Header Ads

ການລະເບີດ ຜາຫີນ ອາດກະທົບການທ່ອງທ່ຽວ ເມືອງວັງວຽງ



ຊາວເມືອງວັງວຽງແຂວງວຽງຈັນເລີ່ມມີຄວາມເປັນຫວ່ງຕໍ່ສະພາບການລະເບີດຜາຫີນທໍາມະຊາດທີ່ສວຍງາມໃນເຂດໃກ້ກັບແຫລ່ງທ່ອງທ່ຽວສໍາຄັນຂອງເມືອງ ເພື່ອເອົາຫີນຜາເຫລົ່ານັ້ນສະໜອງໃຫ້ແກ່ໂຮງງານອຸດສະຫະກໍາ, ຊຶ່ງພວກເຂົາຢ້ານຈະເກີດມີຜົນກະທົບທີ່ບໍ່ດີຕໍ່ການທ່ອງທ່ຽວໃນຕໍ່ໜ້າ.


ເນື່ອງຈາກວ່າປັດຈຸບັນເມືອງວັງວຽງ ພວມໄດ້ຮັບຄວາມນິຍົມຈາກນັກທ່ອງທ່ຽວທັງພາຍໃນ ແລະ ຕ່າງປະເທດເຂົ້າໄປຢ້ຽມຢາມ ແລະ ທ່ຽວຊົມເປັນຈໍານວນຫລວງຫລາຍ, ຍ້ອນມີພູຜາ, ສາຍນໍ້າທໍາມະຊາດທີ່ສວຍງາມ, ມີແຫລ່ງທ່ອງທ່ຽວທໍາມະຊາດ ທີ່ໜ້າສົນໃຈຫລາກຫລາຍ ເປັນຕົ້ນ: ຖໍ້າຈັງ, ຖໍ້າລົມ, ຖໍ້າປູຄໍາ, ຖໍ້າຊ້າງ, ພ້ອມ ມີອາກາດສົດຊື່ນຕະຫລອດທັງປີ, ອັນເປັນສິ່ງດຶງດູດຄວາມສົນໃຈຂອງບັນດາ ນັກທ່ອງທ່ຽວທີ່ພົບເຫັນ ແລະ ຫລົງໄຫລຕໍ່ຄວາມສວຍງາມຂອງທໍາມະຊາດໃນເຂດເມືອງດັ່ງກ່າວຈົນຂະໜານນາມສົມທຽບວ່າເປັນກຸຍຫລີນເມືອງລາວ ແລະ ບັນຍາກາດການທ່ອງທ່ຽວທີ່ຄືກຄື້ນຕະຫລອດປີຂອງເມືອງວັງວຽງນີ້ ໄດ້ຊ່ວຍໃຫ້ຊີວີດການເປັນຢູ່ຂອງປະຊາຊົນນັບມື້ດີຂຶ້ນ, ປະຊາຊົນໄດ້ມີລາຍຮັບຫລາຍຂຶ້ນຈາກການດໍາເນີນທຸລະກິດບໍລິການ, ຮ້ານອາຫານ, ເຮືອນພັກ, ໂຮງແຮມ, ຄ້າຂາຍອາຫານການກີນ, ສີນຄ້າທີ່ລະນຶກຕ່າງໆເປັນຢ່າງດີ ແລະ ເປັນເມືອງທີ່ສ້າງລາຍຮັບຈາກການທ່ອງທ່ຽວຫລາຍສົມຄວນໃຫ້ແກ່ແຂວງວຽງຈັນ ກໍຄືຂອງຊາດໃນແຕ່ລະປີ. 



ແຕ່ປັດຈຸບັນ, ສິ່ງທີ່ປະຊາຊົນໃນເຂດດັ່ງກ່າວເລີ່ມມີຄວາມເປັນຫວ່ງຫລາຍແມ່ນຜາຫີນທໍາມະຊາດອັນສວຍງາມທີ່ພວມເປັນຈຸດເດັ່ນດຶງດູດນັກທ່ອງທ່ຽວກໍາລັງຖືກທໍາລາຍດ້ວຍການລະເບີດໃນຫລາຍຈຸດ, ໂດຍສະເພາະເມື່ອພວກເຮົາຂ້າມນໍ້າຊອງເພື່ອໄປຊົມແຫລ່ງທ່ອງທ່ຽວຖໍ້າປູຄໍາ ກໍຈະສັງເກດເຫັນຊັດເຈນຮ່ອງຮອຍຂອງຜາຫີນທີ່ຖືກລະເບີດ ແລະ ໄຫລ່ເຈື່ອນລົງມາ, ສິ່ງດັ່ງກ່າວຖ້າຫາກການຕິດຕາມກວດກາຂອງອໍານາດການປົກຄອງ ຫລື ພາກສ່ວນກ່ຽວຂ້ອງບໍ່ເຂັ້ມງວດແລ້ວ, ນອກຈາກສົ່ງຜົນກະທົບອັນບໍ່ດີຕໍ່ທໍາມະຊາດ, ສິ່ງແວດລ້ອມ ແລະ ຊົມຊົນແລ້ວ, ມັນອາດຈະສົ່ງຜົນສະທ້ອນດ້ານລົບຫລາຍດ້ານຕໍ່ການທ່ອງທ່ຽວເມືອງດັ່ງກ່າວກໍຄືປະເທດຊາດໃນຕໍ່ໜ້າ.



ທີ່ມາ: ຫນັງສືພິມລາວພັດທະນາ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.