Header Ads

ເຊກອງ-ກອນຕູມ ຮັດແຫນ້ນຄວາມສາມັກຄີມິດຕະພາບ


ເພື່ອເປັນການຮັດແຫນ້ນຄວາມສາມັກຄີມິດຕະພາບ ແລະ ຫວນຄືນມູນເຊື້ອສອງວັນປະຫວັດສາດຄື: ວັນສ້າງຕັ້ງສາຍພົວພັນການທູດລາວ-ຫວຽດນາມຄົບຮອບ 55 ປີ ແລະວັນເຊັນສົນທິສັນຍາມິດຕະພາບລາວ-ຫວຽດນາມ ຄົບຮອບ 40 ປີ.
ຕອນບ່າຍວັນທີ 16 ສິງຫາ 2017 ຜ່ານມານີ້ ຢູ່ທີ່ຫ້ອງປະຊຸມຫ້ອງວ່າການປົກຄອງແຂວງເຊກອງ ໄດ້ມີພິທີພົບປະແລກປ່ຽນບົດຮຽນ ລະຫວ່າງຄະນະຜູ້ແທນຂັ້ນສູງ 2 ແຂວງ ເຊກອງ ສປປ ລາວ ແລະ ກອນຕູມ ສສ ຫວຽດນາມ ຊຶ່ງນໍາໂດຍທ່ານ ຫວຽນ ວັນຮຸງ ກໍາມະການສູນກາງພັກກອມມູນິດ ຫວຽດນາມ, ເລຂາພັກແຂວງ, ປະທານສະພາປະຊາຊົນແຂວງກອນຕູມ ໃຫ້ກຽດຕ້ອນຮັບຢ່າງອົບອຸ່ນໂດຍທ່ານ ຄໍາເຜີຍ ບຸດດາວຽງ ກໍາມະການສູນກາງພັກ, ເລຂາພັກແຂວງ, ເຈົ້າແຂວງເຊກອງ ໂດຍມີຄະນະນໍາທັງສອງຝ່າຍເຂົ້າຮ່ວມ.



ໃນກອງປະຊຸມ ຄະນະຜູ້ແທນທັງສອງຝ່າຍໄດ້ຜັດປ່ຽນກັນສະຫລຸບລາຍງານການຈັດຕັ້ງປະຕິບັດຮ່ວມມືໃນໄລຍະຜ່ານມາ ແລະ ພ້ອມກັນປະກອບຄໍາຄິດຄໍາເຫັນຕີລາຄາຄືນການຈັດຕັ້ງປະຕິບັດບົດບັນທຶກຊ່ວຍຈໍາທີ່ໄດ້ລົງນາມຮ່ວມກັນໃນໄລຍະຜ່ານມາ ພ້ອມທັງໄດ້ວາງທິດທາງແຜນການຮ່ວມມືກັນໃນຕໍ່ຫນ້າໃຫ້ນັບມື້ຫນັກແຫນ້ນເຂັ້ມແຂງ ແລະ ເລິກເຊິ່ງກວ່າເກົ່າ ເຊິ່ງທັງສອງຝ່າຍໄດ້ຕົກລົງເຫັນດີເປັນເອກະພາບຮ່ວມກັນໃນການສືບຕໍ່ຈັດຕັ້ງປະຕິບັດຮ່ວມມືມິດຕະພາບຮອບດ້ານເປັນຕົ້ນດ້ານວຽກງານສອງກໍາລັງປະກອບອາວຸດ (ທະຫານຊາຍແດນ) ຕ້ອງໄດ້ເພີ່ມທະວີການສ່ອງແສງລາຍງານສະພາບການ ແລະ ຂໍ້ມູນຂ່າວສານໃຫ້ກັນຊາບປົກກະຕິ, ທັນເວລາ ແລະ ເຂັ້ມງວດ, ສືບຕໍ່ຮ່ວມມືສ້າງເງື່ອນໄຂອໍານວຍຄວາມສະດວກໃຫ້ກັນ ແລະ ກັນ ແລະ ສະຫນອງຂໍ້ມູນຂ່າວສານລະຫວ່າງພະແນກການ, ຂະແຫນງການ ແລະ ທ້ອງຖິ່ນຂອງສອງແຂວງຢ່າງເປັນປົກກະຕິ. ທັງນີ້ກໍເພື່ອແນໃສ່ເພີ່ມທະວີຮັດແຫນ້ນສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງທ້ອງຖິ່ນໃຫ້ຫນັກແຫນ້ນ, ມີເນື້ອໃນກວ້າງຂວາງເຂົ້າສູ່ລວງເລິກ ແລະ ທັນເຫດການ.



ໂອກາດດຽວກັນນີ້, ຄະນະຜູ້ແທນຂັ້ນສູງທັງສອງຝ່າຍ ເຊກອງ-ກອນຕູມ ກໍໄດ້ເຊັນບົດບັນທຶກຊ່ວຍຈໍາມອບໂຄງການສາທາລະນຸປະໂພກ ລະຫວ່າງ ແຂວງກອນຕູມ ສສ ຫວຽດນາມ ແລະ ແຂວງເຊກອງ ສປປ ລາວ ວ່າດ້ວຍແຂວງກອນຕູມ ມອບໂຄງການເພື່ອສາທາລະນຸປະໂພກ ໃນມູນຄ່າ 01 ຕື້ດົ້ງ ຕາງຫນ້າຄະນະຜູ້ແທນຂັ້ນສູງແຂວງເຊກອງ ລົງນາມໂດຍ ປອ ຄໍາພຽມ ບົວລະພາ ຮອງເລຂາພັກແຂວງ, ປະທານສະມາຄົມມິດຕະພາບລາວ-ຫວຽດນາມ ແລະ ຕາງຫນ້າຝ່າຍແຂວງກອນຕູມ ໂດຍແມ່ນທ່ານ ນາງ ເຈິນ ທິ ງາ ຮອງປະທານຄະນະກໍາມະການປະຊາຊົນ ແຂວງກອນຕູມ ໂດຍມີຄະນະນໍາ ພ້ອມດ້ວຍນັກຂ່າວທັງສອງຝ່າຍ ຮ່ວມເປັນສັກຂີພິຍານ.




ຂ່າວ-ພາບ: ນາລີວັນ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.