Header Ads

ການສືບສວນເບື້ອງຕົ້ນຂອງຄົນໃນເຫດການ ຂ້າສອງສົບ ທີ່ສາລາຄຳ ວັນທີ 1 ກັນຍາ 2017, ເຈົ້າໜ້າທີ່ຄາດປຸ້ນຊິງຊັບອາດບໍ່ແມ່ນເຫດຜົນ!



ຈາກເຫດຄາດຕະກຳ 2 ສົບ, ທີ່ເກີດຂຶ້ນເຊົ້າຂອງວັນທີ 1 ກັນຍາຜ່ານມານີ້, ຢູ່ບ້ານສາລາຄໍາ, ເມືອງຫາດຊາຍຟອງ ນະຄອນຫລວງວຽງຈັນ, ພົບວ່າເປັນເພດຍິງທັງສອງຄົນ ແລະ ໄດ້ເສຍຊີວິດຄາທີ່ ແລະ ດ້ວຍເຫດຜົນໃດ ?

ທ່ານ ພັນຕີ ເກດສະໜາ ພິຈິດ ຮອງຫົວໜ້າພະແນກຕຳຫລວດສືບ ສວນ-ສອບສວນຄະດີອາຍາ ນະຄອນຫລວງວຽງຈັນ ໃຫ້ຮູ້ວ່າ: ຜ່ານການສືບສວນ ແລະ ລົງເກັບກຳຂໍ້ມູນໃນເບື້ອງຕົ້ນ ຈາກພະຍານ, ຜູ້ເຫັນເຫດການ ຮູ້ວ່າ: ເວລາປະມານ 9 ໂມງເຊົ້າຂອງຂອງມື້ນັ້ນ,


ຊຶ່ງກ່ອນເວລາເກີດເຫດໄດ້ມີແມ່ບ້ານທີ່ເຮັດວຽກຢູ່ເຮືອນຂອງທ້າວ ວິລະສັກ ລາດຊະວົງສິງ (ອ໋ອດ), ຈຳນວນ 4 ຄົນຄື:

ນາງ ແອ ໂພນດົງ, ອາຍຸ 48 ປີ, ແລະ 
ນາງ ນ້ອຍ, ອາຍຸ 21 ປີ, ຢູ່ບ້ານດົງໂພນເລົາ, ເມືອງຫາດຊາຍຟອງ, ນະຄອນ ຫລວງວຽງຈັນ ແລະ 
ນາງ ສະຫວັນນະລີ ສີລາໄລ (ແຕະ), ອາຍຸ 54 ປີ
ນາງ ໂມະ, ອາຍຸ 40 ປີ, ຢູ່ບ້ານສາລະຄຳໃຕ້, ເມືອງຫາດຊາຍຟອງ ນະຄອນຫລວງວຽງຈັນ

ທັງສີ່ໄດ້ເຮັດໜ້າທີ່ຂອງຕົນຕາມປົກກະຕິໃນແຕ່ລະວັນຢູ່ພາຍໃນ ບ້ານ, ຫລັງຈາກທ້າວ ອ໋ອດ (ເຈົ້າຂອງເຮືອນ) ໄດ້ຂັບລົດອອກໄປເຮັດວຽກ, ຈາກນັ້ນ ຜູ້ເປັນເມຍຂອງທ້າວອ໋ອດຄື: ນາງ ຈັນທະວີ ລາດຊະວົງສິງ (ອອມ), ອາຍຸ 34 ປີ, ໄດ້ຂັບລົດໃຫຍ່ອອກໄປກາງເດີ່ນບ້ານ ເພື່ອໃຫ້ ນາງ ແອ ແລະ ນາງ ນ້ອຍ ຊ່ວຍກັນລ້າງລົດ, ຈາກນັ້ນ ກໍໄດ້ຍ່າງກັບເຂົ້າໄປໃນເຮືອນປະມານ 10 ນາທີເທົ່ານັ້ນ ກໍໄດ້ຍິນສຽງຮ້ອງອອກມາແຕ່ໃນເຮືອນ,

ຈຶ່ງເຮັດໃຫ້ນາງແອ ແລະ ນາງນ້ອຍ ແລ່ນເຂົ້າໄປ, ສ່ວນນາງແຕະ ທີ່ເຮັດວຽກຢູ່ໃນເຮືອນຄົວ ແລະ ນາງໂມະ ທີ່ເຮັດວຽກຢູ່ພາຍໃນເຮືອນ ກໍໄດ້ແລ່ນອອກມາເບິ່ງ ແລະ ເຫັນຜູ້ຊາຍ 1 ຄົນ ໃສ່ໝວກມົ້ງ ສີດຳປິດບັງໃບໜ້າ, ໃສ່ເສື້ອຍືດແຂນສັ້ນສີດຳລ້ວນ, ໃສ່ໂສ້ງຂາສັ້ນເຄິ່ງຫົກຖົງສີຂຽວຂີ້ມ້າ, ຢືນຈັບປືນສັ້ນຢູ່ໃນເຮືອນແລ້ວຍັງແນປືນມາໃສ່ພວກກ່ຽວ,

