Header Ads

ສປ ຈີນ ຕິດອັນດັບ 1 ຂອງການລົງທຶນຕ່າງປະເທດໃນ ສປປ ລາວ



(ຂປລ) ປັດຈຸບັນ ສະພາບ​ການ​ລົງທຶນ​ ຈາກ​ຕ່າງປະ​ເທດ ທີ່​ເຂົ້າ​ມາ​ລົງທຶນຢູ່ ສປປ ລາວ​ ໃນຂະ ແໜງການຕ່າງໆ ​ໄດ້​​ເພີ່ມຂຶ້ນຢ່າງ​ຕໍ່​ເນື່ອງ ພາຍຫລັງ​ທີ່ ລັດຖະບານ​ລາວໄດ້​ເປີດ​ກວ້າງ, ປັບປຸງບັນດານິຕິກຳ ​ແລະ ນະໂຍບາຍດ້ານຕ່າງໆ ເພື່ອສົ່ງເສີມການລົງທຶນ ຂອງຕ່າງປະເທດ ເຂົ້າມາລົງທຶນຢູ່ລາວ, ​ເຊິ່ງ ສປ ຈີນ ຖື​ເປັນ​ອັນ​ດັບ 1 ທີ່​ມີ​ການ​ລົງທຶນໃນ​ຂະ​ແໜງ​ການ​ຕ່າງໆ ​ໃນສປປ ລາວ, ​ໂດຍມີ​ມູນ​ຄ່າ​ການ​ລົງທຶນ​ຫລາຍ​ກວ່າ 7.200 ລ້ານ​ໂດ​ລາ​ສະຫະລັດ, ກວມ​ເອົາ 25,2% ຂອງ​ການ​ລົງທຶນ​ທັງ​ໝົດ.



ທ່ານ ຄຳ​ລຽນ ພົນ​ເສນາ ຮອງລັດຖະມົນຕີ​​​ ກະຊວງແຜນການ ແລະ ການລົງທຶນ ​ໄດ້ລາຍ​ງານ​ໃນກອງປະຊຸມ ສົ່ງ​ເສີມການລົງທຶນ ລາວ-ຈີນ ຢູ່ທີ່ເມືອງໜານໜິງ ​ແຂວງ​ກວາງຊີ ສປ ຈີນ ເມື່ອບໍ່ດົນມານີ້ວ່າ: ປັດຈຸ​ບັນ ຕົວ​ເລກ​ການ​ລົງທຶນ ​ຂອງ​ຕ່າງປະ​ເທດ​ ທີ່​ເຂົ້າ​ມາ​ລົງທຶນ ​ໃນ​ຂະ​ແໜງ​ການ​ຕ່າງໆ ຢູ່ ສປປ ລາວ ​ເພີ່ມ​ຂຶ້ນຢ່າງ​ຕໍ່​ເນື່ອງ. ​ເວົ້າ​ສະ​ເພາະ ສປ ຈີນ ມີ​ມູນ​ຄ່າ​ການ​ລົງທຶນ ຫລາຍ​ກວ່າ 7.200 ລ້ານ​ໂດ​ລາ​ສະຫະລັດ, ​ໃນ​ນັ້ນ​ມີ ການ​ລົງທຶນໃນ​ຂະ​ແໜງ​ບໍ່​ແຮ່ ກວມ​ເອົາ 49,8%, ຂະ​ແໜງ​ໄຟຟ້າ ກວມ​ເອົາ 18,3% ​ແລະ ຂະ​ແໜງກະສິກຳ ກວມ​ເອົາ 8,9%. ສ່ວນດ້ານ​ການ​ຄ້າ, ສປ ຈີນ ​ເປັນ​ປະ​ເທດ​ຄູ່​ຮ່ວມ​ການ​ຄ້າ​ໃຫຍ່ ອັນ​ດັບ 2 ຂອງ​ລາວ ຮອງ​ຈາກ​ປະ​ເທດ​ໄທ, ມີມູນ​ຄ່າ​ການ​ຄ້າ​ ບັນລຸ 426 ລ້ານ​ໂດ​ລາ​ສະຫະລັດ. ​ໃນ​ນັ້ນ, ມູນ​ຄ່າ​ການ​ສົ່ງ​ອອກບັນລຸ 218,4 ລ້ານ​ໂດ​ລາ, ກວມ 29,8% ຂອງ​ການ​ສົ່ງ​ອອກ​ທັງ​ໝົດ, ສິນ​ຄ້າ ສົ່ງ​ອອກ​ຕົ້ນ​ຕໍ່ ມີ: ຜະລິດ​ຕະພັນ​ໄມ້, ທອງ ​ແລະ ຢາ​ງພາລາ; ສ່ວນມູນ​ຄ່າ​ການ​ນຳ​ເຂົ້າ ບັນລຸ 207,6 ລ້ານ​ໂດ​ລາ ກວມ 18,36% ຂອງ​ການ​ນຳ​ເຂົ້າ​ທັງ​ໝົດ ສິນຄ້າ​ນຳ​ເຂົ້າ​ຕົ້ນຕໍ ມີ: ​ເຄື່ອງ​ໄຟ ຟ້າ, ​ເຄື່ອງ​ຈັກ, ອາ​ໄຫລ່​ຍົນ, ອາ​ໄລ​ລົດ ​ແລະ ອື່ນ​ໆ.

ທ່ານ ຄຳ​ລຽນ ພົນ​ເສນາ ​ໃຫ້​ຮູ້​ຕື່ມ​ວ່າ: ​ປັດຈຸບັນ ສປປ ລາວ ມີນິຕິກຳ ຮອງຮັບສິດຜົນປະໂຫຍດ ຂອງນັກລົງທຶນຕ່າງປະເທດ ​ແລະ ສິ່ງ​ອຳ​ນວຍ​ຄວາມ​ສະດວກ ​ໃນ​ດ້ານ​ຕ່າງໆ ​ເປັນ​ຕົ້ນ ການ​ປະຕິບັດ​ນະ​ໂຍບາຍ ສົ່ງ​ເສີມ​ພິ​ເສດ, ສະໜັບ​ສະ​ໜູນ, ​ໃຫ້​ສິດທິ​ພິ​ເສດ ໃນ​ການ​ດຳ​ເນີນ​ທຸລະ​ກິດ ແລະ ອື່ນໆ.

ຂ່າວ ແລະ ພາບ: ທະນູ​ທອງ
------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.