Header Ads

ເຊກອງ ສະຫຼອງວັນສ້າງຕັ້ງ ແນວລາວສ້າງຊາດ ຄົບຮອບ 67 ປີ


ການສະເຫລີມສະຫລອງວັນສ້າງຕັ້ງແນວລາວສ້າງຊາດ ຄົບຮອບ 67 ປີ (13/08/1950-13/08/2017) ແລະເຊື່ອມຊຶມມະຕິກອງປະຊຸມຄົບຄະນະສູນກາງແນວລາວສ້າງຊາດ ຄັ້ງທີ 2 ສະໄຫມທີ X. ແຂວງເຊກອງ ໄດ້ຈັດຂື້ນໃນຕອນເຊົ້າວັນທີ 11 ສິງຫາ 2017 ນີ້, ທີ່ສະໂມສອນໃຫຍ່ຫ້ອງວ່າການປົກຄອງແຂວງ, ໂດຍພາຍໃຕ້ການເປັນປະທານຂອງທ່ານ ສີດາ ສຸວັນນະສາຍ ຮອງເລຂາພັກແຂວງ ຮອງເຈົ້າແຂວງເຊກອງ, ໃຫ້ກຽດເຂົ້າຮ່ວມມີບັນດາພະເຖລະ-ນຸເຖລະ, ຫົວຫນ້າ-ຮອງພະແນກ, ຫົວຫນ້າ-ຮອງຫ້ອງການ, ຂະແຫນງການ ອ້ອມຂ້າງແຂວງ ພ້ອມດ້ວຍພະນັກງານວິຊາການພາຍໃນອົງການແນວລາວສ້າງຊາດເຂົ້າຮ່ວມ. 



ທ່ານ ຄໍາໄມ ດວງກັນຍາ ກໍາມະການພັກແຂວງ ປະທານແນວລາວສ້າງຊາດແຂວງ ໄດ້ເລົ່າຄືນມູນເຊື້ອວັນສ້າງຕັ້ງແນວລາວສ້າງຊາດ ກໍຄືການປະຕິວັດແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງອົງການແນວລາວສ້າງຊາດ, ປະຫວັດມູນເຊື້ອການຕໍ່ສູ້ກູ້ຊາດອັນພິລະອາດຫານຂອງແນວລາວສ້າງຊາດທີ່ມີພາລະບົດບາດ ແລະຜົນງານອັນໂດດເດັ່ນໃນໄລຍະຜ່ານມາຈົນເຖິງປະຈຸບັນ. 




ຈາກນັ້ນ, ທ່ານ ສົງຄໍາ ເທບບຸບຜາສາຍ ຮອງປະທານແນວລາວສ້າງຊາດແຂວງ ໄດ້ລາຍງານການເຄື່ອນໄຫວວຽກງານຂອງຄະນະກໍາມະການສູນກາງແນວລາວສ້າງຊາດ ຄັ້ງທີ 2 ສະໄຫມທີ X ແລະຜ່ານມະຕິກອງປະຊຸມສາມັນຄົບຄະນະກໍາມະການສູນກາງແນວລາວສ້າງຊາດ ຄັ້ງທີ 2 ສະໄຫມທີ X ທີ່ໄດ້ດໍາເນີນມາແຕ່ວັນທີ 16-17 ມີນາ 2017 ຜ່ານມາ ທີ່ນະຄອນຫລວງວຽງຈັນ ເຊິ່ງເນື້ອໃນໄດ້ຄົ້ນຄ້ວາຢ່າງເລິກເຊິ່ງ ແລະຮັບຮອງເອົາຢ່າງເປັນເອກະສັນຕໍ່ບົດລາຍງານການເຄື່ອນໄຫວວຽກງານຂອງຂອງຄະນະກໍາມະການສູນກາງແນວລາວສ້າງຊາດໃນ 1 ປີຜ່ານມາ ແລະທິດທາງແຜນການກໍຄືຈຸດສຸມໃນຕໍ່ຫນ້າ , ກອງປະຊຸມໄດ້ຮັບຮອງບັນດານິຕິກໍາຕ່າງໆ ພ້ອມທັບຮັບຮອງເອົາບັນດາການສະເຫນີແຕ່ງຕັ້ງຄະນະກໍາມະການສູນກາງແນວລາວສ້າງຊາດຊຸດໃຫມ່.ມະຕິດັ່ງກ່າວໄດ້ຖືກຮັບຮອງເອົາຢ່າງເປັນເອກະສັນໃນວັນທີ 17 ມີນາ 2017 ຜ່ານມາ. 




ໂອກາດນີ້, ທ່ານ ສີດາ ສຸວັນນະສາຍ ຮອງເລຂາພັກແຂວງ ຮອງເຈົ້າແຂວງເຊກອງກໍໄດ້ໃຫ້ກຽດໂອ້ລົມ ແລະຮຽກຮ້ອງມາຍັງບັນດາທ່ານກໍາມະການແນວລາວສ້າງຊາດຂັ້ນຕ່າງໆຈົ່ງເຊີດຊູຄວາມເປັນແບບຢ່າງນໍາຫນ້າໃນທຸກດ້ານ ນໍາພາມະຫາຊົນປະຕິບັດມະຕິຕ່າງໆຂອງຊາດຂອງພັກ ກໍຄືຂອງສູນກາງແນວລາວສ້າງຊາດວາງອອກໃຫ້ປະກົດຜົນເປັນຈິງ. ພ້ອມດຽວກັນນີ້ ກໍຮຽກຮ້ອງມາຍັງພະນັກງານ, ນັກຮົບ, ປະຊາຊົນລາວບັນດາເຜົ່າ, ບັນດາຊັ້ນຄົນ, ສາສະຫນາ ແລະພີ່ນ້ອງຊາວແຂວງເຊກອງ ຈົ່ງເຊີດຊູນໍ້າໃຈຮັກຊາດ- ຮັກລະບອບປະຊາທິປະໄຕປະຊາຊົນ ແລະມີມານະຈິດບາກບັ່ນບຸກບືນໃນການປະຕິບັດຫນ້າທີ່, ປະກອບສ່ວນເພື່ອສ້າງສາພັດທະນາປະເທດຊາດໃຫ້ມັ່ງຄັ່ງເຂັ້ມແຂງ ແລະສີວິໄລຂຶ້ນເປັນກ້າວໆ.


ທີ່ມາ: ຂ່າວແຊກອງ 
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.