Header Ads

ແຂວງເຊກອງ ອອກໃບຕາດິນໄດ້ກວ່າ 1 ພັນຕອນ



ໃນປີ 2016 ຜ່ານມາ ພະນັກງານ ພະແນກຊັບພະບາກອນທຳມະຊາດ ແລະ ສິ່ງແວດລ້ອມແຂວງເຊກອງ ກໍຄືຂະແໜງຄຸ້ມຄອງທີ່ດິນ ສາມາດຍາດໄດ້ຜົນງານທີ່ພົ້ນເດັ່ນຫຼາຍໆດ້ານ ໜຶ່ງໃນນັ້ນກໍຄືວຽກງານອອກໃບຕາດິນໃນຮູບແບບເປັນລະບົບ ແລະ ອັນສະເພາະໄດ້ທັງໝົດກວ່າ 1 ພັນຕອນ ຊຶ່ງສາມາດສ້າງລາຍຮັບເຂົ້າປະມານຂອງລັດໄດ້ເກືອບ 90 ລ້ານກີບ.
ວັນທີ 9 ສິງຫາ 2017 ທີ່ພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງເຊກອງ ໄດ້ຈັດພິທີຮັບຮອງເອົາໜ່ວຍພັກຂະແໜງຄຸ້ມຄອງທີ່ດິນເປັນໜ່ວຍພັກແຂງ-ຮູ້ນຳພາຮອບດ້ານຄັ້ງທີ II ປະຈຳປີ 2016 ຂຶ້ນ ໂດຍການເຂົ້າຮ່ວມຂອງສະຫາຍ ອ້ວນຄຳ ທຸງໄຊ ກຳມະການພັກແຂວງ, ຫົວໜ້າຄະນະຈັດຕັ້ງແຂວງ, ທ່ານ ບຸນຫຼາຍ ບຸດທິ ກຳມະການພັກແຂວງ, ເລຂາຄະນະພັກຮາກຖານ, ຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ, ມີເລຂາ-ຮອງເລຂາຄະນະໜ່ວຍພັກຂະແໜງການກ່ຽວຂ້ອງ ຕະຫຼອດຮອດບັນດາສະມາຊິກພັກຂອງໜ່ວຍເຂົ້າຮ່ວມ.




ໃນວາລະດໍາເນີນກອງປະຊຸມ ສະຫາຍ ສຸກສະໄຫວ ແກ້ວຄຳໂກດ ເລຂາໜ່ວຍພັກຂະແໜງຄຸ້ມຄອງທີ່ດິນ ໄດ້ຂຶ້ນລາຍງານການປະຕິບັດແຜນກໍສ້າງໜ່ວຍພັກແຂງ-ຮູ້ນຳພາຮອບດ້ານປະຈຳປີ 2016 ຊຶ່ງຍາມໃດຄະນະໜ່ວຍພັກກໍໄດ້ເອົາໃຈໃສ່ສຶກສາອົບຮົມການເມືອງນຳພາແນວຄິດໃຫ້ບັນດາສະມາຊິກພັກ, ພະນັກງານ-ລັດຖະກອນຢ່າງເປັນປົກ ກະຕິ ແລະ ຕໍ່ເນື່ອງ ໄປພ້ອມໆກັບການດຳເນີນຊີວິດການເມືອງພາຍໃນພັກ ຕິດພັນກັບການກວດກາຕີລາຄາໜ່ວຍພັກແຂງຮູ້ນຳພາຮອບດ້ານ, ປັດຈຸບັນມີສະມາຊິກພັກທັງໝົດ 19 ສະຫາຍ, ຍິງ 1 ສະຫາຍ, ໃນນີ້ສະມາຊິກພັກສຳຮອງ 1 ສະ¬ຫາຍ.




ໂອກາດດັ່ງກ່າວ ກໍ່ໄດ້ຕີລາຄາການຊີ້ນໍາ-ນໍາພາຂອງຄະນະໜ່ວຍພັກ ແລະ ສະມາຊິກພັກ, ພະນັກງານ-ລັດຖະ ກອນ ໃນປີ 2016 ຜ່ານມາ, ເຊິ່ງໄດ້ສະແດງໃຫ້ເຫັນເຖິງຄວາມເອົາໃຈໃສ່ໃນການປະຕິບັດໜ້າທີ່ວຽກງານວິຊາສະເພາະຕາມພາລະບົດບາດ, ຂອບເຂດສິດ, ໜ້າທີ່ຄວາມຮັບຜິດຊອບຂອງຕົນ ແລະ ສາມາດຍາດໄດ້ຜົນສຳເລັດຫຼາຍດ້ານ, ສະແດງອອກໃນຕົວເລກການອອກໃບຕາດິນຂອງລັດ ແລະ ສ່ວນບຸກຄົນ ຢູ່ 3 ເມືອງຄື: ເມືອງລະມາມ, ທ່າແຕງ ແລະ ເມືອງດາກຈຶງໄດ້ທັງໝົດ 1,128 ຕອນເທົ່າກັບ 48.420,8 ເຮັກຕາ ໃນນີ້ບຸກຄົນ-ນິຕິບຸກຄົນ 926 ຕອນ, ດິນລັດ 6 ຕອນ, ດິນລວມໝູ່ 196 ຕອນ, ຈັດສັນທີ່ດິນໃນ 8 ປະເພດດິນໄດ້ 1.132,50 ເຮັກຕາ ແລະ ສາມາດຈັດເກັບລາຍຮັບຈາກຄ່າທຳນຽມ-ຄ່າບໍລິການໄດ້ 87 ລ້ານກວ່າກີບ.


ເພື່ອເປັນການຢັ້ງຢືນຜົນງານດັ່ງກ່າວ ຕາງໜ້າຄະນະຈັດຕັ້ງແຂວງກໍໄດ້ຂຶ້ນຜ່ານມະຕິຕົກລົງຂອງຄະນະປະຈຳພັກແຂວງ ວ່າດ້ວຍຕົກລົງຮັບຮອງເອົາໜ່ວຍພັກຂະແໜງຄຸ້ມຄອງທີ່ດິນທີ່ຂຶ້ນຄະນະພັກຮາກຖານພະແນກຊັບພະຍາ ກອນທຳມະຊາດ ແລະ ສິ່ງແວດລ້ອມແຂວງເຊກອງເປັນໜ່ວຍພັກແຂງ-ຮູ້ນຳພາຮອບດ້ານຄັ້ງທີ II ປະຈຳປີ 2016 ແລະຜ່ານຂໍ້ຕົກລົງຂອງທ່ານເຈົ້າແຂວງໆເຊກອງວ່າດ້ວຍການແຕ່ງຕັ້ງທ່ານ ບຸນມີ ສາຍນ້ຳລິນ ຫົວໜ້າຂະແໜງຈັດຕັ້ງ-ພະ ນັກງານຂຶ້ນເປັນຮອງຫົວໜ້າພະແນກຊັບພະຍາກອນທຳມະຊາດ ແລະ ສິ່ງແວດລ້ອມແຂວງ.  ໃຫ້ກຽດຂຶ້ນກ່າວມອບໃບຢັ້ງຢືນໂດຍສະຫາຍ ອ້ວນຄຳ ທຸງໄຊ ແລະ ກ່າວຮັບແມ່ນສະຫາຍ ສຸກສະໄຫວ ແກ້ວຄຳໂກດ.


ຂ່າວ-ພາບ : ສັນຍາ ແກ້ວໄຊຍະວົງ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


ກົດພາບອ່ານລາຍລະອຽດ ກົດພາບອ່ານລາຍລະອຽດ

No comments

Powered by Blogger.