​ຂຶ້ນ ຈາກ​ແຕ່​ກ່ອນ​ມີ​ພຽງ 90 ວັນ​ ມາເປັນ 105 ວັນ ພ້ອມໄດ້ຮັບ​ເງິນ​ເດືອນ​ປົກກະຕິ ​ແລະ ​ແມ່ລູກອ່ອນ​ສາມາດ​ພັກ​ການ​ໄດ້ວັນ​ລະ 1 ຊົ່ວ​ໂມງ​ ເພື່ອ​ໃຫ້​ລູກ​ກິນ​ນ້ຳນົມ​, ພ້ອມ​ນີ້ ​ ກົດໝາຍລັດຖະກອນ ​ໃນ​ປັດຈຸບັນຍັງ​ມີ​ນະ​ໂຍບາຍ ໃຫ້​ແມ່ຍິງທີ່​ເກີດ​ລູກ ສາມາດ​ລາ​ພັກ​ໄດ້​ຮອດ 5-6 ​ເດືອນ​ ພ້ອມ​ໄດ້​ຮັບ​ເງິນ​ເດືອນ​ເຕັມ. 

ຂ່າວ:ກິດ​ຕາ; ພາບ: ສຸກ​ທະວີ/ ຂປລ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com
ກົດພາບອ່ານລາຍລະອຽດ

ກົດພາບອ່ານລາຍລະອຽດ

No comments

Powered by Blogger.