ຈາກນັ້ນ ທຸກຄົນກໍໄດ້ພາກັນແລ່ນລົບລີ້ໄປຄົນລະທິດທາງເພື່ອເອົາຕົວຫລອດ, ຜ່ານໄປຫລາຍນາທີ ພວກກ່ຽວຈຶ່ງພາກັນອອກມາ ແລະ ພົບວ່າ: ນາງ ອອມ ຖືກຍິງເຂົ້າໜ້າເອິກ 3 ນັດ ແລະ ນາງໂມະ ຖືກຍິງເຂົ້າຄະມັບ 1 ນັດ ສົ່ງຜົນໃຫ້ທັງສອງເສຍຊີວິດຄາທີ່.


ຕໍ່ເຫດການດັ່ງກ່າວ ທາງເຈົ້າຂອງບ້ານໄດ້ກວດກາຊັບສິນຂອງຕົນແຕ່ບໍ່ມີຫຍັງເສຍ ຫາຍຈັກຢ່າງ ດັ່ງນັ້ນ ຈຶ່ງສະຫລຸບ ໄດ້ວ່າ: ເຫດການຄາດຕະກຳດັ່ງກ່າວບໍ່ແມ່ນການຂ້າຊິງຊັບ ແລະ ເຈົ້າໜ້າທີ່ກໍ ໄດ້ສືບຕໍ່ສົມທົບກັບພາກສ່ວນກ່ຽວຂ້ອງເພື່ອຕິດຕາມຫາ ເປົ້າໝາຍ ກໍຄືຄົນຮ້າຍຜູ້ກໍ່ເຫດ ດັ່ງກ່າວໃຫ້ໄດ້ໄວທີ່ສຸດ.

ໂດຍ: ປກສ ນະຄອນຫຼວງ
Credited: ລາວພັດທະນາ



ນະຄອນຫຼວງວຽງຈັນ: ຈາກເຫດສະເທືອນຂວັນ ການຄາດຕະກຳ ທີ່ເກີດຂຶ້ນ ເວລາປະມານ 8:30 ວັນທີ 1/9/2017 ເຮັດໃຫ້ມີຄົນເສຍຊີວິດ 2 ຄົນ (ເປັນຍິງທັງສອງ) ຢູ່ບ້ານສາລາຄຳ ເມືອງຫາດຊາຍຟອງ ນະຄອນຫຼວງວຽງຈັນ.

ຜູ່ເສຍຊີສິດ ຄົນທີ່ຫນຶ່ງເປັນເມຍເຈົ້າຂອງເຮືອນ  ຖືກອາວຸດປືນຍິງເຂົ້າທີ່ຫນ້າ ເອິກ 2 ນັດ ແລະ ອີກຄົນຫນຶ່ງເປັນແມ່ບ້ານ.  ປະຈຸບັນນີ້ ທາງຍາດພີ່ນ້ອງ ທີ່ເຮືອນຫລັງທີ່ເກີດເຫດ ກຳລັງເຮັດພິທີທາງສາສະຫນາ ແລະ ເຄື່ອນ ຍ້າຍສົບທັງສອງໄປໂຮງຫມໍເສດຖາທິລາດ ແລະມື້ອື່ນ 2 ກັນຍາ 2017 ເປັນມື້ສົ່ງສະການທີ່ວັດສາລະຄຳ.

ຕາມການເລົ່າຂອງບັນດາຍາດຕິພີ່ນ້ອງບອກວ່າ: ໃນຕອນເຊົ້າຫລັງຈາກທີ່ຜົວລາວອອກໄປການ ບໍ່ພໍເທົ່າໃດກໍມີຄົນຮ້າຍເຂົ້າມາດັກຖ້າຢູ່ໃນເຮືອນ ແລ້ວລົງມືກໍ່ເຫດຍິງເມຍເຈົ້າຂອງເຮືອນ ແລະແມ່ບ້ານ. ນອກຈາກນີ້ ຍັງມີຄົນເຮັດວຽກອີກຄົນໜື່ງ ທີ່ມືປືນໄດ້ແນປືນໃສ່ ແຕ່ຜູ່ກ່ຽວຢ້ານຈິ່ງຟ້າວແລ່ນໄປຫຼັງບ້ານ. ມືປືນ ບໍ່ໄດ້ຕາມໄປ ນາງຈິ່ງລອດ. ເຊິ່ງຄາດຕະກອນແມ່ນໃຊ້ໜ້າກາກໂມ້ງ ປົກປິດໃບໜ້າ ຈິ່ງບໍ່ສາມາດຮູ້ໄດ້ວ່າແມ່ນໃຜ.

