Header Ads

ເຈົ້າຄອງ ນວ ລົງກວດກາຈຸດທີ່ມີຄວາມສ່ຽງພາໃຫ້ເກີດນໍ້າຖ້ວມຢູ່ນະຄອນຫລວງ



ວັນທີ 7 ສິງຫາ 2017 ທ່ານ ສິນລະວົງ ຄຸດໄພທູນ ເຈົ້າຄອງນະຄອນຫຼວງວຽງຈັນ, ທ່ານ ແກ້ວພິລາວັນ ອາໄພລາດ, ຮອງເຈົ້າຄອງ, ເມືອງໄຊເສດຖາ, ບັນດາພະແນກການ, ຫ້ອງການ ແລະ ພາກສ່ວນກ່ຽວຂ້ອງ ໄດ້ລົງກວດກາຈຸດຕ່າງໆທີ່ມີຄວາມສ່ຽງພາໃຫ້ເກີດມີສະພາບນໍ້າອັ່ງຂັງໃນລະດູຝົນ ຢູ່ເມືອງໄຊເສດຖາ ນວ ຂະນະທີ່ ເຂດໄຟແດງຢູ່ຕະຫລາດທາດຫລວງຍັງແກ້ໄຂບັນຫານໍ້າຖ້ວມບໍ່ຕົກ ແລະ ແກ່ຍາວມາໄດ້ 4 ປີແລ້ວເພາະລະດູຕົກແຮງຍາມໃດເກີດນໍ້າຖ້ວມເລື້ອຍໆ ເຊິ່ງສ້າງຄວາມຍຸ້ງຍາກໃຫ້ຜູ້ສັນຈອນໄປມາ.



ຄະນະດັ່ງກ່າວໄດ້ລົງສຳຫຼວດໂດຍໃຊ້ເຮືອເພື່ອເລາະສຳຫຼວດລະດັບນ້ຳ ແລະ ແລວນ້ຳໄຫຼ ໂດຍເລີ່ມຈາກຈຸດ ຄອງນ້ຳທາງຂ້າງຂອງສູນການຄ້າ ອາຊຽນມໍ ເລາະຕາມແລວຄອງ ບຶງທາດຫຼວງ ໄປຂົວໜອງໜ່ຽງ, ຂົວຊຳເຄ້ ຈົນເຖິງ ຂົວຈອມສີ ເຊີ່ງຄິດໄລ່ຄວາມຍາວຂອງຄອງນໍ້ານີ້ ໃນຂອບຂອງເມືອງໄຊເສດຖາ ແມ່ນມີລວງຍາວ 19 Km. ໃນການລົງກວດກາຄັ້ງນີ້ ທ່ານ ເຈົ້າຄອງ ນວ ໄດ້ໃຫ້ທິດຊີ້ນຳວ່າ: ລະດູຝົນປີນີ້ ນວ ພວກເຮົາມີ 2 ຄາດໝາຍ ຄື: ກະກຽມຮັບມືກັບລະດູຝົນ ທີ່ອາດເກີດມີຝົນຕົກໜັກ, ມີພາຍຸ ແລະ ໄພທຳມະຊາດອື່ນໆ ທີ່ອາດເຂົ້າມາແບບກະທັນຫັນ, ໃນນີ້ ແມ່ນເລັ່ງໃສການລະບາຍນ້ຳ ອອກຈາກຕົວເມືອງໃຫ້ວ່ອງໄວ ບໍ່ໃຫ້ມີນ້ຳຖ້ວມອັ່ງຂັ່ງໃນຕົວເມືອງ. ອັນທີສອງ ແມ່ນການລົງສຳຫຼວດ ເພື່ອການວາງແຜນຜັງໃນການພັດທະນາຄອງນ້ຳ ຂອງ ນວ ໃນອານາຄົດ ນັ້ນໝາຍວ່າ ເຮັດໃຫ້ຄອງນ້ຳແຫ່ງນີ້ ການເປັນຄອງນ້ຳທີສະອາດ, ມີສີ່ງແວດລ້ອມອອ້ມຂ້າງທີ່ສີຂຽວ, ສວຍງາມ ສາມາດສ້າງປະໂຫຍດໃຫ້ແກ່ປະຊາຊົນທີ່ອາໄສຢູ່ຕາມລຽບຄອງນ້ຳ ແລະ ເຮັດໃຫ້ກາຍເປັນແຫຼ່ງທ່ອງທ່ຽວ ທາງນ້ຳ ເພື່ອສ້າງມົນສະເໜ່ ໃຫ້ນະຄອນຫຼວງວຽງຈັນ. ເຊີ່ງທັງສອງຄາດໝາຍນີ້ ນວ ເຮົາແມ່ນໄດ້ສືບຕໍ່ປະຕິບັດຕາມແບບແຜນຍຸດທະສາດ, ຄາດໝາຍການພັດທະນາ ນວ ໃຫ້ກາຍເປັນ ນະຄອນໜ່າຢູ່, ເຊີ່ງກໍແມ່ນ ນວເຮົາ ເປັນຜູ້ລົງສຳຫຼວດ, ວາງແຜນຜັງ ແລະ ສະເໜີຕໍ່ລັດຖະບານ ເພື່ອພິຈາລະນາກວດກາ ແລະ ກຳນົດຫຼັກການຈັດຕັ້ງປະຕິບັດຕໍ່ໄປ.


