Header Ads

ປະທານສະພາແຫ່ງຊາດພົບປະໂອ້ລົມປະຊາຊົນບ້ານບວມອໍ້ ເມືອງຊຽງເງິນ



ວັນທີ 30 ກໍລະກົດ ປີ 2017  ຜ່ານມານີ້, ທ່ານ ນາງ ປານີ ຢ່າທໍ່ຕູ້ ກຳມະການກົມການເມືອງສູນກາງພັກ-ປະທານສະພາແຫ່ງຊາດ ໄດ້ລົງພົບປະໂອ້ລົມປະຊາຊົນບ້ານບວມອໍ້ ເມືອງຊຽງເງິນຢູ່ສະໂມສອນຂອງບ້ານ, ໂດຍມີ ທ່ານ ສາຍສະໝອນ ທິດາກອນ ເຈົ້າເມືອງຊຽງເງິນ, ພ້ອມດ້ວຍອົງການປົກຄອງບ້ານ ແລະ ປະຊາຊົນພາຍໃນບ້ານ ໃຫ້ການຕ້ອນຮັບ. ໂອກາດດັ່ງກ່າວທ່ານປະທານສະພາແຫ່ງຊາດ ໄດ້ຮັບຟັງສະພາບການກະກຽມເບື້ອງຕົ້ນ ໃນການຈັດສັນຍົກຍ້າຍບ້ານໃໝ່ຈາກ ທ່ານເຈົ້າເມືອງຊຽງເງິນ ແລະ ຮັບຟັງການລາຍງານສະພາບລວມຂອງບ້ານ, ຜົນກະທົບຈາກໂຄງການກໍ່ສ້າງທາງລົດໄຟລາວ-ຈີນ ຈາກທ່ານ ບຸນສີທັດ ສະນະວົງ ນາຍບ້ານບວມອໍ້. ຈາກນັ້ນ ທ່ານປະທານສະພາແຫ່ງຊາດ ໄດ້ມີຄຳຖາມເຈາະຈີ້ມຕື່ມກ່ຽວກັບຄວາມຮັບຮູ້ຂອງປະຊາຊົນ ຕໍ່ການປະຕິບັດໂຄງການກໍ່ສ້າງທາງລົດໄຟລາວ-ຈີນ, 



ພ້ອມທັງໄດ້ໂອ້ລົມຊີ້ທິດເຍືອງທາງໃນການປະຕິບັດໂຄງການ ຢູ່ທ້ອງຖີ່ນເມືອງຊຽງເງິນ, ໂດຍສະເພາະແມ່ນການປະຕິບັດວຽກງານຊົດເຊີຍຜົນກະທົບໃຫ້ແກ່ປະຊາຊົນ ຕ້ອງປະຕິບັດຕາມດຳລັດຂອງນາຍົກລັດຖະມົນຕີ ວ່າດ້ວຍການແກ້ໄຂຜົນກະທົບ ຈາກໂຄງການກໍ່ສ້າງທາງລົດໄຟ ລາວ-ຈີນ. ບ້ານບວມອໍ້ ເປັນບ້ານຊົນເຜົ່າກຶມມຸ, ມີຈຳນວນ 98 ຄອບຄົວ 102 ຫຼັງຄາເຮືອນ, ພົນລະເມືອງທັງໝົດ 404 ຄົນ ຍິງ 206 ຄົນ, ບ້ານດັ່ງກ່າວໄດ້ຖືກຜົນກະທົບຈາກໂຄງການກໍ່ສ້າວທາງລົດໄຟລາວ-ຈີນ ມີເນື້ອທີ່ດິນທັງໝົດ 3 ເຮັກຕາກ່ວາ, ໃນນີ້ ມີດິນຂອງປະຊາຊົນ 94ຕອນ ເນື້ອທີ່ 32.199 ຕາແມັດ, ດິນລວມບ້ານເຊັ່ນ: ໂຮງຮຽນ; ສະໂມສອນ ແລະ ດິນສາທາລະນະ ຈຳນວນ 3 ຕອນ ເນື້ອທີ່ 4.119 ຕາແມັດ. ຜົນກະທົບດ້ານສີ່ງປຸກສ້າງ ມີເຮືອນ102 ຫຼັງ ເປັນເຮືອນຖາວອນ 55 ຫຼັງ; ເຄີ່ງຖາວອນ 33 ຫຼັງ; ປະຖົມປະຖານ 11 ຫຼັງ, ຜົນກະທົບດ້ານເຄື່ອງປູກຂອງຝັງປະເພດໄມ້ໃຫ້ໝາກ 639 ຕົ້ນ; ໄມ້ອຸດສາຫະກຳ 591 ຕົ້ນ; ພືດອຸດສາຫະກຳ 189 ຕົ້ນ; ໄມ້ປະດັບ 25 ຕົ້ນ ແລະ ພືດລົ້ມລຸກປະເພດກ້ວຍ 95 ສຸມ; ໄມ້ປ່ອງ 153 ສຸມ.



ໂດຍ: ເຫຼັກໄຊ ຄົດໄຊໂຍ/
Lao National Radio
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com
ກົດພາບອ່ານລາຍລະອຽດ

ກົດພາບອ່ານລາຍລະອຽດ

No comments

Powered by Blogger.