ເນື່ອງຈາກພາຍຫຼັງລົງມືຄາດຕະກຳ ບໍ່ໄດ້ມີຮອງຮອຍ ປົ້ນເອົາສິ່ງຂອງ ພາຍໃນເຮືອນ ແລະ ບໍ່ມີຫຍັງເສຍຫາຍ. ທາງເຈົ້າໜ້າທີ່ ຈິ່ງມຸ້ງປະເດັນໄປທີ່ການຄາດຕະກຳ ດ້ວຍເຫດຜົນອື່ນ ຫຼາຍກວ່າການປຸ້ນຊິ້ງຊັບ.

ເຈົ້າຂອງເຮືອນດັ່ງກ່າວ ທັງສອງມີລູກນຳກັນສອງຄົນ ທີ່ໂຊກດີຕອນເກີດເຫດ ລູກແມ່ນຢູ່ເທີງເຮືອນ, ຈິ່ງວຸດວິດຈາກການກໍ່ເຫດດັ່ງກ່າວ. ເຊິ່ງທັງສອງນັກທຸລະກິດ ທີ່ເຮັດຫຼາຍອັນ ລວມທັງເຈົ້າຂອງ ພັບໂດໂດ ແລະ ທຸລະກິດອື່ນໆ.

 ໃນຂະນະນີ້ທາງເຈົ້າຫນ້າທີ່ກຳລັງດຳເນີນການສືບຫາຂໍ້ມູນ ແລະເກັບຫລັກຖານຈາກກ້ອງວົງຈອນປິດ ແລະຄົນອ້ອມຂ້າງແຖວບ້ານນັ້ນຢູ່. 

ຂໍໃຫ້ທາງເຈົ້າໜ້າທີດ ກວດສອບ ແລະ ຕາມຈັບຄາດຕະກອນມາລົງໂທດ.




ນະຄອນຫຼວງວຽງຈັນ: ລາຍງານຈາກເຈົ້າໜ້າທີ່ເມືອງ ຫາດຊາຍຟອງໃຫ້ວ່າ ໃນຕອນເຊົ້າເວລາປະມານ 8:30 ວັນທີ 1 ກັນຍາ 2017 ໄດ້ຮັບແຈ້ງເຫດມີການເກີດຄາດຕະກຳ ທີ່ເຮືອນປະຊາຊົນ ບ້ານສາລາຄຳ, ເມືອງຫາດຊາຍຟອງ, ນະຄອນຫຼວງວຽງຈັນ.


ທີ່ເກີດເຫດ ພົບເຫັນ ສົບຜູ້ເສຍຊີວິດ 2 ຄົນເປັນເພດຍິງທັງສອງ ຊາບຂໍ້ມູນ ແມ່ນເມຍເຈົ້າຂອງ ເຮືອນ ແລະ ແມ່ບ້ານ. ສ່ວນລູກຂອງເຈົ້າຂອງເຮືອນ ທີ່ຢູ່ເທີງເຮືອນແມ່ນປອດໄພ. ທາງເຈົ້າໜ້າທີ່ແມ່ນໄດ້ເກັບກຳຂໍ້ມູນ ເພື່ອພິສູດຫຼັກຖານ ແລະ ກວດກາກ້ອງວົງຈອນທີ່ຢູ່ເຮືອນ ແລະ ເຂດໃກ້ຄຽງ ເພື່ອຕິດຕາມຫາ ຄາດຕະກອນທີ່ລົງມືກໍ່ເຫດ ແລະ ສາເຫດ ທີ່ຈູງໃຈໃນການລົງມືຄັ້ງນີ້.

ລາຍລະອຽດເພີ່ມເຕີມຈະແຈ້ງໃຫ້ຊາບອີກ. ສະແດງຄວາມເສຍໃຈກັບຄອບຄົວຜູ້ເສຍຊີວິດ.

ພາບແລະຂ່າວ: ເຈົ້າໜ້າທີ່ ເມືອງຫາດຊາດຟອງ






------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com






No comments

Powered by Blogger.