ໃນການລົງສຳຫຼວດຄັ້ງນີ້ ກໍໄດ້ມີພາກສ່ວນຜູ້ປະກອບການ ທີ່ກຳລັງດຳເນີນກິດຈະການ ເພື່ອປັບປຸງ ແລະ ພັດທະນາ ບໍລິເວນລຽບຄອງບຶງທາດຫຼວງ ເຊີ່ງກໍໄດ້ລາຍງານຂໍ້ສະດວກ ແລະ ສະເໜີບາງຂໍ້ຫຍຸ້ງຍາກ ໃນການດໍາເນີນວຽກງານຕໍ່ຄະນະລົງສຳຫຼວດວ່າ:

- ຂໍ້ສະດວກ: ແມ່ນຂໍຊົມເຊີຍນຳພາກລັດ ແລະ ມີຄວາມຍິນດີຫຼາຍ ທີ່ໃຫ້ບໍລິສັດ ພວກເຮົາໄດ້ມີສ່ວນຮ່ວມ ໃນການປະກອບສ່ວນເພື່ອສ້າງສາ ແລະ ພັດທະນານະຄອນຫຼວງວຽງຈັນ, ໂດຍການປະຕິບັດຕາມທິດທາງການພັດທະນາແບບໃໝ່ນີ້, ແມ່ນພາກລັດເອງຈະບໍ່ໄດ້ສະໜອງທຶນໃດໆ ໃຫ້ບໍລິສັດພວກເຮົາ, ໃຫ້ບໍລິສັດເປັນຜູ້ລົງທຶນ ແຕ່ພາກລັດກໍແມ່ນໄດ້ຂຸດຄົ້ນທ່າແຮງບົ່ມຊ້ອນ ທີ່ມີຢູ່ໃນພື້ນທີ່ເອງ ກໍຄື: ເອົາດິນການຈົກຂຸດດິນເພື່ອແປງແຄມຝັ່ງຄອງ ແລະ ຈົກເອົາດິນຢູ່ພື້ນນໍ້ຳຂື້ນມາ ນອກຈາກເຮັດໃຫ້ຄອງນ້ຳເລີກຂື້ນ ແລະ ຮອງຮັບປະລິມານນ້ຳທີ່ໄຫຼຜ່ານໄດ້ຫຼາຍຂື້ນແລ້ວ ດິນດັ່ງກ່າວ ຍັງສາມາດຂາຍເປັນດິນຝຸ່ນຊີວະພາບ, ດິນກະສິກຳ ໃຫ້ແກ່ຜູ້ທຳການຜະລິດກະສິກຳນຳໄປໃຊ້ໃນວຽກງານປູກຝັ່ງໄດ້ອີກ... ເຊີ່ງນັ້ນກໍໄດ້ກາຍມາເປັນທຶນຮອນ ແລະ ເປັນກຳລັງແຮງ ຊ່ວຍຍູ້ດັນ ໃນການດຳເນີນງານຂອງພວກເຮົາ.

- ຂໍ້ຫຍຸ້ງຍາກ: ຍັງມີປະຊາຊົນບາງຄອບຄົວ ທີ່ມີດິນ ແລະ ອາໄສຢູ່ຕາມສອງຝາກຂອງບຶງ ແມ່ນຍັງບໍ່ໃຫ້ຄວາມຮ່ວມມືເທົ່າທີ່ຄວນ, ການອອກໃບຕາດິນທີ່ກວມເອົາເຂດສະຫງວນຂອງຄອງນ້ຳ, ຍັງມີບາງກຸ່ມ ຍັງລັກລອບເຮັດ ເຄື່ອງຫາປາຂະໜາດໃຫຍ່ຢູ່ກາງຄອງນ້ຳ, ເຮັດເຮັດການສືບຕໍ່ພັດທະນາຂະຫຍາຍບໍລິເວນແຄມຄອງນ້ຳ ຫຼື ຕາຝັ່ງຄອງ ຍັງບໍ່ສາ ມາດປະຕິບັດໃຫ້ສຳເລັດຕາມແບບແຜນ ແລະ ແຜນຜັງທີ່ໄດ້ກຳນົດໄວ້ເທື່ອ.

