Header Ads

ການນໍາ ເຊກອງ ຊີ້ນຳເມືອງລະມາມໃຫ້ຍົກສູງການພັດທະນາ



ການນຳແຂວງເຊກອງລົງເຄື່ອນໄຫວວຽກງານຢູ່ເມືອງລະມາມ ໄດ້ໃຫ້ທິດຊີ້ນໍາເມືອງຕ້ອງຖືສຳຄັນການພັດທະນາແກ້ໄຂຄວາມທຸກຍາກຂອງປະຊາຊົນເປັນບູລິມະສິດຫຼັກ, ເອົາວຽກງານ ປກຊ-ປກສ ເປັນຂອງທົ່ວປວງຊົນ, ສ້າງໃຫ້ເມືອງສືບຕໍ່ມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບສຸກ, ຍຸຕິທຳ ແລະ ສີວິໄລ.

ທ່ານ ເຫຼັກໄຫຼ ສີວິໄລ ຮອງເຈົ້າແຂວງໆເຊກອງ ພ້ອມດ້ວຍຄະນະໄດ້ລົງຢ້ຽມຢາມ ແລະ ຊີ້ນໍາບາງວຽກງານຢູ່ເມືອງລະມາມໃນຕອນເຊົ້າວັນທີ 14 ກັນຍາ 2017 ນີ້, ມີການນໍາຂອງເມືອງເຂົ້າຮ່ວມ, ທ່ານ ແພງສີ ສີລາວີ ເຈົ້າເມືອງໆລະມາມ ໄດ້ລາຍງານການຊີ້ນໍາໆພາຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໃນໄລຍະ 8 ເດືອນຕົ້ນປີ ແລະ ທິດທາງແຜນການ 4 ເດືອນທ້າຍປີ 2017 ໂດຍທ່ານໄດ້ຍົກໃຫ້ເຫັນຜົນງານທີ່ເມືອງຍາດໄດ້ລວມທັງຂໍ້ຫຍຸ້ງຍາກ ແລະ ຂໍ້ຄົງຄ້າງທີ່ເມືອງຈະຕ້ອງສືບຕໍ່ແກ້ໄຂຈຳນວນໜຶ່ງ.



ໃນໂອກາດດັ່ງກ່າວ ທ່ານຮອງເຈົ້າແຂວງກໍ່ໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານ ແລະ ທິດທາງແຜນການທີ່ວາງເອົາໄວ້ ພ້ອມທັງ ຊີ້ນຳບາງວຽກງານເນັ້ນໜັກໃຫ້ເອົາໃຈໃສ່ວຽກງານສຶກສາອົບຮົມການເມືອງນຳພາແນວຄິດໄປ ພ້ອມໆກັບວຽກງານປ້ອງກັນຊາດ-ປ້ອງກັນຄວາມສະຫງົບໃຫ້ມີຄວາມໜັກແໜ້ນ ແລະ ເຂົ້ມແຂງ, ສືບຕໍ່ແກ້ໄຂຄວາມທຸກຍາກຂອງປະຊາຊົນບັນດາເຜົ່າຢ່າງມີປະສິດທິພາບ, ປະຕິບັດເປົ້າໝາຍສະຫະສະວັດດ້ານການພັດທະນາ, ຊຸກຍູ້ສົ່ງເສີມປະຊາຊົນຜະລິດເປັນສິນຄ້າໃຫ້ນັບມື້ກວ້າງຂວາງ ແລະ ເປັນຂະບວນການຟົດຟື້ນ ທັງນີ້ ກໍ່ເພື່ອແນໃສ່ສ້າງພື້ນຖານເສດຖະກິດທີ່ເຂັ້ມແຂງແກ່ປະຊາຊົນໄດ້ມີຊີວິດການເປັນຢູ່ທີ່ດີຂຶ້ນ, ຂະຫຍາຍພື້ນຖານການສຶກສາໃຫ້ໄດ້ທັງປະລິມານ ແລະ ຄຸນນະພາບ ເພື່ອເປັນໜໍ່ແໜງຜູ້ສືບທອດທີ່ດີ ແລະ ມີຄຸນນະພາບໃນອະນາຄົດ.


ໃນຂະນະດຽວກັນພາກລັດເອງ ກໍ່ຕ້ອງເອົາໃຈໃສ່ປະຕິບັດໜ້າທີ່ວຽກງານວິຊາສະເພາະຂອງຕົນເປັນຕົ້ນແມ່ນການເກັບລາຍຮັບເຂົ້າງົບປະມານໃຫ້ບັນລຸຕາມແຜນການ, ຕ້ານ ແລະ ແກ້ໄຂປະກົດການຫຍໍ້ທໍ້ຢ່າງເປັນລະບົບມີຂັ້ນຕອນ, ເອົາໃຈໃສ່ປັບປຸງແບບແຜນວິທີນໍາພາ, ແບບແຜນວິທີເຮັດວຽກງານ, ແບບແຜນການບໍລິຫານລັດ ແລະ ກົງຈັກການຈັດຕັ້ງຢູ່ຂັ້ນຮາກຖານ, ປັບປຸງຮັບປະກັນການປະກາດບ້ານນ້ອຍເປັນບ້ານໃຫຍ່ ແລະ ປະກາດບ້ານໃຫຍ່ໃຫ້ເປັນຕົວເມືອງນ້ອຍຢູ່ຊົນນະບົດ, ປັບປຸງບັນດາໜ່ວຍພັກໃຫ້ປອດໃສ, ເຂັ້ມແຂງ, ໜັກແໜ້ນ ແລະ ເພີ່ມທະວີຄຸນນະພາບການກວດພັກ-ກວດກາລັດໃຫ້ເຂັ້ມງວດ.


ຂ່າວ-ພາບ : ດາວສະຫວັນ ໄຊລາສອນ/ຂ່າວເຊກອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com


No comments

Powered by Blogger.