Header Ads

ສື່ມວນຊົນ ແລະ ການພິມຈໍາໜ່າຍເປັນເຄື່ອງມື ເປັນປາກກະບອກສຽງທີ່ແຫຼມຄົມ



ພິທີສະເຫລີມສະຫລອງ ວັນສື່ມວນຊົນແຫ່ງຊາດ ແລະ ການພິມຈຳໜ່າຍ 13 ສິງຫາ ຄົບຮອບ 67 ປີ ໄດ້ຈັດຂຶ້ນໃນຕອນບ່າຍຂອງວັນທີ 11 ສິງຫາ 2017 ຢູ່ທີ່ຫ້ອງປະຊຸມພະແນກ ຖວທ ແຂວງ ເຊກອງ ໂດຍການເຂົ້າຮ່ວມຂອງ ທ່ານ ບູ່ໄຊ ໄຊຍະເສນ ກໍາມະການພັກແຂວງ ເລຂາຄະນະພັກຮາກຖານ ຫົວໜ້າພະແນກ ຖວທ ແຂວງເຊກອງ, ມີບັນດາຄະນະພັກ-ຄະນະພະແນກ, ຫົວໜ້າຫ້ອງການ-ຮອງຫ້ອງການ, ຂະແໜງການ ແລະພາກສ່ວນທີ່ກ່ຽວຂ້ອງເຂົ້າຮ່ວມ.


ໃນພິທີຄັ້ງນີ້ ທ່ານ ບຸນທົງ ຖິ່ນດອນໂຂງ ຮອງຫົວໜ້າພະແນກ ຖວທ ແຂວງ ຜູ້ຊີ້ນຳວຽກງານຖະແຫຼງຂ່າວສື່ມວນຊົນ ໄດ້ຂຶ້ນຜ່ານບົດລາຍງານການເມືອງ ຕະຫລອດໄລຍະ 67 ປີ ແຫ່ງການກໍາເນີດ ແລະ ເຕີບໃຫຍ່ຂະຫຍາຍຕົວຂອງສື່ມວນຊົນລາວ ແລະ ການພິມຈໍາໜ່າຍໃນໄລຍະຜ່ານມາ ຊຶ່ງທ່ານໄດ້ຍົກໃຫ້ເຫັນ ນັບແຕ່ມື້ສ້າງຕັ້ງອົງການສື່ມວນຊົນລາວ ວັນທີ 13 ສິງຫາ 1950 ມາເຖິງປັດຈຸບັນສື່ມວນຊົນລາວ ຊຶ່ງເປັນເວທີຖະແຫລງຂ່າວ ມີພາລະບົດບາດເປັນກະບອກສຽງຂອງອົງການຈັດຕັ້ງຂອງພັກ-ລັດ ແລະ ສັງຄົມ ໃນການໂຄສະນາສຶກສາອົບຮົມແນວທາງຂອງພັກ, ລະບຽບກົດໝາຍຂອງລັດ, ປຸກລະດົມນ້ຳໃຈຮັກຊາດ, ສະໜອງຂໍ້ມູນຂ່າວສານທາງດ້ານການເມືອງ, ເສດຖະກິດ-ສັງຄົມ, ວິທະຍາສາດເຕັກໂນໂລຊີ, ສາລະຄະດີຄວາມຮູ້, ສາລະບັນເທິງ ໃຫ້ແກ່ສັງຄົມ, ປະກອບສ່ວນຕ້ານປະກົດການຫຍໍ້ທໍ້ໃນສັງຄົມ, ເປັນເວທີເສີມຂະຫຍາຍ ປະຊາທິປະໄຕ ແລະ ສິດເປັນເຈົ້າປະເທດຊາດຂອງປະຊາຊົນບັນດາເຜົ່ານັ້ນໄດ້ເຕີບໃຫຍ່ ແລະ ຍາດໄດ້ຜົນງານອັນລໍ້າເລີດ ຜ່ານບາດລ້ຽວປະຫວັດສາດຂອງຊາດລາວ ເປັນຕົ້ນໃນໄລຍະແຫ່ງການຕໍ່ສູ້ປົດປ່ອຍຊາດ ກໍຄືໄລຍະແຫ່ງການປົກປັກຮັກສາ ແລະ ສ້າງສາໄລຍະແຫ່ງການປ່ຽນແປງໃໝ່ຂອງພັກ ເປັນຕົ້ນໜັງສືພິມ ແລະ ວາລະສານໄດ້ຮັບການຂະຫຍາຍຕົວວ່ອງໄວ ປັດຈຸບັນມີສື່ສິ່ງພິມ 133 ສະບັບ ( ຂອງລັດ 89 ສະບັບ ແລະເອກະຊົນ 44 ສະບັບ). ໃນນັ້ນ, ມີໜັງສືພິມ 27 ສະບັບ, ເປັນໜັງສືພິມລາຍວັນມີ 11 ສະບັບ, ມີວາລະສານທັງໝົດ 102 ສະບັບ ( ຂອງລັດ 59 ສະບັບ ແລະເອກະຊົນ 43 ສະບັບ); ດ້ານສື່ວິທະຍຸກະຈາຍສຽງ ກໍໄດ້ມີການເຕີບໃຫຍ່ຂະຫຍາຍໂຕເປັນກ້າວໆມາ ປະຈຸບັນມີ 63 ສະຖານີ ເພີ່ມຂຶ້ນ 23 ສະຖານີ ຖ້າທຽບໃສ່ປີ 2007. ໃນນີ້, ຢູ່ສູນກາງມີ 10 ສະຖານີ, ຢູ່ທ້ອງຖິ່ນ 53 ແຫ່ງ ໃນນີ້, ການກະຈາຍສຽງທາງພື້ນດິນໃນລະບົບເອັບເອັມ ກວມ 90% ຂອງພື້ນທີ່ທົ່ວປະເທດ, ການກະຈາຍສຽງຜ່ານດາວທຽມ ແລະອິນເຕີເນັດກວມ 100% ຂອງພື້ນທີ່ທ່ວປະເທດ ແລະ ຫຼາຍປະເທດໃນໂລກ; ດ້ານສື່ໂທລະພາບ ທັງໝົດມີ 37 ສະຖານີ ເພີ່ມຂຶ້ນ 5 ສະຖານີ ຖ້າທຽບໃສ່ໄລຍະປີຜ່ານມາ ໃນນັ້ນ, ສູນກາງ ແລະ ລະດັບຊາດມີ 10 ສະຖານີ ສະຖານີເປັນຂອງເອກະຊົນມີ 3 ສະຖານີ ແລະຢູ່ທ້ອງຖິ່ນມີ 27 ສະຖານີ ສາມາດກະຈາຍສັນຍານຜ່ານດາວທຽມລະບົບອິນເຕີເນັດ ແລະກະຈາຍຜ່ານເຄື່ອງສົ່ງທາງໜ້າດິນ ກວມ 80% ຂອງພື້ນທີ່ທົ່ວປະເທດ. ນອກນີຍັງມີສະຖານີຖ່າຍທອດໂທລະພາບຫວຽດນາ vtv4, ສະຖານີຖ່າຍທອດໂທລະພາບ ສປ ຈີນ, ຢູ້ໃນລະດັບຕົວເມືອງໃຫຍ່ໃນຂອບເຂດທົ່ວປະເທດໄດ້ມີການບໍລິການໂທລະພາບໃຊ້ສາຍ ແລະໂທລະພາບດີຈີຕອລ.