ທ້າຍສຸດ ທ່ານເຈົ້າຄອງ ນວ ກໍໄດ້ຍ້ອງຍໍຊົມເຊີຍບັນດາຜູ້ປະກອບການ ທີ່ມີນໍ້າໃຈຢາກພັດທະນາ ປະກອບສ່ວນດ້ວຍກຳລັງແຮງຂອງຕົນ ເພື່ອພັດທະນາ ນວ, ຊົມເຊີຍປະຊາຊົນສ່ວນຫຼາຍ ທີ່ໃຫ້ຄວາມຮ່ວມມື ໃນການຈັດຕັ້ງປະຕິບັດ ເພື່ອການພັດທະນາ ນັ້ນເປັນມິດໝາຍອັນດີຍີ່ງ ໃນເມື່ອປະຊາຊົນໃຫ້ຄວາມຮ່ວມມື, ຜູ້ປະກອບການເປັນຜູ້ລົງມືເຮັດ ແລະ ກໍ່ສ້າງ, ພາຍໃຕ້ການຊີ້ນຳ ແລະ ຕິດຕາມຂອງ ພາກລັດ ນີ້ແມ່ນແບບແຜນການພັດທະນາທີ່ຍືນຍົງ. ທັງນີ້ ຈິດໃຈລວມກໍແມ່ນ ໃຫ້ພາກສ່ວນກ່ຽວຂ້ອງເອົາໃຈໃສ່ຕິດຕາມ, ກວດກາ ໂດຍສະເພາະ ພະແນກ ຍ.ທ.ຂ, ພະແນກຊັບພະຍາກອນທຳມະຊາດ-ສີ່ງແວດລ້ອມ, ພະແນກກະສິກຳ-ປ່າໄມ້, ຫ້ອງການຄຸ້ມຄອງ ແລະ ບໍລິການຕົວເມືອງ ແລະ ເມືອງໄຊເສດຖາ ຕ້ອງເປັນເຈົ້າການ ຊ່ວຍກັນ ໃນການປົກປັກຮັກສາເຂດດິນສະຫງວນລະຫວ່າງ ສອງຝາກຄອງບຶງ ເບື້ອງລະ 50 ແມັດ, ຮັກສາເຂດສະຫງວນ ແກ້ມລິງ 250 ແມັດ ຕາມລະບຽບການວາງອອກ, ຕ້ອງຮັກສາບຶງທີ່ມີແບບທໍາມະຊາດ ໃຫ້ຄົງຢູ່ ບໍ່ໃຫ້ມີການບຸກລຸກ, ຖົ່ມດິນຕື່ມອີກ, ຕ້ອງຮັກສາໄວ້ໃຫ້ເປັນຕາມແບບທຳມະຊາດໃຫ້ມາ ເພື່ອເຮັດໃຫ້ການພັດທະນາ ເປັນໄປຕາມແບບແຜນ ແລະ ຄາດໝາຍຂອງ ນວ, ທັງນີ້ກໍແມ່ນເພື່ອເຮັດໃຫ້ການລະບາຍນໍ້າ ມີຄວາມຄ່ອງຕົວ, ມີບ່ອນຮອງຮັບປະລິມານນ້ຳທີ່ໄຫຼມາຈາກຕົວເມືອງ ເພື່ອໄຫຼປ່ອງສູ່ສາຂາແມ່ນ້ຳໃຫຍ່ ແລະ ຄາດໝາຍໃຫຍ່ກໍແມ່ນ ເຮັດໃຫ້ຄອງແຫ່ງນີ້ ກາຍເປັນແຫຼ່ງທ່ອງທ່ຽວທາງນ້ຳ, ສາມາດລ່ອງເຮືອຜ່ານໃຈກາງເມືອງໄດ້ ເຊີ່ງຈະກາຍເປັນສີ່ງດຶງດູດນັກທ່ອງທ່ຽວ ແລະ ເປັນແຫຼ່ງທຶນມະຫາສານໃຫ້ແກ່ນະຄອນຫຼວງໃນອານາຄົດຢ່າງແນ່ນນອນ.


ຂ່າວ: ວຽງຈັນວັນໃໝ່

------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.