Header Ads

ອົງການໄອຍະການປະຊາຊົນເຂດ I ສໍາເລັດບັ້ນດຳເນີນຊີວິດການເມືອງ-ປັບປຸງປົວແປງພັກ



ອົງການໄອຍະການປະຊາຊົນ ເຂດ I ເມືອງ ລະມາມ ແຂວງເຊກອງ ສຳເລັດບັ້ນດຳເນີນຊີວິດການເມືອງ-ປັບປຸງປົວແປງພັກ ໃນວັນທີ 16 ສິງຫາ 2017 ນີ້ ພາຍຫຼັງທີ່ໄດ້ດໍາເນີນ ມາເປັນເວລາ 3 ວັນ ໂດຍເລີ່ມຕັ້ງແຕ່ ວັນທີ 14 ສິງຫາຜ່ານມາ ໃຫ້ກຽດເຂົ້າຮ່ວມເປັນປະທານ ຂອງສະຫາຍ ຮຽມ ໄຊຍະລາດ ກຳມະການປະຈໍາພັກເມືອງ, ຫົວໜ້າກອງບັນຊາການ ປກສ ເມືອງລະມາມ, ມີບັນດາສະຫາຍຄະນະພັກ, ອໍານາດການປົກຄອງ ແລະ ສະມາຊິກພັກພາຍໃນຫນ່ວຍພັກອົງການໄອຍະການດັ່ງກ່າວ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
 


ສະຫາຍ ວຽງສະຫວັນ ສີຫວນຮັກ ເລຂາຫນ່ວຍພັກ, ຫົວຫນ້າອົງການໄອຍະການປະຊາຊົນເຂດ I ເມືອງລະມາມ ແຂວງເຊກອງໄດ້ຂຶ້ນຜ່ານບົດລາຍງານຜົນສໍາເລັດບັ້ນດໍາເນີນຊີວິດການເມືອງ-ປັບປຸງປົວແປງພັກຂອງຫນ່ວຍພັກຮາກຖານອົງການໄອຍະການປະຊາຊົນ ເຂດ I ເມືອງລະມາມ ແຂວງເຊກອງ ຊຶ່ງພະນັກງານຫຼັກແຫຼ່ງ ແລະ ສະມາຊິກພັກໄດ້ເຊື່ອມຊຶມ, ຮັບຮູ້ ແລະ ເຂົ້າໃຈເອກະສານເດັດດ່ຽວປັບປຸງປົວແປງພັກໃຫ້ປອດໄສ, ເຂັ້ມແຂງ, ໜັກແໜ້ນ ແລະ ບົດສະຫຼຸບຕີລາຄາການຊີ້ນຳໆພາຂອງອົງຄະນະພັກເມືອງ, ບົດສະຫຼຸບຕີລາຄາການຊີ້ນຳໆພາຂອງຄະນະໜ່ວຍພັກ ໃນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ IX ຂອງອົງຄະນະພັກແຂວງ, ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກເມືອງລະມາມ ແລະ ມະຕິກອງປະຊຸມໃຫຍ່ຄັ້ງທີ I ຂອງຫນ່ວຍພັກຕົນ ລວມທັງການສໍາຫຼວດກວດກາທັງໃນຄະນະພັກ, ສະມາຊິກພັກພາຍຫນ່ວຍດັ່ງກ່າວ.




ຜ່ານການດໍາເນີນຊີວິດການເມືອງ-ປັບປຸງປົວແປງພັກ ພາຍໃນໜ່ວຍພັກຮາກຖານດັ່ງກ່າວ ແມ່ນດຳເນີນໄປດ້ວຍບັນຍາກາດຟົດຟື້ນ, ມີຄວາມເປັນເອກກະພາບສູງ ແລະ ສາມາດບັນລຸຕາມຈຸດປະສົງ ແລະ ເປົ້າໝາຍທີ່ວາງໄວ້ ຊຶ່ງເປັນໝາກຜົນລວມແຫ່ງຄວາມສາມັກຄີ, ເປັນເອກະພາບຂອງບັນດາຄະນະພັກ, ສະມາຊິກພັກທຸກສະຫາຍທີ່ໄດ້ເສີມຂະຫຍາຍລະບອບປະຊາທິປະໄຕຢ່າງກ້ວາງຂວາງ ແລະ ມີນໍ້າໃຈຮັບຜິດຊອບສູງຕໍ່ໜ້າທີ່ວຽກງານ, ພ້ອມນັ້ນ ກໍ່ໄດ້ວາງແຜນການທິດທາງໃນຕໍ່ໜ້າ ໂດຍຈະໄດ້ສືບຕໍ່ຊີ້ນຳໆພາສະມາຊິກພັກ, ພະນັກງານ-ລັດຖະກອນທັງໝົດສູ້ຊົນຈັດຕັ້ງປະຕິບັດບັນດາທິດທາງ, ແຜນການລວມ ທີ່ໄດ້ວາງໄວ້ໃຫ້ເກີດໝາກຜົນຕົວຈິງ, ເຮັດໃຫ້ວຽກງານອົງການໄອຍະການມີການຫັນປ່ຽນດີກວ່າເກົ່າ, ປະກອບສ່ວນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ກໍຄືເມືອງລະມາມຂອງພວກເຮົາໃຫ້ຮັ່ງມີເຂັ້ມແຂງ, ປະຊາຊົນມີຄວາມຜາສຸກ, ສັງຄົມມີຄວາມສີວິໄລຍຸຕິທຳ ແລະ ພ້ອມກັນເສີມຂະຫຍາຍມູນເຊື້ອທີ່ເປັນຜົນງານ ຂອງຄະນະໜ່ວຍພັກອົງການໄອຍະການເຂດໃຫ້ເຕີບໃຫຍ່ເຂັ້ມແຂງ.


ໂອກາດດຽວກັນ ກໍໄດ້ມີພິທີມອບ-ຮັບ ໃບຢັ້ງຢືນຫນ່ວຍພັກແຂງ-ຮູ້ນໍາພາຮອບດ້ານ ໃຫ້ແກ່ໜ່ວຍພັກອົງການໄອຍະການເຂດ I ໃຫ້ກຽດກ່າວມອບໂດຍ ສະຫາຍ ຮຽມ ໄຊຍະລາດ ກຳມະການປະຈໍາພັກເມືອງ, ເລຂາໜ່ວຍພັກຮາກຖານ, ຫົວໜ້ກອງບັນຊາການ ປກສ ເມືອງລະມາມ ກ່າວຮັບໂດຍ ສະຫາຍ ວຽງສະຫວັນ ສີຫວນຮັກ ເລຂາຫນ່ວຍພັກ, ຫົວຫນ້າອົງການໄອຍະການປະຊາຊົນເຂດ I ເມືອງລະມາມ ໂດຍມີບັນດາຄະນະພັກ, ສະມາຊິກພັກພາຍໃນຫນ່ວຍ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມເປັນຊົມເຊີຍຜົນງານ.


ຂ່າວ-ພາບ: ນາລີວັນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ

No comments

Powered by Blogger.