ພ້ອມດຽວກັນນີ, ກໍໄດ້ມີສື່ແບບໃໝ່ເກີດຂຶນ ເປັນຕົ້ນສື່ອອນລາຍເຊັ່ນ: SMS, Facebook, ເວັບໄຊສ໌ ແລະພາຫະນະອື່ນໆ ທີ່ເຮັດໃຫ້ການໂຄສະນາຂໍ້ມູນຂ່າວສານວ່ອງໄວເຂົ້າເຖິງເປົ້າໝາຍໄດ້ໃນຂອບເຂດທົ່ວໂລກ.
ຕະຫຼອດໄລຍະ 67 ປີຜ່ານມາ, ວຽກງານການພິມ ແລະຈໍາໜ່າຍກໍມີການພັດທະນາ ແລະເຕີບໃຫຍ່ຂະຫຍາຍຕົວເຊັ່ນດຽວກັນ ປະຈຸບັນທົ່ວປະເທດມີໂຮງພິມ, ຮ້ານພິມ ແລະ ຮ້ານອອກແບບພິມທັງໝົດ 112 ແຫ່ງ.

 ໃນນັ້ນ, ມີໂຮງພິມລັດເກືອບ 10 ແຫ່ງ, ໂຮງພິມເອກະຊົນ 105 ແຫ່ງ, ມີສໍານັກພິມ 16 ແຫ່ງ ( ລັດ 2 ແຫ່ງ ແລະເອກະຊົນ 14 ແຫ່ງ), ບໍລິສັດແປພາສາ 7 ແຫ່ງ, ບໍລິສັດອອກແບບໂຄສະນ 8 ແຫ່ງ, ຮ້ານຈໍາໜ່າຍປຶ້ມ ແລະ ສື່ສິ່ງພິມ 15 ແຫ່ງ. ພ້ອມນີ້ຜົນງານການປະພັນຂອງບັນດານັກຂຽນກໍໄດ້ຮັບການພັດທະນາ ແລະ ເຕີບໃຫຍ່ຂະຫຍາຍຕົວຂຶ້ນເລື້ອຍໆ.
ໃນໂອກາດດຽວກັນນີ້ ກໍໄດ້ມີພິທີປິດຊຸດຝຶກອົບຮົມການສ້າງ ແລະ ຄຸ້ມຄອງການນໍາໃຊ້ ເວັບໄຊສ໌ ຂອງພະແນກ ຖວທ ແຂວງເຊກອງ ທີ່ມີຊື່ວ່າ www.dict-sekong.gov.la ຢ່າງເປັນທາງການ ເພື່ອໂຄສະນາເຜີຍແຜ່ພາລະບົດບາດໜ້າທີ່ ແລະ ແນວທາງນະໂຍບາຍຂອງພັກ-ລັດ, ເຜີຍແຜ່ຂໍ້ມູນຂ່າວສານ, ໂຄສະນາສຶກສາອົບຮົມການເມືອງແນວຄິດ ແລະ ແລກປ່ຽນຂໍ້ມູນຂ່າວສານ.

 ຂ່າວ-ພາບ: ນາລີວັນ/ຂ່າວແຂວງເຊກອງ

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.