Header Ads

ທ່ານສອນໄຊ ສີພັນດອນ ຮ່ວມງານແຂ່ງເຮືອທີ່ຫົງສາ 2017



ງານບຸນປະເພນີແຂ່ງຂັນຊ່ວງເຮືອປະຈຳປີ 2017 ຢູ່ເມືອງຫົງສາ ແຂວງໄຊຍະບູລີ  ໄດ້ຈັດຂື້ນໃນລະຫວ່າງວັນທີ 23 - 24 ກັນຍາ 2017 ນີ້, ຢູ່ທີທ່ານ້ຳແກນ ເຂດບ້ານສີບຸນເຮືອງ  ໂດຍການເປັນກຽດເຂົ້າຮ່ວມຮັບຊົມຂອງທ່ານ ປອ ສອນໄຊ ສີພັນດອນ ຮອງນາຍົກລັດຖະມົນຕີ  ແຫ່ງ ສປປ ລາວ,  ມີທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ, ມີຄະນະພັກ - ອໍານາດການປົກຄອງເມືອງ, ຄະນະພັກ - ອຳນາດການປົກຄອງບ້ານ, ແຂກຖືກເຊີນທັງພາຍໃນ ແລະ ຕ່າງແຂວງ, ນັກທ່ອງທ່ຽວທັງພາຍໃນ ແລະ ຕ່າງປະເທດ ພ້ອມດ້ວຍມວນຊົນຊາວເມືອງຫົງສາ ເຂົ້າຮັບຊົມຢ່າງຫຼວງຫຼາຍ.


ທ່ານ ຄຳເພັດ ພົມມະລາດ ເຈົ້າເມືອງຫົງສາ ກ່າວວ່າ: ຈຸດປະສົງການຈັດງານໃນຄັ້ງນີ້, ແມ່ນເພື່ອອະນຸລັກຮັກສາ ວັດທະນະທໍາ, ຮີດຄອງປະເພນີອັນດີງາມຂອງຊາວເມືອງຫົງສາທີ່ເຄີຍປະຕິບັດກັນມາ;  ທັງເປັນການເຕົ້າໂຮມຄວາມສາມັກຄີພາຍໃນໃຫ້ເປັນປຶກແຜ່ນ ແລະ ຍູ້ແຮງດ້ານການທ່ອງທ່ຽວພາຍໃນ ເມືອງຫົງສາໃຫ້ມີຄວາມໝັ້ນທ່ຽງຍືນຍົງ ແລະ ມີທ່າຂະຫຍາຍຕົວຢ່າງກວ້າງຂວາງ, ສຳລັບການແຂ່ງຂັນຊ່ວງເຮືອປີນີ້, ມີເຮືອຊ່ວງເຂົ້າຮ່ວມຊີງໄຊ ທັງໝົດ 14 ລຳ,  ໃນນັ້ນ, ມີເຮືອຊ່ວງເພດຊາຍເຂົ້າຮ່ວມແຂ່ງຂັນ 14 ລຳ ແລະ ເຮືອຊ່ວງເພດຍິງ 14 ລໍາ, ຈາກ 14 ບ້ານ, ແບ່ງອອກເປັນ 2 ສາຍຄື: ສາຍ ກໍ ແລະ ສາຍຂໍ , ເປັນການແຂ່ງຂັນພົບກັນໝົດພາຍໃນສາຍ, ຂະໜາດຄວາມຍາວຂອງເຮືອຊ່ວງແມ່ນ 15 - 16 ແມັດ, ສາມາດບັນຈຸສີພາຍໄດ້ 15 ສີພາຍ.



 ຜົນຂອງການແຂ່ງຂັນເຮືອຊ່ວງເພດຊາຍ ຊະນະເລີດ ອັນດັບທີ 1 ແມ່ນເຮືອບ້ານ ນາປຸ່ງ, ອັນດັບທີ 2 ເຮືອບ້ານ ນາແກ່ນຄຳ ແລະ ອັນດັບທີ 3 ເຮືອບ້ານ ສີບຸນເຮືອງ,  ເຮືອຊ່ວງເພດຍິງຊະນະເລີດ ອັນດັບທີ 1 ແມ່ນເຮືອບ້ານ ສີບຸນເຮືອງ, ອັນດັບທີ 2 ເຮືອບ້ານ ຈຳປາ ແລະ ອັນດັບທີ 3 ເຮືອບ້ານໂພນໄຊ,  ສ່ວນລາງວັນຂອງການແຂ່ງຂັນເຮືອຊ່ວງເພດຊາຍ ແລະ  ເພດຍິງ ອັນດັບທີ 1 ໄດ້ຮັບຂັນເງິນໜຶ່ງໜ່ວຍ ນ້ຳໜັກ 1 ກິໂລ ແລະ ຂັນໝູນວຽນ 1 ໜ່ວຍ ພ້ອມເງິນສົດ 4 ລ້ານກີບ, ອັນດັບທີ 2 ໄດ້ຮັບ ຂັນໂລ້ 1 ໜ່ວຍ ພ້ອມເງິນສົດ 3 ລ້ານ 5 ແສນກີບ ແລະ ອັນດັບທີ 3 ໄດ້ຮັບຂັນໂລ້ 1 ໜ່ວຍ ພ້ອມເງິນສົດ 3  ລ້ານກີບ,  ພ້ອມນີ້, ຢູ່ພາຍໃນງານດັ່ງກ່າວ ຍັງໄດ້ປະກວດເຮືອງາມ ແລະ ອາຫານພື້ນບ້ານຕື່ມອີກ.


ໂອກາດນີ້, ທ່ານ ຄຳເພັດ ພົມມະລາດ ເຈົ້າເມືອງຫົງສາ ຕາງໜ້າຄະນະພັກ - ອຳນາດການປົກຄອງເມືອງ ໄດ້ກ່າວສະແດງຄວາມຄອບໃຈຢ່າງສູງຕໍ່ອົງການຈັດຕັ້ງພັກ-ລັດ, ບໍລິສັດ, ຫ້າງຮ້ານ, ນັກທຸລະກິດ, ພໍ່ຄ້າ - ຊາວຂາຍ ແລະ  ພໍ່ແມ່ປະຊາຊົນໃນທົ່ວເມືອງທີ່ໄດ້ໃຫ້ການອຸປະຖຳທາງດ້ານວັດຖຸປັດໃຈ ແລະ ພ້ອມກັນຈັດງານປະເພນີ ບຸນຊ່ວງເຮືອປະຈຳປີນີ້ ສຳເລັດລົງດ້ວຍບັນຍາກາດຄຶກຄື້ນມ່ວນຊື່ນ ແລະ ມີຄວາມສະຫງົບປອດໄພດີ.



ຂ່າວ : ຊາຍນະສານ



------------------------------------------
ໂທລະໂຄ່ງ ໃຫ້ຫຼາຍກວ່າຄຳວ່າໂຄສະນາ
LINE ID: @tholakhong | Twitter ID: @tholakhong
tholakhong@gmail.com | www.tholakhong.com



loading...

No comments

Powered by Blogger.