Header Ads

ກະຊວງການເງິນ ຕີລາຄາຄວາມຄືບໜ້າ ການສ້າງລະບົບ ແຈ້ງພາສີປະຕູດຽວ


ໃນວັນທີ 7 ສິງຫາ 2017, ກະຊວງການເງິນ ໄດ້ຈັດກອງປະຊຸມ ປຶກສາຫາລື ແລະ ຕີ​ລາຄາຄວາມຄືບໜ້າ ການພັດທະນາລະບົບ ແຈ້ງພາສີປະຕູດຽວແຫ່ງຊາດ ໃນໄລຍະຜ່ານມາ ໂດຍສະເພາະ ແມ່ນການພັດທະນາໂມດູນ ການອອກໃບອະນຸຍາດ ຫລື ໃບຢັ້ງຢືນ ແບບເອເລັກໂຕຣນິກ ໃຫ້ແກ່ພາກລັດກ່ຽວກັບ ການນໍາເຂົ້າ-ສົ່ງອອກສິນຄ້າ ​ແລະ ເຄື່ອງຂອງ. ນອກນີ້, ຍັງໄດ້ກໍານົດ ແຜນວຽກຍຸດທະສາດ ການພັດທະນາລະບົບ ແຈ້ງພາສີປະຕູດຽວ ໃຫ້ສາມາດເຊື່ອມໂຍງ ເຂົ້າລະບົບອາຊີກູດາ (ASYCUDA) ຂອງອົງການອູນຕັກ (UNCTD) ໄດ້ຢ່າງສົມບູນ ແລະ ເພື່ອແນໃສ່ອໍານວຍຄວາມສະດວກ ໃຫ້ແກ່ທຸກຂົງເຂດ ໃນການບໍລິການແຈ້ງພາສີ ​ເຊິ່ງຈະເຮັດໃຫ້ລະບົບ ແຈ້ງພາສີປະຕູດຽວ ຂອງ ສປປ ລາວ ກ້າວໄປສູ່ຄວາມທັນສະໄໝ ແລະ ເປັນເອກະພາບກັບ ບັນດາປະເທດ ສະມາຊິກອາຊຽນດ້ວຍກັນ.

ປັດຈຸບັນ ການພັດທະນາ ລະບົບແຈ້ງພາສີປະຕູດຽວ ໄດ້ສໍາເລັດການພັດທະນາ ຕົ້ນແບບຂອງລະບົບ ແລະ ໄດ້ດໍາເນີນການທົດລອງ ນໍາໃຊ້ລະບົບເພື່ອອອກໃບອະນຸຍາດ ນໍາເຂົ້າພາຫະນະທົ່ວໄປ  ພາຍໃຕ້ການຄຸ້ມຄອງ ຂອງກົມການນໍາເຂົ້າ-ສົ່ງອອກ ກະຊວງອຸດສາຫະກໍາ ແລະ ການຄ້າ ​ເຊິ່ງເຫັນວ່າສາມາດນໍາໃຊ້ໄດ້ ໂດຍພື້ນຖານ, ຊຶ່ງການອອກໃບອະນຸຍາດດັ່ງກ່າວ ແມ່ນອີງຕາມແຈ້ງການ ຂອງກະຊວງອຸດສະຫະກໍາ ແລະ ການຄ້າ ວ່າດ້ວຍລາຍການສິນຄ້າ ທີ່ຕ້ອງຂໍອະນຸຍາດນໍາເຂົ້າ ຫລື ສົ່ງອອກແບບອັດຕະໂນມັດ ແລະ ແບບບໍ່ອັດຕະໂນມັດ ສະບັບເລກທີ 0076/ອຄ.ກຂອ, ລົງວັນທີ 13 ມັງກອນ 2012.

ພາຍຫລັງສໍາເລັດ ການທົດລອງນໍາໃຊ້ລະບົບດັ່ງກ່າວ, ຈະ​ໄດ້ຂະຫຍາຍການນໍາໃຊ້ໄປສູ່ ຂະແໜງການທີ່ຕິດພັນກັບ ການອອກໃບອະນຸຍາດ ນໍາເຂົ້າພາຫະນະ ໂດຍສະເພາະ ແມ່ນກົມຂົນສົ່ງ ກະຊວງໂຍທາທິການ ແລະ ຂົນສົ່ງ ເພື່ອອອກໃບອະນຸຍາດ ດ້ານເຕັກນິກນໍາເຂົ້າ ພາຫະນະກົນຈັກເຂົ້າ ແລະ ຂຶ້ນທະບຽນຢູ່ ສປປ ລາວ ແລະ ຂະແໜງການທີ່ກ່ຽວຂ້ອງ ກັບການອອກໃບອະນຸຍາດ ນໍາເຂົ້າອື່ນໆເຊັ່ນ: ກົມອາຫານ ແລະ ຢາ ກະຊວງສາທາລະນະສຸກ, ກົມປູກຝັງ, ກົມລ້ຽງສັດ ແລະ ການປະມົງ ກະຊວງກະສິກໍາ ແລະ ປ່າໄມ້ ເປັນຕົ້ນ.

ກອງ​ປະຊຸມ​ຄັ້ງ​ນີ້, ໂດຍການເປັນປະທານ ຂອງທ່ານ ນາງ ທິບພະກອນ ຈັນທະວົງສາ ຮອງລັດ ຖະມົນຕີ ກະຊວງການເງິນ, ປະທານຄະນະຊີ້ນໍາ ວຽກງານພັດທະນາ ລະບົບແຈ້ງພາສີປະຕູດຽວ ແຫ່ງຊາດ, ມີທ່ານ ບຸນປະເສີດ ສີກຸນລະບຸດ ຮັກສາການຫົວໜ້າກົມພາສີ ຜູ້ອໍານວຍການບໍລິສັດຮ່ວມພັດທະນາ ລະບົບແຈ້ງພາສີ ປະຕູດຽວແຫ່ງຊາດ (LNSW), ຜູ້ຈັດການໂຄງການ (LNSW), ພ້ອມດ້ວຍພະນັກງານວິຊາການ ແລະ ແຂກຖືກເຊີນຈາກບັນດາ ກະຊວງທີ່ກ່ຽວຂ້ອງເຂົ້າຮ່ວມ.

ຂ່າວ: ຫັດທະພອນ/ຂປລ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.