Header Ads

ຊຽງຂວາງຈັດກອງປະຊຸມແນະນຳການສ້າງແຜນງົບປະມານ ກິລາແຫ່ງຊາດຄັ້ງທີ XI

ຊຽງຂວາງຈັດກອງປະຊຸມແນະນຳການສ້າງແຜນງົບປະມານຮັບໃຊ້ງານມະຫາກຳກິລາແຫ່ງຊາດຄັ້ງທີ XI ທີ່ແຂວງຊຽງຂວາງເປັນເຈົ້າພາບໃນທ້າຍປີ 2018 ໃນວັນທີ 15 ສິງຫານີ້ ທີ່ຫ້ອງປະຊຸມພະແນກສຶກສາທິການ ແລະ ກິລາ ແຂວງດັ່ງກ່າວ ໂດຍໃຫ້ກຽດເຂົ້າຮ່ວມຂອງທ່ານ ຄຳແສນ ມະນີວົງ ຮອງເຈົ້າແຂວງຊຽງຂວາງ, ມີຜູ້ຕາງໜ້າຈາກຄະນະກຳມະການ 11 ກໍາມະການ ແລະ 43 ອະນຸກຳມະການທີ່ຮັບຜິດຊອບແຕ່ລະໜ້າວຽກໃນງານມະຫາກຳກິລາແຫ່ງຊາດຄັ້ງທີ XI ເຂົ້າຮ່ວມ.

ໂອກາດນີ້ ທ່ານ ທອງສີ ພັນທະວົງ ໃນນາມກອງເລຂາເນື້ອໃນ ໄດ້ຂຶ້ນກ່າວຈຸດປະສົງເປົ້າໝາຍຂອງກອງປະຊຸມ ແມ່ນເພື່ອແນະນຳການສ້າງແຜນງົບປະມານຂອງແຕ່ລະກຳມະການ, ແຕ່ລະອະນຸກຳມະການ ໂດຍຕິດພັນກັບໜ້າວຽກລະອຽດທີ່ຮັບຜິດຊອບ, ແຜນເງິນ, ແຜນຄົນ, ແຜນຄວາມຕ້ອງການວັດຖຸອຸປະກອນ, ເຄື່ອງຮັບໃຊ່ຕ່າງໆ, ຜ່ານແບບຟອມກຳມະການ ແລະ ອະນຸກຳມະການ ພ້ອມບັນດາກິດຈະກຳທີ່ຈະຕ້ອງໄດ້ປະຕິບັດ ເພື່ອຫ້າງຫາກະກຽມຄວາມພ້ອມໃຫ້ສໍາເລັດໂດຍພື້ນຖານ, ພ້ອມນັ້ນ ຍັງຈະໄດ້ຜ່ານຂໍ້ຕົກລົງແຕ່ງຕັ້ງຂອງທ່ານເຈົ້າແຂວງສະບັບເລກທີ 63/ຄຈກຊ ລົງວັນທີ 3 ສິງຫາ 2017, ວ່າດ້ວຍການແຕ່ງຕັ້ງຄະນະຮັບຜິດຊອບເພີ່ມເຕີມ ຮັບໃຊ້ງານມະຫາກຳກິລາແຫ່ງຊາດຄັ້ງທີ XI, ການລາຍງານຄວາມຄືບໜ້າງານມະຫາກຳກິລາແຫ່ງຊາດຄັ້ງທີ XI ແລະ ບັນຫາງົບປະມານ.

 ພ້ອມດຽວກັນນັ້ນ ຍັງໄດ້ມອບໝາຍໃຫ້ແຕ່ລະກຳມະການ ຈົ່ງຄັດເລືອກເອົາພະນັກງານຂອງຕົນ 2 ຫາ 3 ຄົນ ຮັບຜິດຊອບວຽກງານການເງິນ ແລ້ວສົ່ງລາຍຊື່ໃຫ້ກອງເລຂາ ເພື່ອຈະໄດ້ສັງລວມໃຫ້ກະຊວງການເງິນແລ້ວຈັດຕັ້ງການເຝິກອົບຮົມ, ນອກຈາກນັ້ນ ຜູ້ແທນເຂົ້າຮ່ວມກອງປະຊຸມຍັງຈະໄດ້ພ້ອມກັນປຶກສາຫາລື ປະກອບຄຳຄິດຄຳເຫັນໃສ່ຮ່າງແຜນງົບປະມານ ແລະ ແຜນກິດຈະກຳຕ່າງໆ ເພື່ອໃຫ້ເອກະພາບກັນໃນເວລານຳໄປຈັດຕັ້ງປະຕິບັດ.

      ໂອກາດດັ່ງກ່າວ ທ່ານ ຄຳແສນມະນີວົງ ໄດ້ໃຫ້ກຽດປະກອບຄຳຄິດຄຳເຫັນ ທ່ານໄດ້ເນັ້ນໜັກໃຫ້ຄະນະກອງເລຂາຈົ່ງເຮັດວຽກພົວພັນບັນຫາພາຍໃນ ພາຍນອກ ໄປພ້ອມໆກັນໃຫ້ເປັນທີ່ລະອຽດ-ຊັດເຈນ, ສ້າງແຜນກິດຈະກຳຕ່າງໆ ໃຫ້ກະທັດຮັດ ປະຢັດເວລາ, ປະຢັດເງິນ, ປະຢັດຄົນ, ສ່ວນແຕ່ລະອະນຸກຳມະການ ກໍໃຫ້ຈັດຕັ້ງວາງແຜນເຄື່ອນໄຫວແຕ່ດຽວນີ້ເປັນຕົ້ນໄປ, ແບ່ງຄວາມຮັບຜິດຊອບແຕ່ລະໜ້າວຽກໃຫ້ບຸກຄົນຢ່າງລະອຽດ ຮັບປະກັນໃຫ້ມີຜົນສຳເລັດທາງດ້ານຄຸນນະພາບ ແລະ ເວລາ ບໍ່ໃຫ້ຂັດກັບແຜນແມ່ບົດທີ່ວາງໄວ້.

ໂດຍ: ຄານສີສະຫວັນ ພົງພັກດີ


------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



ກົດພາບອ່ານລາຍລະອຽດ

No comments

Powered by Blogger.